တူနီးရှားနိုင်ငံက အန်နန်ဒါ အစ္စလာမစ် ပါတီရဲ့ ဌာနချုပ်မှာ အမျိုးသား တယောက် ဒီဇင်ဘာ  ၉ ရက်က သူ့ ကိုယ်သူ မီးနဲ့ရှို့ပြီးနောက် သေဆုံးသွားပါတယ်။

ဝန်ကြီးချုပ်ဟောင်း အလီလာရာယက်ဒ် အပါအဝင် ၁၂ ယောက် ဒဏ်ရာရတယ်လို့ တူနီးရှား အရပ်ဖက် ကာကွယ်ရေးအေဂျင်စီနဲ့ တရားရေး အာဏာပိုင်တွေက ပြောပါတယ်။

ဒဏ်ရာရသူတွေထဲမှာ ပါတီရဲ့ အကြီးတန်း အရာရှိ ၂ ယောက်လည်း ပါတယ်လို့ ပါတီဝင်တွေနဲ့ မျက်မြင်သက်သေတွေက ပြောပါတယ်။

ပါတီဝင်တယောက် မီးလောင်သေဆုံးတယ်လို့ ပါတီက ပြောပေမယ့် အသေးစိတ် အချက်အလက်တွေကိုတော့ မပြောခဲ့ပါဘူး။ 

“သေဆုံးသူဟာ ပစ်ပယ်ခံရမှုနဲ့ ဆင်းရဲမွဲတေမှုရဲ့ အာဇာနည်ပဲ အာနာဒါပါတီရဲ့ သားတွေထဲက တယောက်ပဲ သူဟာ တော်လှန်ရေးမတိုင်ခင်က အာဏာရှင်ကို ဆန့်ကျင်ရင်း ထောင်ထဲမှာ ဆယ်နှစ် နေခဲ့ဖူးတယ်” လို့ ပါတီ အကြီးအကဲ ရာချဒ် ဂါနူချီက သတင်းထောက်တွေကို ပြောပါတယ်။ 

သေဆုံးသူဟာ သူ့ အခွင့်အရေးအတွက် အစိုးရဆီက အသိအမှတ်ပြုမှုကို ရခဲ့ပေမဲ့ ဘယ်လို လျော်ကြေးမှ မရဘူးလို့လည်း သူက ဆက်ပြောပါတယ်။

အန်နန်ဒါ အစ္စလာမစ်ပါတီဟာ တူနီးရှားလွှတ်တော်ရဲ့ အကြီးဆုံးပါတီဖြစ်ပြီး ဇူလိုင် ၂၅ ရက်ကမှ သမ္မတက ဆိုင်းငံ့ခဲ့တဲ့ ပါတီလည်း ဖြစ်ပါတယ်။

တူနီးရှားမှာ လွန်ခဲ့တဲ့ ၁၁ နှစ်က လမ်းဘေးစျေးသည်တယောက် သူ့ကိုယ်သူ မီးရှို့ခဲ့တဲ့နောက် အာရပ်ကမ္ဘာမှာ ဒီမိုကရေစီ ပိုရရေး ဆော်ဩတဲ့ အာရပ်နွေဦး တော်လှန်ရေး ပေါ်ပေါက်ခဲ့ပါတယ်။