ချင်းပြည်နယ်၊ တီးတိန်မြို့နယ်မှာ  နိုဝင်ဘာ ၅ ရက် ဒီနေ့   CDF၊ Zoland-PDF ပူးပေါင်းတပ်ဖွဲ့နဲ့  စစ်ကောင်စီတပ်တွေ တိုက်ပွဲဖြစ်ပွားပြီးတော့ စစ်ကောင်စီဘက်က ၂ ယောက်သေဆုံးကာ တချို့ ဒဏ်ရာရသွားတယ်လို့ CDF(ကလေး၊ကဘော်၊ဂန့်ဂေါ)က ထုတ်ပြန်ပါတယ်။

တီးတိန်မြို့နယ် အာလွယ်ရွာနဲ့ ဆိုဇံရွာကြား ကနေဒီတောင်ခြေနားမှာ ဒီကနေ့  နေ့လယ်  ၃ နာရီခွဲလောက်က CDF(KKG)ရဲ့တပ်ရင်း(၂) ၊  (CDM Siyin)နဲ့ Zoland-PDF တို့ညီနောင်မဟာမိတ်အဖွဲ့နဲ့ စစ်ကောင်စီတပ်တွေ တိုက်ပွဲဖြစ်ခဲ့တာလို့ ဆိုပါတယ်။

ဒါအပြင် အဲဒီတိုက်ပွဲအတွင်းမှာ အကြမ်းဖက်စစ်ကောင်စီတပ်ထံကနေ  သေနတ် ၂ လက်ကိုလည်း သိမ်းဆည်းရမိခဲ့တယ်လို့ ဖော်ပြထားပါတယ်။

တိုက်ပွဲမှာ CDF-KKG နဲ့ Zoland-PDF ညီနောင်မဟာမိတ်တပ်ဖွဲ့ဘက်က တပ်ဖွဲ့ဝင်တစ်ယောက် ကျည်ဆံထိမှန်ဒဏ်ရာရရှိခဲ့ပြီးတော့ မစိုးရိမ်ရဘူးလို့ ဆိုပါတယ်။

မိဘပြည်သူတွေအနေနဲ့ စစ်အာဏာရှင်အမြစ်ပြတ်ခြေမှုန်းရေးအတွက် စစ်ရေးအခြေနေအရ ကလေး-ဂန်ဂေါလမ်းပိုင်းနဲ့ ကလေး-သိုင်းငင်းလမ်းပိုင်းတွေကို ည ၆ နာရီကနေ မနက် ၆ နာရီအတွင်းဖြတ်သန်းသွားလာတာတွေမပြုလုပ်ကြဖို့ သတိပေးထားပါတယ်။