စစ်ကိုင်းတိုင်း၊ ကလေးမြို့နယ်အရှေ့ပိုင်း ကံပုလဲကျေးရွာမှ ကလေးမြို့နယ်တောင်ပိုင်း နည်းပညာ တက္ကသိုလ်(ကလေး)ဘက်ကို ဦးတည်စစ်ကြောင်းထိုးလာတဲ့ စစ်ကောင်စီတပ်ကို ဒီဇင်ဘာ ၂၃ ရက် မွန်းလွဲပိုင်းက  မိုင်းဆွဲတိုက်ခိုက်ခဲ့တယ်လို့  ကလေး PDF  အဖွဲ့က ပြောပါတယ်။

ပေါက်ခုံနဲ့ ထိုမာကျေးရွာကြားမှာ PDF(Kalay) အသင့်တပ်ဆင်ထားတဲ့ မိုင်း ၃ လုံးနဲ့ ဖောက်ခွဲတိုက်ခိုက်ခဲ့တာဖြစ်ပြီး စစ်ကောင်စီ တပ်ဖွဲ့ဝင် ၇ ယောက် အပြင်းထန် ထိခိုက်သွားကြောင်း၊ မိုင်းဆွဲခံရပြီးနေက် စစ်ကောင်စီတပ်က မိုင်းဖောက်ခွဲရာ အနီးဝန်းကျင်ကို ၁၀ မိနစ်လောက် ပစ်ခတ်ခဲ့ပြီး နည်းပညာတက္ကသိုလ်(ကလေး) ထဲ  ဝင်ရောက်သွားခဲ့တယ်လို့ ကလေး PDF က ပြောပါတယ်။

မိုင်းဆွဲမှုအပြီးမှာ ကလေးမြို့ဘက်ကနေ လူနာတင်ယာဉ်တွေ ရောက်ရှိလာပြီး ဒဏ်ရာရ စစ်သားတွေကို နည်းပညာတက္ကသိုလ်(GTC)ကနေ ကုတင် ၁၀၀ တပ်ဆေးရုံကို သယ်ဆောင် သွားတာ မြင်ခဲ့ရတယ်လို့ ဒေသခံတွေက ပြောပါတယ်။

ဒီဇင်ဘာ ၂၂ ရက်ည ၈ နာရီလောက်က ယင်းမာပင်ခရိုင်၊ ပုလဲမြို့နယ်က ထွေ/အုပ်ရုံးနဲ့ မြို့မရဲစခန်းကို လက်နက်ကြီးတွေနဲ့ ပစ်ခတ်ခဲ့တယ်လို့ ဒေသခံပြည်သူ့ကာကွယ်ရေးအဖွဲ့ဝင် သခင်ဒေါင်းညိုက ပြောပါတယ်။

“လက်နက်ကြီး အလုံး ၄၀ နီးပါးလောက် ပစ်ခဲ့တယ်။ အသေအပျောက် မသိရသေးဘူး။ ကျနော်တို့အဖွဲ့ကတော့ အထိအခိုက် မရှိခဲ့ဘူး။” 

အခု ပစ်ခတ်မှုကို သခင်ဒေါင်းညိုအဖွဲ့၊ မုတ်ဆိုးလေးအဖွဲ့၊ M7PTA အဖွဲ့၊ နဂါးနီအဖွဲ့၊ MRG အဖွဲ့၊ ဆင်ရိုင်းအဖွဲ့တို့ ပူးပေါင်းပြီး ပစ်ခတ်ခဲ့တာလို့လည်း သိရပါတယ်။