မြို့ရွာတွေကို မီးရှို့ဖျက်ဆီးပြီး ပြည်သူတွေကို အကြမ်းဖက်သတ်ဖြတ်နေတဲ့ စစ်ကောင်စီကို ပံ့ပိုးပေးနေတဲ့  Blood Money သွေးစွန်းငွေတွေ၊ ငွေကြေး‌ထောက်ပံ့မှုတွေ ရပ်တန့်စေရေး ရည်ရွယ်တဲ့ ကမ္ဘာလုံးဆိုင်ရာ သွေးစွန်းငွေဖြတ်တောက်ရေး ဆိုရှယ်မီဒီယာကမ်ပိန်းကို အောက်တိုဘာ ၃၀  ဒီကနေ့ စတင်နေပါတယ်။

အောက်တိုဘာ ၃၀ နဲ့  ၃၁ ရက် ၂ ရက်ကြာပြုလုပ်မယ့် ဒီလှုပ်ရှားမှုမှာ စစ်အုပ်စုကိုငွေကြေးအထောက်အပံ့ပေးနေတဲ့ Total ၊ Chevron အပါအဝင် နိုင်ငံတကာကုမ္ပဏီကြီးတွေကို ဖိအားပေး တောင်းဆိုမှုတွေထပ်မံပြုလုပ်ဖို့၊ ဖက်ဆစ် စစ်တပ် အမြစ်ဖြတ်ဖို့ တဦးချင်းစီပါဝင်ဖို့ကို စည်းရုံးဖိတ်ခေါ်ထားပါတယ်။ 

ဆိုရှယ်မီဒီယာကမ်ပိန်းအနေနဲ့ လက်မှာအနီရောင်ဆေးခြယ်ထားတာ ဒါမှမဟုတ် လက်အိတ် လက်ပတ်အနီ စည်းထားပြီး လက်သုံးချောင်းသင်္ကေတနဲ့အတူ တောင်းဆိုချက် (၃)ခုကို စာရွက်ကိုင်ထားတဲ့ ဓာတ်ပုံကို လူမှုကွန်ရက်ပေါ်မှာ တင်ရမှာ ဖြစ်ပါတယ်။ 

ဒီလှုပ်ရှားမှုရဲ့ အဓိက တောင်းဆိုချက် ၃ ခုကတော့—

Total, Chevron - Freeze all payments to Junta, 

Total, Chevron - Keep all payments  in Escrow Account, 

International governments: Sanction MOGE တို့ဖြစ်ကြပါတယ်။

သွေးစွန်းငွေဖြတ်တောက်ရေး လှုပ်ရှားမှုတွေအနေနဲ့ 'မြန်မာပြည်ကို ကယ်တင်ရေး စစ်ကောင်စီကို ငွေမပေး' စာတန်းပါ ကြွေးကြော်သံတွေနဲ့ မြန်မာပြည်ထဲက မြို့တချို့မှာလည်း သပိတ်မှောက် ဆန္ဒပြမှုတွေ ရှိနေပါတယ်။