အိန္ဒိယနိုင်ငံ၊ ကက်ရှ်မီးယားဒေသရှိ ဟိန္ဒူဘုရား‌ကျောင်းတခုမှာ နှစ်သစ်ကူးအထိမ်းအမှတ် ဗိဿနိုးဒေဝဗိမာန်ကို လာရောက် ဝတ်ပြုဆုတောင်းတဲ့သူတွေကြား လူအုပ်ပြိုလဲမှုကြောင့် အနည်းဆုံး ၁၂ ဦး သေဆုံးခဲ့ပါတယ်။ 

တိုးကြိတ်နေတဲ့ ဝတ်ပြုသူတွေအချင်းချင်း တက်နင်းမိခဲ့တာဖြစ်ပြီး၊ ဒဏ်ရာရသူ အများအပြားကို အနီးအနားရှိ ဆေးရုံတွေ ခွဲပို့ထားတယ်လို့ ပြည်နယ်ရဲအရာရှိက ပြောပါတယ်။

မျက်မြင်တွေ့ခဲ့တဲ့ ဘုရားဖူးတဦးကတော့ ရဲတွေက လူအုပ်ကို တုတ်နဲ့ အတင်းခြောက်လှန့်တာကြောင့် လူတွေ လန့်ဖျန့်ပြီး တိုးဝှေ့ရင်း နင်းမိတာလို့ ပြောပါတယ်။

ဝန်ကြီးချုပ် နရန်ဒရာ  မိုဒီက  ဗိဿနိုးဒေဝဗိမာန်မှာ အခုလို အသက်ဆုံးရှုံးရတာ နှစ်သစ်အတွက် အလွန် စိတ်မကောင်းဖြစ်ရတယ်လို့ ဝမ်းနည်းစကား ပြောခဲ့ပါတယ်။