ထိုင်းနိုင်ငံမှာ လက်ရှိရောင်းချနေတဲ့ထီအပြင် နောက်ထပ် ဂဏန်း ၆ လုံးတွဲနဲ့ ၃ လုံးတွဲထီကိုပါ ဖွင့်လှစ်ရောင်းချဖို့ စီစဉ်နေပြီး မရောင်းခင် ပြည်သူ့ဆန္ဒသဘောထားစစ်တမ်း ကောက်ယူရာမှာ အများစုက သဘောတူကြတယ်လို့ khaosod ထိုင်းသတင်းမှာ ဖော်ပြပါတယ်။

ထီလက်မှတ်ကို သတ်မှတ်ဈေးထက် ပိုရောင်းတဲ့ ပြဿနာနဲ့ တရားမဝင်ထီပြဿနာကို ဖြေရှင်းဖို့ ဂဏန်း ၆ လုံးတွဲ (L6) နဲ့ ၃ လုံးတွဲ (N3) ပုံစံသစ် ထီလက်မှတ်ရောင်းချဖို့ လွန်ခဲ့တဲ့ ၃ လလောက်က စီစဉ်ထားပြီး လက်တွေ့အကောင်အထည်မဖော်ခင် ထီဝယ်သူတွေရဲ့ ဆန္ဒသဘောထားတွေ အရင် စစ်တမ်းကောက်ခဲ့တယ်လို့ ဝန်ကြီးများရုံး လက်ထောက်ဝန်ကြီးနဲ့ ထီနဲ့ပတ်သက်တဲ့ ကောင်းကျိုး ဆိုးကျိုး လေ့လာသုံးသပ်ဖြေရှင်းရေး ဆပ်ကော်မတီဥက္ကဋ္ဌ  နိုင်းချန်းကရစ် တေဝစ်တတ်က စက်တင်ဘာ ၁ ရက်မှာ သတင်းထောက်တွေကို ပြောပါတယ်။

ထီဝယ်သူတွေရဲ့ အမြင်သဘောထားတွေကို တွေ့ဆုံပွဲတွေကလည်းကောင်း၊ မေး/ဖြေလွှာလုပ်ပြီး အွန်လိုင်းပေါ်ကနေ ကောက်ခံတာ၊ စာတိုက်ပုံးကနေတဆင့် ကောက်ခံတာ၊ လူကိုယ်တိုင် တွေ့ဆုံမေးမြန်းတာ စတဲ့ပုံစံအမျိုးမျိုးနဲ့ စစ်တမ်းကောက်ခဲ့ရာမှာ အများစုက ထီပုံစံသစ်ကို သဘောတူတယ်လို့ သူကဆက်ပြောပါတယ်။

ထီလက်မှတ်ပုံစံသစ် ရောင်းချခြင်းအားဖြင့် သတ်မှတ်ဈေးနှုန်းထက် ပိုရောင်းတဲ့ပြဿနာ၊ တရားမဝင် ထီရောင်းဝယ်မှုပြဿနာ ဖြေရှင်းနိုင်မယ်လို့ ယုံကြည်ကြောင်း၊ တရားမဝင် ရောင်းဝယ်နေတဲ့ ငွေတွေဟာ အစိုးရဆီ ရောက်လာမှာဖြစ်ပြီး အဲဒီငွေတွေနဲ့ ဆင်းရဲမွဲတေမှု လျှော့ချရေးနဲ့ လူမှုဘဝ မြှင့်တင်ပေးနိုင်မယ်လို့ ယုံကြည်ကြောင်း၊ ထီရောင်းရငွေအများစုဟာ ဝင်ငွေနည်းတဲ့ လူတန်းစားတွေဆီကလာလို့ အဲဒီငွေတွေဟာ ဆင်းရဲနွမ်းပါးသူတွေ၊ မသန်စွမ်းသူတွေရဲ့ လူမှုဘဝ မြှင့်တင်ရေးမှာ ပြန်လည်သုံးစွဲဖို့ဖြစ်တယ်လို့ ဆိုပါတယ်။

၆ လုံးတွဲ ထီလက်မှတ်ကို ၁ စောင် ဘတ် ၈၀ နဲ့ရောင်းချဖို့၊ စာရွက်အနေနဲ့ရော ဒစ်ဂျစ်တယ်လ်အနေနဲ့ပါ ပုံစံ ၂ မျိုးနဲ့ ရောင်းချဖို့ အဆိုပြုကြကြောင်း၊ ဒစ်ဂျစ်တယ်လ် ၁ မျိုးတည်းဆိုရင် ထီရောင်းသမားတွေကို ထိခိုက်နိုင်ကြောင်း၊ သက်ကြီးရွယ်အိုတချို့နဲ့ ကျေးလက်ဒေသ လူတန်းစားတွေလည်း ဒစ်ဂျစ်တယ်လ်စနစ်ကို အလှမ်းမမီသေးဘူးလို့ ဆိုကြပါတယ်။

ဂဏန်း ၃ လုံးတွဲထီကို ထောက်ခံရတဲ့အကြောင်းက ဝယ်သူအနေနဲ့ မိမိကြိုက်တဲ့ဂဏန်းကို ရွေးလို့ရပြီး တကြိမ်တည်းမှာ ဆု ၄ ခုကို မျှော်လင့်နိုင်ကြောင်း၊ ဆုငွေများမျှဝေပေးမှုကို သဘောတူပြီး တစောင်ကို ဘတ် ၅၀ နှုန်းနဲ့ရောင်းဖို့၊ အရောင်းကိုယ်စားလှယ် ထားရှိဖို့လည်း အကြံပြုကြတယ်လို့ ဆိုပါတယ်။

ထီလက်မှတ်ပုံစံသစ်ကို သဘောမတူတဲ့ လူတွေကတော့ ထီပုံစံသစ်ဟာ ဒီဂျစ်တယ်လ်နည်းကို အဓိကထားရောင်းတာဖြစ်လို့ လူတိုင်းအလှမ်းမမီနိုင်တော့ဘဲ ဝယ်လိုအားကျဆင်းနိုင်ပြီး ရလဒ်လည်း မသေချာကြောင်း၊ လက်ရှိ ထီရောင်းသမားတွေကိုယ်နှိုက်က ဒီဂျစ်တယ်လ်နည်း အသုံးပြုတတ်သူ နည်းပါးနေသေးကြောင်း၊ ရောင်းချတဲ့အချိန်နဲ့နေရာ သတ်သတ်မှတ်မှတ် မရှိသလို အရွယ်မရောက်သေးတဲ့ ကလေးတွေလည်း လောင်းကစားသလို ဝယ်ယူမှာ စိုးတယ်လို့ ပြောပါတယ်။

အဲဒီကိစ္စတွေနဲ့ပတ်သက်ပြီး ထီလက်မှတ်ရောင်းချရာမှာ စည်းကမ်းချက်တွေ သတ်မှတ်ရမှာ ဖြစ်ကြောင်း၊ အပလီကေးရှင်းလုပ်ဖို့၊ အရွယ်မရောက်သေးတဲ့ကလေးတွေ မဝယ်နိုင်ဖို့ ထီဝယ်မယ့်သူတွေ မှတ်ပုံတင်ဖို့၊ ထီဝယ်မယ့်သူတွေဟာ အပလီကေးရှင်းထဲကနေ ပိုက်ဆံသွင်းဖို့ စတဲ့ နည်းစနစ်တွေ အသုံးပြုရမယ်လို့ ဆိုပါတယ်။

ပုံစံသစ်ထီလက်မှတ်နဲ့ပတ်သက်တဲ့ ကောင်းကျိုးဆိုးကျိုး ရလဒ်တွေကို ခွန်ကဲန်တက္ကသိုလ်ကလည်း သုတေသနပြုနေပြီး အဲဒီက လေ့လာသုံးသပ်ချက်တွေ၊ ပြည်သူ့အမြင်သဘောထားတွေ၊ နည်းနာတွေ စုစည်းကာ အစိုးရဝန်ကြီးများအဖွဲ့ထံ အစိုးရထီကော်မတီနဲ့ ဘဏ္ဍာရေးဝန်ကြီးဌာနကနေတဆင့် တင်ပြသွားမယ်လို့  နိုင်းချန်းကရစ်က ပြောသွားပါတယ်။