ရန်ကုန်၊ အလုံမြို့နယ်၊ သစ်တောရပ်ကွက်၊ ကမ်းနားလမ်းနဲ့ အလုံလမ်းထောင့်မှာ တည်ရှိတဲ့ Sky Way Club & KTV မှာ ဇွန် ၂၉ ရက် ည ၁၀ နာရီခွဲလောက်က  မီးလောင်မှုဖြစ်ပွားခဲ့ပါတယ်။

အဆိုပါမီးလောင်မှုကို အလုံမြို့နယ် မီးသတ်စခန်းက Level 2 ယာဉ်အုပ်စုတွေ ထွက်ခွာမီးငြှိမ်းသတ်ခဲ့ပြီး ၁၀ နာရီ မိနစ် ၄၀ မှာ  မီးထိန်းနိုင်ကာ ည ၁၁ နာရီမှာ မီးငြိမ်းသွားခဲ့တယ်လို့မြန်မာနိုင်ငံ မီးသတ်တပ်ဖွဲ့က ထုတ်ပြန်ထားပါတယ်။

အဆိုပါ Sky Way Club & KTV ဟာ ပြည်သူတွေ သပိတ်မှောက်ထားခဲ့ကြတဲ့ စစ်တပ်ထုတ်ကုန်တွေ ရောင်းချတာ၊ စစ်အုပ်စုနဲ့ နီးစပ်မှုတွေကြောင့် ပြီးခဲ့တဲ့ မတ်လတုန်းက မြို့ပြပြောက်ကျားအဖွဲ့တဖွဲ့ဖြစ်တဲ့ Dark Shadow အဖွဲ့က ဗုံးဖောက်သတိပေးခံခဲ့ရဖူးပါတယ်။

လတ်တလောမှာတော့ ဒီမီးလောင်မှုသတင်းနဲ့ ပတ်သက်ပြီးတော့ လူမှုကွန်ရက်စာမျက်နှာတွေပေါ် မှာ ဓာတ်ပုံတွေ၊ ရုပ်သံတွေ မျှဝေမှုတွေနဲ့အတူ ဝေဖန်မှုတွေလည်း မြင့်တက်နေပြီး  လတ်တလောမှာတော့ မီးလောင်ရတဲ့ အကြောင်းရင်းနဲ့ ပျက်စီးဆုံးရှုံးမှုပမာဏကို မသိရသေးပါဘူး။