ဆားဘီးယားနဲ့ ကိုဆိုဗိုခေါင်းဆောင်တွေဟာ ဆက်ဆံရေး ပုံမှန်ဖြစ်စေဖို့အတွက် အနောက်တိုင်း ကျောထောက်နောက်ခံပြုထားတဲ့ အပေးအယူတရပ်ကို ဖေဖော်ဝါရီ ၂၇ ရက်မှာ သဘောတူညီခဲ့တယ်လို့ ဥရောပသမဂ္ဂ နိုင်ငံခြားရေးမူဝါဒ အကြီးအကဲ ဂျိုးဇက်ဖ် ဘော်ရဲလ်က ပြောပါတယ်။

ဒါပေမဲ့ သဘောတူညီချက်ကို အကောင်အထည်ဖော်ဖို့ နောက်ထပ်ဆွေးနွေးမှုတွေ လိုအပ်နေကြောင်းလည်း ဆိုပါတယ်။

ဘရပ်ဆဲလ်စ်မှာ ဆားဘီးယားသမ္မတ အလက်ဇန်ဒါ ဗူးချီချ်နဲ့ ကိုဆိုဗိုဝန်ကြီးချုပ် အလ်ဘင်န်ကာရ်တီတို့အကြား ဆွေးနွေးပွဲတွေအပြီးမှာ ဘော်ရဲလ်က ခေါင်းဆောင်တွေဟာ စစ်ပွဲရန်သူတော်ဟောင်းကြီးတွေအကြား သဘောတူညီချက်အတွက် “နောက်ထပ် ဆွေးနွေးစရာ မလိုတော့ဘူး” လို့ သဘောတူညီခဲ့ကြကြောင်း ပြောပါတယ်။

ဒါပေမဲ့ အကောင်အထည်ဖော်မှုဆိုင်ရာ နောက်ဆက်တွဲကိစ္စက သဘောတူညီချက်အတွက် အရေးကြီးတဲ့ အစိတ်အပိုင်းဖြစ်ပြီး အပြီးမသတ်ရသေးကြောင်းလည်း သူက ဆိုပါတယ်။

ဆားဘီးယားသမ္မတ ဗူးချီချ်က ဆွေးနွေးခဲ့တဲ့ ကိစ္စတွေဟာ အရေးကြီးပြီး ကောင်းကောင်း ဆွေးနွေးခဲ့တယ်လို့ ပြောပါတယ်။

မြေပြင်ပေါ်က လူတွေရဲ့ လုံခြုံရေးကို ခြိမ်းခြောက်မယ့် တဖက်သတ်လှုပ်ရှားမှုတွေကို ကျော်လွှားနိုင်မယ်လို့ ယုံကြည်ကြောင်းလည်း ဆိုပါတယ်။

၂ နိုင်ငံဟာ အရင်ရထားပြီးသား သဘောတူညီချက်တွေကို အကောင်အထည်ဖော်ဖို့ လုပ်ဆောင်နိုင်မယ်လို့ ယုံကြည်ကြောင်း ပြောဆိုပါတယ်။

သူကတော့ သဘောတူလက်မှတ်ရေးထိုးဖို့ အဆင်သင့်ဖြစ်နေပြီး လိုလိုလားလား ရှိကြောင်းလည်း ဖော်ပြခဲ့ပေမဲ့ ဆားဘီးယားဘက်က လက်မှတ်ထိုးဖို့ အဆင်သင့် မဖြစ်သေးတာကြောင့် စာချုပ်ကို လက်မှတ်မထိုးရသေးကြောင်း ကိုဆိုဗိုဝန်ကြီးချုပ် ကာရ်တီက ပြောပါတယ်။

ကိုဆိုဗိုဟာ စစ်ပွဲအပြီး ၁၀ နှစ်နီးပါးအကြာ ၂၀၀၈ ခုနှစ်မှာ လွတ်လပ်ရေး ကြေညာခဲ့ပြီး ဆားဘီးယားအုပ်ချုပ်မှုကို အဆုံးသတ်ခဲ့တာပါ။ ဒါပေမဲ့ ဆားဘီးယားနိုင်ငံဟာ ကိုဆိုဗိုကို ခွဲထွက်ပြည်နယ်တခုအဖြစ် သတ်မှတ်ဆဲဖြစ်ပြီး နှစ်တလျှောက်မှာ ဘော်လကန် အိမ်နီးချင်းတွေအကြား စစ်ပွဲတွေ ပြန်ဖြစ်မှာကို စိုးရိမ်နေကြပါတယ်။

ကိုဆိုဗိုနိုင်ငံဟာ ဆာဘီးယားနဲ့ဆက်သွယ်ထားတဲ့ အကြီးဆုံး နယ်စပ်ဖြတ်ကျော်ဂိတ်ဖြစ်တဲ့ မာဒါးရီဂိတ်ကို ဒီဇင်ဘာ ၂၈ ရက်မှာ ပိတ်ပစ်ခဲ့ပါတယ်။

မာဒါးရီ ဝင်ပေါက်ဂိတ်ဟာ ကုန်းလမ်းကြောင်းအတွက် ကိုဆိုဗိုရဲ့ အရေးအပါဆုံး ဖြစ်ပြီး နိုင်ငံတကာ ရထားလမ်းတွေကို သွယ်တန်းထားပါတယ်။

ကိုဆိုဗိုနိုင်ငံရဲ့ လွတ်လပ်ရေးကို အသိအမှတ်မပြုဘဲ ငြင်းဆန်ခံခဲ့ရလို့ ဆားဘီးယားက ဆန္ဒပြသူတွေဟာ ကိုဆိုဗိုရှိ သူတို့ရဲ့ ဆွေမျိုးပေါက်ဖော်တွေကို ထောက်ခံအားပေးဖို့အတွက် ဆားဘီးယားဘက်ခြမ်းကို အရင်ပိတ်ပစ်ခဲ့တာပါ။

ဒီဇင်ဘာ ၁၀ ရက် ကတည်းက သူတို့ရဲ့ ကိုဆိုဗိုဘက်ခြမ်းမှာ အလားတူ ဆန္ဒပြမှုတွေကြောင့် ဆားဘီးယားနယ်စပ်ရှိ တခြားဖြတ်ကျော်ဂိတ် နှစ်ခုကို ပိတ်လိုက်တာကြောင့် နှစ်နိုင်ငံအကြား ဝင်ပေါက် ၃ ခုသာ ကျန်ရှိပါတော့တယ်။

နယ်စပ်ဖြတ်ကျော်မှုက မသုံးတော့ဘူးလို့ ထင်ရပေမဲ့ ဂိတ်ပိတ်လိုက်တာဟာ သန်းခေါင်ကျော်မှာ သက်ရောက်ခဲ့ပါတယ်။ 

ရက်သတ္တပတ်တွေအတွင်း ဘဲလ်ဂရိတ်နဲ့ ပရစ္စတီနာတို့ကြား တင်းမာမှုတွေ တိုးလာပြီးနောက်မှာ ဆားဘီးယားက သူ့စစ်တပ်ကို အမြင့်ဆုံးသတိပေးချက် အဆင့်မြှင့်ထားကြောင်း ပြောကြားပြီး နာရီပိုင်းအကြာမှာပဲ အခုနောက်ဆုံးဆန္ဒပြမှု လုပ်ဆောင်လာတာပါ။ 

ဆားဗီးယားနိုင်ငံရှိ ဆာ့ဘ်တွေဟာ ကိုဆိုဗိုအရှေ့ပိုင်းနယ်စပ်ရှိ မာဒါးရီ ဖြတ်ကျော်ဂိတ်အနီးမှာ နောက်ဆုံးပေါ် လမ်းပိတ်ဆို့မှု လုပ်ဖို့ ဒီဇင်ဘာ ၂၇ ရက် အင်္ဂါနေ့က ထရပ်ကားနဲ့ ထွန်စက်တွေကို အသုံးပြုခဲ့ကြကြောင်း ဘဲလ်ဂရိဒ်အခြေစိုက် မီဒီယာက အစီရင်ခံပါတယ်။

ဒီအတားအဆီးတွေဟာ ဥရောပမှာ အလုပ်လုပ်နေကြပြီး အားလပ်ရက်မှာ အိမ်ပြန်လာကြမယ့် ကိုဆိုဗိုဇာတိသား ထောင်ပေါင်းများစွာကို တားဆီးထားပါတယ်။ ကိုဆိုဗိုဟာ ဆာဘီးယားကနေ ခွဲထွက်တဲ့နိုင်ငံဖြစ်တာကြောင့် ကိုဆိုဗိုမြောက်ပိုင်းမှာ လူမျိုးအရ ခွဲခြားထားတဲ့ ဆာ့ဘ်လူမျိုး ၅ သောင်းလောက်ဟာ ပရစ္စတီနာမြို့တော် အစိုးရကို ဒါမှမဟုတ် ကိုဆိုဗိုရဲ့အခြေအနေကို အသိအမှတ်ပြုဖို့ ငြင်းဆန်ထားပါတယ်။

သူတို့ကို ဆားဘီးယားရှိ ဆာ့ဘ်အများအပြားနဲ့ သူတို့ရဲ့အစိုးရက ထောက်ခံထားပါတယ်။ ပရစ္စတီနာရှိ အစိုးရဟာ ကိုဆိုဗိုရှိ နေတိုး-ဦးဆောင် နိုင်ငံတကာ ငြိမ်းချမ်းရေးတပ်ဖွဲ့ KFOR ကို အတားအဆီးတွေကို ရှင်းလင်းပေးဖို့ တောင်းဆိုခဲ့ပါတယ်။ ဒါပေမဲ့ KFOR အနေနဲ့ ဆားဘီးယားမြေပေါ်မှာ လုပ်ဆောင်ပိုင်ခွင့် မရှိပါဘူး။