အမျိုးသမီးတွေရဲ့ လူ့အခွင့်အရေးကို အသိအမှတ်မပြုရင် တာလီဘန်အစိုးရကို နိုင်ငံတကာက သံတမန်ဆိုင်ရာအသိအမှတ် မပြုသင့်ဘူးလို့  ငြိမ်းချမ်းရေးနိုဘယ်ဆုရှင် မာလာလာ ယူဆပ်ဖ်ဇိုင်ယာ က  ပြောလိုက်ပါတယ်။ 

စနေနေ့ကကျင်းပတဲ့  ကာတာနိုင်ငံ နိုင်ငံတကာဒိုဟာဖိုရမ်မှာ မာလာလာက “ကျမတို့ အကောင်းမြင်ကြည့်နေပါတယ်။ ကျောင်းတွေ မကြာခင်ပြန်ဖွင့်ရင် မိန်းကလေးတွေ ကျောင်းယူနီဖောင်းဝတ် ခွင့်ရမလား၊ ဒါမှမဟုတ် ကျောင်းအပြင်မှာ ငိုနေကြရမလား ခဏစောင့်ကြည့်ကြပါ။ ဒါဟာ ညှိနှိုင်းနေရမယ့် အခြေအနေ မဟုတ်ပါဘူး။ တာလီဘန်တွေက အမျိုးသမီးတွေနဲ့ မိန်းကလေးတွေရဲ့ လူ့အခွင့်အရေးကို အသိအမှတ်မပြုရင် သူတို့ကို သံတမန်ရေး အသိအမှတ်မပြုကြပါနဲ့” လို့ ပြောခဲ့တာပါ။ 

အာဖဂန်နိုင်ငံဆိုင်ရာ အမေရိကန်ကိုယ်စားလှယ်ကတော့ လာမယ့်ရက်ပိုင်းအတွင်း မိန်းကလေးတွေရဲ့ ပညာရေးနဲ့ ပတ်သက်ပြီး တာလီဘန်အစိုးရက အပြောင်းအလဲ အချိုးအကွေ့ ပြုလုပ်လာနိုင်တယ်လို့ အကောင်းမြင်ပါတယ်။