ဘရာဇီးနိုင်ငံ အမေဇုံတောထဲမှာ တိုင်းရင်းသားရေးရာ ပညာရှင် ဘရူနိုပရေးရာနဲ့ ဗြိတိန် သတင်းထောက် ဒွန်ဖီးလစ်တို့ အသတ်ခံရတဲ့အမှုမှာ မူးယစ်ဆေးဝါး ရောင်းဝယ်ဖောက်ကားမှုက အခန်းကဏ္ဍတရပ်အနေနဲ့ ပတ်သက်နိုင်တယ်လို့ ဘရာဇီးသမ္မတ ယိုင်းဘော့စိုနာရိုက ဇွန် ၂၆ ရက်က ပြောပါတယ်။

သူတို့နှစ်ယောက်ထဲက တယောက်က ပီရူးနိုင်ငံကနေ မူးယစ်ဆေးဝါးတွေ ကုန်ကူးနေတယ်လို့ အသေးစိတ်ရော အထောက်အထားပါ မပါဘဲ ဘော့စ်ဆိုနာရိုက ပြောလိုက်တာပါ။

ရီယိုဒီဂျနေရို မြို့နားက နီတေရွိုင်မြို့မှာ သတင်းထောက်ဖီးလပ်ရဲ့ ဈာပနအခမ်းအနားကျင်းပတဲ့ နေ့မှာပဲ သမ္မတက   ယူကျူအစီအစဉ်  4x4 နဲ့ လူတွေ့ မေးမြန်းခန်းမှာ ခုလို ပြောလိုက်တာလည်း ဖြစ်ပါတယ်။

ဖိလစ်ဟာ ဂါးဒီးယန်းနှင့် ဝါရှင်တန်ပို့စ်သတင်းဌာနတွေအတွက် သတင်းရေးသားခဲ့တဲ့ အလွတ်သတင်းထောက်တယောက်ပါ။

သူဟာ ပြည်ထောင်စုဌာနေတိုင်းရင်းသားရေးရာ အေဂျင်စီ ဖှုနိုင်းက အကြီးတန်းအရာရှိဟောင်း ဘရူနိုပရေးရာနဲ့အတူ စာအုပ်တစ်အုပ်အတွက် သုတေသနလုပ်နေခဲ့ ပါတယ်။

သူတို့နှစ်ယောက်ဟာ ပီရူးနှင့် ကိုလံဘီယာ နှစ်နိုင်ငံ နယ်နိမိတ်ချင်း ထိစပ်နေတဲ့ ဝေးလံခေါင်သီတဲ့ ဒေသဖြစ်တဲ့ ဂျာဗာရီ တောင်ကြားကိုဖြတ်ပြီး လှေနဲ့ခရီးသွားနေတုန်း ဇွန် ၅ ရက်က ပျောက်ဆုံးသွားခဲ့တာပါ။

တံငါသည်တယောက်က သူတို့ နှစ်ဦးကို သတ်ခဲ့တယ်လို့ ဝန်ခံခဲ့ပါတယ်။ သူတို့နှစ်ဦးစလုံးကို အမဲလိုက် ကျည်ဆန်တွေနဲ့ ပစ်သတ်ခဲ့တာလို့ ရဲတပ်ဖွဲ့က ပြောထားပါတယ်။