G7 နိုင်ငံခြားရေးဝန်ကြီးများ အစည်းအဝေး ဗြိတိန်က အိမ်ရှင်အဖြစ်ကျင်းပ
3
ကမ္ဘာ့အချမ်းသာဆုံးနိုင်ငံတွေရဲ့ နိုင်ငံခြားရေးဝန်ကြီးတွေဟာ ဗြိတိန်နိုင်ငံက အိမ်ရှင်အဖြစ် လက်ခံကျင်းပတဲ့ G7 ဂျီဆဲဗင်း အစည်းအဝေးမှာ တွေ့ဆုံဆွေးနွေးနေကြပါတယ်။
အစည်းအဝေးကို အမေရိကန်နိုင်ငံခြားရေးဝန်ကြီး အန်တိုနီ ဘလင်ကန်နဲ့ ပြင်သစ်၊ အီတလီ၊ ဂျာမနီ၊ ဂျပန်၊ ကနေဒါတို့က နိုင်ငံခြားရေး ဝန်ကြီးတွေလည်း တက်ရောက်နေကြပါတယ်။
လတ်တလောမှာ ရုရှားက ယူကရိန်းကို ကျူးကျော်တော့မလားဆိုတဲ့ နိုင်ငံတကာ စိုးရိမ်မှုတွေ မြင့်တက်နေချိန်မှာ ဂျီဆဲဗင်းဝန်ကြီးတွေ တွေ့ဆုံကြတာပါ။
ပုံမှန်အစည်းအဝေး မတိုင်ခင်မှာ ဗြိတိန်နိုင်ငံခြားရေးဝန်ကြီးနဲ့ အမေရိကန် နိုင်ငံခြားရေး ဝန်ကြီးတို့ တွေ့ဆုံပြီး ယူကရိန်းနယ်စပ်မှာ ရုရှားတပ်တွေ တိုးမြှင့်ချထားတဲ့ ကိစ္စကို ဆွေးနွေးခဲ့ကြတယ်လို့ ဗြိတိန် နိုင်ငံခြားရေးရုံးက သတင်းထုတ်ပြန်ထားပါတယ်။
