ဗြိတိန်နိုင်ငံဟာ ကိုရိုနာဗိုင်းရပ်စ်ရဲ့ အိုမီခရွန်ဗီဇမျိုးကွဲ ကူးစက်မှုလှိုင်းကို ရင်ဆိုင်နေရပြီး ကာကွယ်ဆေး ထိုးဆေး ၂ လုံးက ထိန်းချုပ်ဖို့ လုံလောက်မှာမဟုတ်ဘူးလို့ ဝန်ကြီးချုပ် ဘောရစ်ဂျွန်ဆင်က ဒီဇင်ဘာ ၁၂ ရက်မှာ ပြောလိုက်ပါတယ်။

ကာကွယ်ဆေးအာနိသင် မြှင့်တင်ပေးတဲ့ ထိုးဆေးထိုးနှံရေး အစီအစဉ်ကိုလည်း သူက အရှိန်မြှင့်ခဲ့ပါတယ်။

ဗြိတိန်အစိုးရ သိပ္ပံပညာရှင်တွေက ကိုဗစ်-၁၉ ကပ်ရောဂါကူးစက်မှု တပ်လှန့်သတိပေးချက် အဆင့်ငါးဆင့်ရှိတဲ့ စနစ်မှာ အဆင့်လေးထိ မြှင့်တင်လိုက်အပြီး နာရီပိုင်းအတွင်း ဝန်ကြီးချုပ်က ခုလို ပြောလိုက်တာပါ။

အိုမီခရွန် ဗီဇမျိုးကွဲက တခြား မျိုးကွဲတွေထက်ပိုပြီး ပြင်းထန်မှု နည်းလားဆိုတာ သိပ္ပံပညာရှင်တွေက မသိသေးလို့ ဆေးအာနိသင်မြှင့်တင်ဆေး ထိုးနှံရေး အစီအစဉ်တွေကို ပိုမြန်မြန် လုပ်ရမယ်လို့ ဆိုပါတယ်။

အိုမီခရွန်မျိုးကွဲဟာ ပိုကူးစက်လွယ်ပြီး ကူးစက်လှိုင်း ဖြစ်လာခဲ့ရင် ဆေးရုံတက် ကုသရမယ့် လူနာများလို့ အမျိုးသားကျန်းမာရေးဌာနက ရုန်းကန်ရင်ဆိုင်ရမယ်ဆိုတာ သိပ္ပံပညာရှင်တွေက သိပြီးပြီလို့လည်း သူက ဆက်ပြောပါတယ်။

အင်္ဂလန်မှာ အသက် ၁၈ နှစ်အထက် အကျုံးဝင်တဲ့လူတိုင်း နှစ်သစ်ကူး မတိုင်ခင် ကာကွယ်ဆေး အာနိသင် အရှိန်တင်တဲ့ ထိုးဆေးကို ထိုးနှံကြဖို့ အခွင့်အရေး ရှိလိမ့်မယ်လို့လည်း ဗြိတိန် ဝန်ကြီးချုပ်က ပြောခဲ့ပါတယ်။