တရုတ်နိုင်ငံအတွက် အရေးပါတဲ့ ဝန်ကြီးနေရာ ခန့်အပ်မှုတွေနဲ့အတူ ပြည်တွင်းပြည်ပက စီးပွားရေးဆိုင်ရာ စိန်ခေါ်မှုတွေအပေါ် ကိုင်တွယ်ဖြေရှင်းရာမှာ လိုက်လျောညီထွေရှိနိုင်မယ့် ရာထူး ခန့်အပ်မှုတွေကို မတ် ၁၂ ရက်က လွှတ်တော်မှာ အတည်ပြုလိုက်ပါတယ်။

တရုတ်နိုင်ငံက ဗဟိုဘဏ်အကြီး အကဲနေရာနဲ့ ဘဏ္ဍာရေးဝန်ကြီးရာထူးတွေမှာ အရင်အတိုင်း ဆက်လက်ထားရှိခဲ့ပြီး အသက် ၆၅ နှစ်အရွယ် ရီဂန်း ဟာ တရုတ်ပြည်သူ့ဘဏ်အကြီးအကဲအဖြစ် ဆက်လက်တာဝန်ယူမှာဖြစ်သလို အသက် ၆၆နှစ်အရွယ် လုခွန်း ကလည်း ဘဏ္ဍာရေးဝန်ကြီးနေရာမှာ ဆက်ရှိနေဦးမှာဖြစ်ပါတယ်။ 

တရားဝင် အငြိမ်းစားယူရမယ့် အသက်အရွယ် ၆၅ နှစ်ကို ရောက်ရှိနေပြီဖြစ်တဲ့ သူတို့နှစ်ဦးကို အခုလို ဆက်လက် ခန့်အပ်ထားမှုက မေးခွန်းထုတ်စရာ ဖြစ်လာခဲ့ပါတယ်။ 

သိသာထင်ရှားတဲ့ တခြားခန့်အပ်မှုတွေအဖြစ် တရုတ်ဝန်ကြီးချုပ်အသစ်ဖြစ်သူ လီချန်းက ဒင်ရွှေရှန်၊ ကျန်းဂူချင်၊ လုဂူကျန်းနဲ့ ဖီလိုင်းဖန် စတဲ့သူတွေကို ဒုတိယ ဝန်ကြီးချုပ်တွေအဖြစ် ခန့်အပ်လိုက်ပါတယ်။

ကူးသန်းရောင်းဝယ်ရေးဝန်ကြီး ဝမ်ဝမ့်တာကတော့ မျှော်လင့် ထားတဲ့အတိုင်း ရာထူးမှာပဲ ဆက်ရှိနေဦးမှာပါ။ ရှီရှန်းပြည်နယ်ရဲ့ အုပ်ချုပ်ရေးမှူးဖြစ်သလို လက်ထောက် ပါတီအတွင်းရေးမှူး လည်းဖြစ်တဲ့ ကျန်းရှန်ဂျီက သြဇာကြီးမားတဲ့ နိုင်ငံတော်စီမံကိန်းရေးဆွဲရေးဆိုင်ရာ အမျိုးသားဖွံ့ဖြိုးတိုးတက်ရေးနဲ့ ပြုပြုပြောင်းလဲရေး ကော်မရှင်အကြီးအကဲအဖြစ် တာဝန်ယူသွား ဖို့အတွက်လည်း အတည်ပြုခဲ့ပါတယ်။ 

တရုတ်သမ္မတ ရှီကျင့်ဖျင်ကတော့ တတိယမြောက် ငါးနှစ်သက်တမ်းကို စတင်ချိန်မှာ အစိုးရ အပြောင်းအလဲတွေအကြား အဓိကအရေးပါတဲ့ အခန်းကဏ္ဍတွေမှာ သူရဲ့မဟာမိတ်တွေကို အခုလို ထည့်သွင်းခန့်အပ်လာခဲ့တာ ဖြစ်ပါတယ်။ 

အစိုးရအနေနဲ့ကတော့ ၂၀၂၃ ခုနှစ်မှာ စီပွားရေးတိုးတက်မှုဆိုင်ရာ ရည်မှန်းချက်ကို ၅ ရာခိုင်နှုန်းဝန်းကျင် ပြည့်မှီဖို့ သတ်မှတ်ထားပါတယ်။ 

ဒါဟာ မနှစ်ကသတ်မှတ် ထားတဲ့ ၃ ရာခိုင်နှုန်းကနေ တိုးမြှင့်ခဲ့တာဖြစ်ပြီး မနှစ်က စီပွားရေးကဏ္ဍ စွမ်းဆောင်ရည်ဟာလည်း ကိုဗစ် ၁၉ ကပ်ရောဂါကြောင့် ဆယ်စုနှစ်များစွာအတွင်း အနိမ့်ဆုံး ဖြစ်ခဲ့ပါတယ်။