စစ်ကိုင်းတိုင်း၊ ကသာခရိုင်ထဲက၊ အင်းတော်-ဗန်းမောက်ကားလမ်းပိုင်းကို ဩဂုတ် ၂၇ ရက် ဒီနေ့ မွန်းတည့် ၁၂ နာရီအချိန်မှာ ပြန်လည်ဖွင့်လှစ်ပေးမှာဖြစ်တယ်လို့ Indaw Revolution-IR အဖွဲ့က ထုတ်ပြန်ပါတယ်။

Indaw Revolution-IR အဖွဲ့တာဝန်ရှိသူက "ပြည်သူ့ကာကွယ်ရေးတပ်ဖွဲ့တွေ ချမှတ်ထားတဲ့ စည်းကမ်းချက်တွေကိုတော့ လိုက်နာပေးကြပါ။ အခြေခံလူသုံးကုန်၊ စားသုံးကုန်ပစ္စည်းတွေကို သယ်ယူပို့ဆောင်တဲ့ ကုန်တင်ကားတွေ သွားလာခွင့်ရှိပြီး ခရီးသည်တင်ကားတွေ လုံးဝသွားလာ ခွင့်မပြုသေးပါဘူး။ သွားလာလိုပါက ဆိုင်ကယ်နဲ့ သွားလာနိုင်မှာဖြစ်ပြီး စစ်ဆေးမယ်ဆိုပါက စစ်ဆေးခံပြီးမှသာ ဖြတ်သန်းသွားလာရမှာဖြစ်ပါတယ်" လို့ ပြောပါတယ်။

ဘယ်ယာဉ်မဆို ည ၇ နာရီမှ မနက် ၆ နာရီအထိ ဖြတ်သန်း‌မောင်းနှင် သွားလာတာ မလုပ်ဖို့ ထုတ်ပြန်ချက်မှာ ရေးသားဖေါ်ပြထားပါတယ်။

ဗန်းမောက်ဘက်ရှိ စစ်ကောင်စီတပ်ကို လက်နက်ပို့တဲ့လမ်းကြောင်းက အင်းတော်-ဗန်းမောက် လမ်း တခုတည်းရှိတာမို့ ဒေသတွင်း တော်လှန်ရေးအဖွဲ့တွေအနေနဲ့ ကန့်သတ်ချက်တွေ ထုတ်ရတာကို ပြည်သူတွေအနေနဲ့ နားလည်ပေးကြဖို့လည်း ပန်ကြားထားပါတယ်။

စစ်ကောင်စီတပ်ဟာ ဇွန်လလယ်ကစလို့ စစ်ကိုင်းတိုင်း အင်းတော်နဲ့ဗန်းမောက်ဘက်ကို စစ်ကြောင်း ထိုးလာတဲ့အပြင် ရိက္ခာသယ်ယူတာတွေ လုပ်လာတာကြောင့်  ခရီးသွားနဲ့ဒေသခံတွေ အဲဒီလမ်းကို အသုံးမပြုဖို့   Indaw Revolution-IR  က ခရီးသွားသတိပေးချက်တွေကို ဇွန်နဲ့ ဇူလိုင်လအတွင်းမှာ ထုတ်ပြန်ခဲ့တာပါ။