မြန်မာနိုင်ငံမှာ မတရားအာဏာသိမ်းကာလ ၁၀ လကျော်အကြာ စစ်ကောင်စီတပ်ရဲ့ အကြမ်းဖက် ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူ ၁၃၂၉ ဦး ထိရှိလာပြီလို့ နိုင်ငံရေး အကျဉ်းသားများ ကူညီစောင့်ရှောက်ရေးအသင်း (အေအေပီပီ)က ထုတ်ပြန်ပါတယ်။

ဒီစာရင်းဟာ ပြီးခဲ့တဲ့ ဖေဖော်ဝါရီ ၁ ရက်မှ ဒီဇင်ဘာ ၁၁ ရက်အထိ အေအေပီပီက ကောက် ယူမှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြထားပါတယ်။

နွေဦးတော်လှန်ရေးကာလအတွင်း ၇၉၅၄ ယောက် လက်ရှိချုပ်နှောင်ခံထားရဆဲဖြစ်ပြီး အဲဒီထဲက ၃၈၅ ယောက်ကတော့ ထောင်ဒဏ်ချမှတ်ခံထားရပါတယ်။

ပြစ်ဒဏ်ကျခံရသူတွေထဲက အသက် ၁၈ နှစ်အောက် ကလေး ၂ ယောက်အပါအဝင် ၃၆ ယောက်ကတော့ သေဒဏ်ချမှတ်ခံထားရတယ်လို့ ဆိုပါတယ်။

အမှုဖွင့်ခံထားရပြီး ဖမ်းဝရမ်းထုတ်ခံထားရတဲ့အတွက် တိမ်းရှောင်နေသူ အရေအတွက်ကတော့ ၁၉၆၄ ယောက်ရှိနေပြီး သူတို့ထဲက မျက်ကွယ်သေဒဏ်ချမှတ်ခံထားရသူ ၃၉ ယောက်အပါအဝင် ၁၁၈ ယောက်ဟာ မျက်ကွယ်ပြစ်ဒဏ်ချမှတ်ခံထားရကာ သေဒဏ်ချ မှတ်ခံထားရသူ စုစုပေါင်း ၇၅ ယောက် ရှိခဲ့ပြီဖြစ်ပါတယ်။

ဒီဇင်ဘာလ ၉ ရက်နေ့က စစ်ကိုင်းတိုင်းဒေသကြီး၊ ဒီပဲယင်းမြို့နယ်၊ နဂါးတွင်းကျေးရွာမှာ အင်အား ၁၀၀ လောက်ရှိတဲ့ စစ်ကောင်စီရဲ့ စစ်ကြောင်း တပ်စွဲခဲ့ပြီး ဒီဇင်ဘာ ၁၀ မနက်ပိုင်းမှာ အဆိုပါကျေးရွာက ရွာသား လေးဦးဖြစ်ကြတဲ့ မောင်တိုး၊ မောင်မိုး၊ ဦးကံညွန့်နဲ့ ဦးကျော်ဝင်းတို့ကို လက်နောက်ပြန်ကြိုးတုပ်ကာ ညှဉ်းပန်းနှိပ်စက် သတ်ဖြတ်ခဲ့တယ်လို့ ဆိုပါတယ်။

ဒါ့အပြင် မတ်လ ၂၄ ရက်နေ့ကတည်းက ဖမ်းဆီးခံထားရတဲ့ ရှမ်းပြည်နယ်၊ တောင်ကြီးအခြေစိုက် ကမ္ဘောဇတိုင်းသတင်းဌာန (Kanbawza Tai News) မှ တာဝန်ခံအယ်ဒီတာ နန်းနန်းတိုင်း(ခ)နန်းနွေးနွေးလှိုင်၊ သတင်းထောက် နန်းဝင်းရီ၊ ထုတ်ဝေသူ ကိုတင်အောင်ကျော်နဲ့ သတင်းသမားလို့ စွပ်စွဲခြင်းခံထားသူ သုံးဦးထဲက တစ်ဦးရဲ့ မိသားစုဝင် စိုင်းစည်သူတို့ကို ရာဇသတ်ကြီးပုဒ်မ ၅၀၅(က) နဲ့ ညောင်ရွှေအကျဉ်းထောင်(တောင်လေးလုံးထောင်)တွင်း တရားရုံးမှ ဒီဇင်ဘာလ ၁၀ ရက်နေ့က ထောင်ဒဏ် သုံးနှစ်စီ ချမှတ်ခဲ့တယ်လို့ ဆိုပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူ တွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေစတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရတာတွေနဲ့ ပတ်သက်လို့ နွေဦး တော်လှန်ရေးကာလအတွင်း ကျဆုံးသွားသူတွေရဲ့ အချက်အလက်တွေကို သိရှိပါက အေ အေပီပီကို ဆက်သွယ်အသိပေး အကြောင်းကြားနိုင်ပါတယ်။

ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ် နဲ့ အဖမ်းအဆီးအချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။