ကရင်ပြည်နယ်၊ ဖာပွန်(မူတြော်)ခရိုင်၊ ကေအန်ယူ တပ်မဟာ ၅ နယ်မြေ ၊ သေကော်ထကျေးရွာမှာ ဇန်နဝါရီ ၃၀ ရက် ညပိုင်းက စစ်ကောင်စီတပ်က လေကြောင်းကနေ  ဗုံးကြဲတိုက်ခိုက်ခဲ့တယ်လို့ ဒေသခံတွေဆီက သိရပါတယ်။

ဇန်နဝါရီ ၂၉ ရက်က စစ်ကောင်စီရဲ့ အုပ်ချုပ်ရေးယန္တရား လည်ပတ်နေတာတွေ ရပ်တန့်ဖို့  အရပ်ဘက်ဆိုင်ရာဌာနအသီးသီးက ဝန်ထမ်းတွေအနေနဲ့ မိမိတို့နေရပ်ကို ပြန်လည်ထွက်ခွာဖို့  ဖေဖော်ဝါရီ ၁၀ ရက် နောက်ဆုံးထားပြီး  ရေလမ်းခရီးကနေ အတားအဆီးမရှိ ထွက်ခွာပေးဖို့ တပ်မဟာ ၅ စစ်ရုံးချုပ်က အသိပေးထုတ်​ပြန်ပြီးနောက် လေကြောင်းကနေ ဗုံးကြဲ တိုက်ခိုက်ခဲ့တာပါ။

လေကြောင်းကနေ ဗုံးကြဲပစ်ခတ်တိုက်ခိုက်ခဲ့ရာမှာ ရွာသူ ရွာသားတွေ  ထိခိုက်မှု မရှိပေမဲ့  လူနေအိမ် ၂ လုံး ပျက်စီးသွားခဲ့တယ်လို့ ဒေသခံတွေက ဆိုပါတယ်။

သေကော်ထကျေးရွာသားတစ်ဦးက “ညဘက်ကြီး လေယာဥ်နဲ့ လာပြီး ဗုံးကြဲတိုက်ခိုက်တာ။ ကံကောင်းလို့ ရွာကလူတွေ မထိခိုက်တာ။ နေအိမ် ၂ လုံးတော့ ပျက်စီးသွားတယ်။ နောက်ထပ် လာပစ်မှာကြောက်တာနဲ့ ရွာက ကလေးလူကြီးအားလုံး နီးစပ်ရာတောတွေထဲ ထွက်ပြေးခဲ့ရတယ်” လို့ ဆိုပါတယ်။

ဖာပွန်ခရိုင်မှာ နယ်မြေကျူးကျော်ဝင်ရောက်လာတဲ့ စစ်ကောင်စီရဲ့တပ်တွေနဲ့ KNLA တပ်တို့တိုက်ပွဲဖြစ်ပွားခဲ့ရာမှာ စစ်ရေးအရ အရေးနိမ့်နေတဲ့ စစ်ကောင်စီရဲ့တပ်တွေကို စစ်ကူပေးတဲ့အနေနဲ့ လေကြောင်းကနေ ဗုံးကြဲတိုက်ခိုက်တာလို့ စစ်ဘေးရှောင်အရေး အကူအညီပေးနေသူတွေက ဆိုပါတယ်။

​တပ်မဟာ ၅ နယ်မြေမှာ ပြီးခဲ့တဲ့သီတင်းပတ်တွေကလည်း စစ်ကောင်စီတပ်တွေက လက်နက်ကြီး ပစ်ခတ်မှုတွေအပြင် လေကြောင်းကပါ လေယာဉ်နဲ့ ဗုံးကြဲတိုက်ခိုက်ခဲ့တဲ့အတွက် ဒေသခံတချို့ လက်နက်ကြီးကျည် ထိမှန်ပြီး နေအိမ်တွေပါ ပျက်စီးခဲ့ပါတယ်။

ဒါ့အပြင်  နေထိုင်စားသောက်ရေးအတွက် မိမိတို့ပိုင် ဥယျာဥ်ခြံလုပ်ငန်းတွေ စွန့်ပစ်ခဲ့ရာသလို မြေမြှုပ်မိုင်းအန္တရာယ်ကိုပါ စိုးရိမ်နေကြရတာပါ။ ကရင်ပြည်နယ်အတွင်းမှာ  တိုက်ပွဲတွေကြောင့် သောင်းနဲ့ချီတဲ့ ဒေသခံတွေဟာ နေရပ်စွန့်ခွာ ထွက်ပြေး တိမ်းရှောင်နေရပါတယ်။