စစ်အာဏာသိမ်း ၁ နှစ်ပြည့် ဖေဖော်ဝါရီ ၁  ရက် မနက် ၇  နာရီဝန်းကျင်က မန္တလေးမြို့ အောင်မြေသာစံမြို့နယ် ကျုံးဘေး ၁၂ လမ်း ၊ ၇၆ လမ်း နဲ့ ၇၇ လမ်းကြားမှာ ဗုံးပေါက်ကွဲမှု ဖြစ်ခဲ့ပါတယ်။

အဝေးထိန်း လက်လုပ်မိုင်းပေါက်ကွဲတာဖြစ်ပြီး ဗုံးပေါက်ကွဲမှုကြောင့် ထိခိုက်ဒဏ်ရာရတာနဲ့ ပျက်စီးမှုမရှိဘူးလို့ ဒေသခံတွေက ပြောပါတယ်။

ဒါ့အပြင် ချမ်းမြသာစည်မြို့နယ် မနော်ဟရီလမ်း၊ ၅၅ လမ်းနဲ့ ၅၆ လမ်းကြား တံတားဖြူတံတားပေါ်မှာလည်း မနက် ၈ နာရီဝန်းကျင်က မပေါက်ကွဲသေးတဲ့ ဗုံးတလုံး တွေ့ရှိခဲ့ပါတယ်။

“မနက်ကတော့ မနော်ဟရီလမ်းပေါ် ၅၅ လမ်းကနေ ၅၇ လမ်းအထိ လမ်းပိတ်ထားတာ။ ဖြတ်မယ့်သူတွေလည်း ပြန်လှည့်ခိုင်းတယ်။ အခုတော့ ရှင်းပြီးပြီထင်တယ်။” လို့ ချမ်းမြသာစည်မြို့နယ်နေ ပြည်သူတဦး က ပြောပါတယ်။

မန္တလေးမြို့မှာ ဖေဖော်ဝါရီ ၁ ရက် အသံတိတ်သပိတ်ကို ဟန့်တားဖို့  စစ်ကောင်စီက ဈေးဆိုင်တွေ ဖိအားပေးဖွင့်ခိုင်းပေမယ့် လမ်းတွေမှာ လူမစည်ဘဲ ဖြစ်နေပြီး အသံတိတ်သပိတ်မှာ ပြည်သူအများပါဝင်ကြကာ လမ်းတွေပေါ်မှာ လူရှင်းနေပါတယ်။