တရုတ်ထောက်လှမ်းရေး သင်္ဘောတစီးကို ဩစတြေးလျနိုင်ငံ အနောက်ဘက် ကမ်းရိုးတန်းရဲ့ ကမ်းလွန်ပင်လယ်ပြင်မှာ ထောက်လှမ်းတွေ့ရှိရပြီး ဒါဟာ တရုတ်အစိုးရရဲ့ ရန်လိုတဲ့ လုပ်ရပ်ကို ရည်ညွှန်းနေတယ်လို့ ဩစတြေးလျကာကွယ်ရေးဝန်ကြီး ပီတာဒတ်တွန်က ပြောပါတယ်။

သူလျှိုသင်္ဘောဟာ ဩစတြေးလျ၊ အမေရိကန်နဲ့ မဟာမိတ်တွေရဲ့ ရေငုပ်သင်္ဘောတွေက သုံးနေ တဲ့ အိက်စ်မောက်သ်မြို့က  အဲရော့ဒ် အီဟော့ထ် ရေတပ်ဆက်သွယ်ရေး စခန်းကို ဖြတ်သန်း ခုတ်မောင်းခဲ့လို့ အရင်အပတ်က ဩစတြေးလျအစိုးရက ခြေရာခံ လိုက်ခဲ့တာပါ။

“သူလျှိုသင်္ဘောဟာ နိုင်ငံတောင်ပိုင်းကို ရောက်ခါနီးလာလို့ ဒါဟာ တော်တော်လေးကို ရန်လိုတဲ့ လုပ်ရပ်လို့ ထင်တယ်” လို့ ပါ့သ်မြို့မှာ ကျင်းပတဲ့ သတင်းစာရှင်းလင်းပွဲအတွင်း ဩစတြေးလျကာကွယ်ရေးဝန်ကြီး ပြောခဲ့တာလို မေ ၁၇ ရက်နေ့ ရိုက်တာသတင်းမှာ ဖော်ပြပါတယ်။

ဩစတြေးလျအစိုးရဟာ မေ ၂၁ ရက်မှာ ပြည်လုံးကျွတ် ရွေးကောက်ပွဲကို ကျင်းပတော့မှာပါ။

တရုတ်ရဲ့ နိုင်ငံလုံခြုံရေး ခြိမ်းခြောက်မှု စွဲချက်တွေဟာ အကြီးစား မဲဆွယ်စည်းရုံးရေး ဆောင်ပုဒ် ဖြစ်နေခဲ့ပါတယ်။

ဩစတြေးလျနိုင်ငံဆိုင်ရာ တရုတ်သံရုံးကတော့ မှတ်ချက်အတွက် တောင်းဆိုချက်ကို မတုံ့ပြန်သေးပါဘူး။