ကိုဆိုဗိုနိုင်ငံဟာ ဥရောပမှာ လျှပ်စစ်ဓာတ်အားခ အနိမ့်ဆုံးစျေးနှုန်း ရှိပေမယ့်လည်း ပြည်သူ့ကျန်းမာရေး ကုန်ကျစရိတ်တွေကိုပါ ထည့်သွင်းတွက်ချက်ပါက အရမ်းမြင့်မားတယ်လို့ သဘာဝပတ်ဝန်းကျင် ထိန်းသိမ်းရေးသမားတွေက ပြောပါတယ်။

ဓာတ်အားကီလိုဝပ် ၁ နာရီကို ယူရိုခြောက်ဆင့်သာရှိလို့ လျှပ်စစ်သုံးစွဲခ ဈေးနှုန်းအရမ်းချိုတဲ့ ကိုဆိုဗိုမှာ ကျောက်မီးသွေးသုံး ဓာတ်အားပေးစက်ရုံမှ ညစ်ညမ်းမှုတွေရဲ့အကျိုးဆက်အဖြစ် ဒေသခံအများစုဟာ နာတာရှည်ရောဂါတွေကို ခံစားနေကြရတယ်လို့ ဆရာဝန်တွေက ပြောပါတယ်။

ကျောက်မီးသွေးသုံး ဓာတ်အားပေးစက်ရုံ အအိုအဟောင်း နှစ်ရုံရှိတဲ့  အော့ဘလစ်မြို့မှာ နာတာရှည်ရောဂါဝေဒနာရှင် ၃၀ ရာခိုင်နှုန်းလောက်ရှိပြီး လေထုညစ်ညမ်းမှုကြောင့် ကိုဆိုဗိုရဲ့ တခြားဒေသတွေထက် ကင်ဆာအကျိတ် ၃၀ ရာခိုင်နှုန်း ပိုများတယ်လို့ မြို့ရဲ့လူနာတင်ယာဉ် ဒါရိုက်တာ ဟာကီဂျာရှာရီက ပြောပါတယ်။

ကမ္ဘာ့ဘဏ်ရဲ့ ၂၀၁၉ အစီရင်ခံစာမှာ လေထုညစ်ညမ်းမှုကြောင့် လူဦးရေ  ၁ဒသမ ၈  သန်းရှိတဲ့ ကိုဆိုဗိုမှာ နှစ်စဉ် လူ ၇၆၀ လောက် သေဆုံးနေရတယ်လို့ ဆိုပါတယ်။ 

အနောက်ဘော်လကန်နိုင်ငံ ၆ နိုင်ငံမှ အများစုဟာ ဓာတ်အားပေးထုတ်လုပ်ဖို့ ကျောက်မီးသွေးကို မှီခိုနေရပြီး လေထုညစ်ညမ်းမှုမှာ အဓိက ပံ့ပိုးကူညီသူအဖြစ် သတ်မှတ်ခံထားရပါတယ်။ 

ဒါပေမယ့် ဥရောပသမဂ္ဂကို ဝင်နိုင်အောင် ကြိုးပမ်းနေတဲ့နိုင်ငံတွေအနေနဲ့ ကျောက်မီးသွေးသုံးစွဲမှု ကို လျှော့ချရမှာဖြစ်ပါတယ်။ 

ကမ္ဘာ့ပဉ္စမမြောက်အကြီးဆုံး လစ်ဂနိုက်သိုက် ရှိတဲ့ ကိုဆိုဗိုနိုင်ငံက အော့ဘလစ် ဓာတ်အားပေးစက်ရုံ ၂ ရုံမှာ လျှပ်စစ်ဓာတ်အား ၉၀ ရာခိုင်နှုန်းကျော် ထုတ်လုပ်ပါတယ်။ 

အခုလအစောပိုင်းမှာ ဥရောပကော်မရှင်ဟာ ကျန်းမာရေးအတွက် အန္တရာယ်ရှိတဲ့ စွမ်းအင်ထောက်ပံ့မှုအပေါ် လုံးဝဥဿုံမှီခိုနေခြင်းကို ရပ်တန့်ဖို့ ကိုဆိုဗိုကို တိုက်တွန်းခဲ့ပါတယ်။

သန့်ရှင်းသောစွမ်းအင် ပိုမိုရရှိရေးအတွက် ထောက်ခံအားပေးတဲ့ အန်ဂျီအိုအဖွဲ့ Balkan Green Foundation မှ ဘက်စ်ဖို့ကိုဆိုဗိုက သူတို့ရရှိထားတဲ့ အချက်အလက်တွေအရ လေထုညစ်ညမ်းမှုကြောင့် ဒေသခံပြည်သူတွေဟာ အသက် ၅ နှစ်စာ ပိုတိုနေရပြီလို့ ပြောပါတယ်။