ယူကရိန်းဆီကနေ သိမ်းပိုက်ထားတဲ့ နယ်မြေတွေအတွက် ရုရှားက ဆန္ဒခံယူပွဲကျင်းပမယ့် အစီအစဉ်ကို ယူကရိန်းနိုင်ငံ ခါဆွန်နဲ့ ဇာပိုရစ်ဇီးယား စစ်ဘေးရှောင်တွေက ပြစ်တင်ရှုတ်ချခဲ့ကြပါတယ်။ 

ခါဆွန်ဒေသမှ အသက် ၄၁ နှစ်အရွယ် တာတီယာနာကတော့ ဆန္ဒခံယူပွဲကို ကန့်ကွက်ကြောင်းနဲ့ ယူကရိန်းပိုင်တဲ့ ငါတို့မြို့ ငါတို့မြေမှာ ရုရှားတွေအတွက် နေရာမရှိဘူးလို့ ပြောလိုက်ပါတယ်။ 

ခါဆွန်ကနေ ထွက်ပြေးလွတ်မြောက်လာတဲ့ ဗာစီးလီကလည်း ဆန္ဒခံယူပွဲကို လုံးဝကန့်ကွက်ကြောင်းနဲ့ ခါဆွန်ဒေသဟာ ယူကရိန်းပိုင်နက်ပဲ ဖြစ်ကြောင်း ပြောဆိုပါတယ်။ 

မေလကတည်းက ဒုက္ခသည်တွေ ဖြစ်လာရလို့ အခုလက်ရှိ ဘာတွေဖြစ်နေမှန်းတောင် မသိရသေးဘူးလို့ ဆိုပါတယ်။ 

ယူကရိန်းရဲ့ ဒေသ ၄ ခုမှာ သိမ်းပိုက်ထားတဲ့ နယ်မြေတွေက ရုရှားခန့်အပ် ခေါင်းဆောင်တွေဟာ အခုသီတင်းပတ်အတွင်း ရုရှားနိုင်ငံထဲကို ဝင်ပူးပေါင်းဖို့ လူထုဆန္ဒခံယူပွဲ ပြုလုပ်မယ့် အစီအစဉ်တွေကို ချမှတ်ခဲ့တာပါ။ 

ရုရှားအာဏာပိုင်တွေကတော့ ဒီလုပ်ရပ်ဟာ မော်စကိုပိုင် နယ်မြေအဖြစ် တတ်နိုင်သမျှ နည်းမျိုးစုံနဲ့ ကာကွယ်ရမယ့်ကိစ္စရပ်အဖြစ် ပုံဖော်ထားပါတယ်။ ယူကရိန်းကတော့ ဒါဟာ ရုရှားက စတန့်လုပ်တာ ဆိုပြီး ပယ်ချထားပါတယ်။