ဗီယက်နမ်နိုင်ငံမှာ လာမယ့် ဧပြီလက စတင်ကာ အသက် ၅ နှစ်ကနေ ၁၁ နှစ်ကြား ကလေးငယ်တွေကို ကိုဗစ်-၁၉ ကာကွယ်ဆေး စတင်ထိုးပေးတော့မယ်လို့ သိရပါတယ်။

ခုလိုထိုးနှံမှုကိုတော့ ဩစတေးလျအစိုးရက လှူဒါန်းထားတဲ့ Pfizer နဲ့ Moderna အမျိုးအစား ကိုဗစ်-၁၉ ကာကွယ်ဆေး ၁၃ ဒသမ ၇ သန်းကို အသုံးပြုသွားမှာဖြစ်တယ်လို့ ထိုင်းနိုင်ငံထုတ် သည်နေးရှင်းသတင်းမှာ ဖော်ပြပါတယ်။

အမျိုးသားကာကွယ်ဆေးထိုးနှံမှု တိုးချဲ့အစီအစဉ် (အီးပီအိုင်) ကတော့ ကျန်းမာရေးဝန်ကြီးဌာနအနေနဲ့ ကလေးငယ်တွေ ကာကွယ်ဆေးထိုးလုပ်ငန်းတွေအတွက် ဗီယက်နမ်နိုင်ငံဆိုင်ရာ သြစတြေးလျသံရုံးနဲ့ ပြီးခဲ့တဲ့ မတ် ၂၂ ရက်က အလုပ်သဘော တွေ့ဆုံဆွေးနွေးခဲ့ပြီးဖြစ်တယ်လို့ ဆိုပါတယ်။

တွေ့ဆုံဆွေးနွေးမှု လုပ်ငန်းစဉ်တွေအပြီး ပထမအသုတ် ပို့ဆောင်မှုမှာတော့ Pfizer ကိုဗစ်-၁၉ ကာကွယ်ဆေး ၇ သိန်းနဲ့ လာမယ့် ဇူလိုင်မှာ သက်တမ်းကုန်မယ့် Moderna ကိုဗစ်-၁၉ ကာကွယ်ဆေး ၉ သန်း၊ စုစုပေါင်း ၉ ဒသမ ၇ သန်း ရောက်ရှိလာမှာ ဖြစ်ပြီး လာမယ့် ဧပြီလဆန်းမှာ ဗီယက်နမ်နိုင်ငံကို ရောက်ရှိလာမယ်လို့ ဆိုပါတယ်။

ကာကွယ်ဆေး ဒုတိယအသုတ်မှာတော့ ယူနီဆက်ဖ်ကတဆင့် ဩစတေးလျအစိုးရက လှူဒါန်းတဲ့ Pfizer ကိုဗစ်-၁၉ ကာကွယ်ဆေး ၄ သန်း ရောက်ရှိလာမယ်လို့ ဆိုပါတယ်။

ဩစတေးလျကတော့ သူတို့အနေနဲ့ ဒီကာကွယ်ဆေးတွေကို မကြာခင်မှာ အသုံးပြုဖို့ခွင့်ပြုချက်ပေးဖို့ ကျန်းမာရေးဝန်ကြီးဌာနအတွက် လိုအပ်တဲ့ စာရွက်စာတမ်းတွေ ပံ့ပိုးပေးမှာဖြစ်ပြီး သယ်ယူပို့ဆောင် စရိတ် အပါအဝင် အားလုံးကို တာဝန်ယူသွားမှာဖြစ်တယ်လို့ ပြောပါတယ်။

အခုမတ်လထဲမှာတော့ နိုင်ငံတဝန်းက ကျန်းမာရေးဝန်ထမ်းတွေကို ကလေးသူငယ်တွေ ကာကွယ်ဆေးထိုးနှံခြင်းဆိုင်ရာ သင်တန်းတွေစီစဉ်ပြီး ဒေသဆိုင်ရာအာဏာပိုင်တွေကိုလည်း ကာကွယ်ဆေးထိုးနှံမှု ဆိုင်ရာ အစီအစဉ်တွေနဲ့ ပတ်သက်တဲ့ လမ်းညွှန်ချက်တွေ ပေးနေတယ်လို့ ဆိုပါတယ်။

ဗီယက်နမ်နိုင်ငံမှာတော့ လက်ရှိအချိန်ထိ အသက် ၁၂ နှစ်နဲ့အထက် ကာကွယ်ဆေးထိုးနှံမှုတွေ ပြီးမြောက်ခဲ့ပြီး ပထမသုံးလပတ်အတွင်း အရွယ်ရောက်ပြီးသူတွေကို Booster Shots ထပ်ဆောင်းထိုးနှံပေးဖို့ ရည်ရွယ်ထားတယ်လို့ ဆိုပါတယ်။

ဒါ့အပြင် နိုင်ငံတဝန်း လူဦးရေ ၉၈ သန်းအတွက် ကာကွယ်ဆေး ၂၀၅ သန်းထိ ထိုးနှံပေးပြီးဖြစ်ကာ အသက် ၁၈ နှစ်နဲ့အထက် Booster Shots ထိုးနှံပြီးသူ ၃၈ သန်းနီးပါး ရှိခဲ့ပြီလို့ ဆိုပါတယ်။