ဧရာဝတီတိုင်း မော်ကျွန်းနှင့် မြန်အောင်တွင် စစ်ကောင်စီတပ်များ တိုက်ခိုက်ခံရ
ဧရာဝတီတိုင်း၊ လပွတ္တာခရိုင်၊ မော်ကျွန်းမြို့နယ် အမှတ် (၅၃၄) တပ်နဲ့ မြန်အောင်မြို့နယ်ရှိ ခလရ (၅၁) တပ်တွေကို ဧပြီ ၁၇ ရက်မှာ ဒေသခံ ပြည်သူကာကွယ်ရေးတပ်ဖွဲ့တွေက ဗုံးနဲ့ပစ်ခတ် တိုက်ခိုက်ခဲ့ပါတယ်။
မနေ့ည ၉ နာရီခွဲလောက်မှာ မော်ကျွန်း အခြေစိုက် အမှတ် (၅၃၄) တပ်၀င်းထဲသို့ မော်ကျွန်းပြည်သူ့ကာကွယ်ရေးအဖွဲ့နဲ့ ဧရာဝတီလင်းပိုင်မော်ကျွန်းအဖွဲ့တို့ပူးပေါင်းပြီး ၇၉ ဗုံးပစ်လောင်ချာနဲ့ 40mm ဗုံး၂ လုံးနဲ့ ပစ်ခတ်တိုက်ခိုက်ခဲ့တာလို့ တာ၀န်ရှိသူတဦးက ပြောပါတယ်။
"တပ်ထဲကိုပစ်တာ ပထမဆုံး၊ တခြားတိုက်ခိုက်မှုများစွာရှိခဲ့တယ်။ အခု ရန်သူတပ်ထဲထိခိုက်မှု အခြေအနေတော့ စုံစမ်းနေတုန်း။ တခြားစစ်ရေးပစ်မှတ်တွေ၊ သူတို့ယန္တရားဖြစ်တဲ့ အုပ်ချုပ်ရေးရုံးတွေကို ဗုံးတိုက်ခိုက်တာရှိတယ်။”
အလားတူ ဧရာဝတီတိုင်း၊ မြန်အောင်မြို့နယ်မှာလည်း ခလရ (၅၁)တပ်ကို ဧပြီ ၁၇ ရက် မနက် ၄ နာရီလောက်မှာ ၇၉ ဗုံးပစ်လောင်ချာနဲ့ 40mm ဗုံး၃လုံး ပစ်ခတ်တိုက်ခိုက်ခဲ့ကြောင်း သိရပါတယ်။
အဆိုပါတိုက်ခိုက်မှုတွေမှာ စစ်ကောင်စီတပ်ဖွဲ့ဝင်တွေ ထိခိုက်ဒဏ်ရာရတာ ရှိမရှိတော့ မသိရသေးပါဘူး။
စစ်တပ်နဲ့ရဲတွေ ဧရာ၀တီတိုင်းအတွင်း ဘယ်နေရာမှ မလုံခြုံကြောင်း အကြမ်းဖက်စစ်တပ်ထံကနေ အမြန်ဆုံး ထွက်ခွာကြဖို့ မော်ကျွန်းပြည်သူ့ကာကွယ်ရေးအဖွဲ့နဲ့ ဧရာဝတီလင်းပိုင် မော်ကျွန်းအဖွဲ့တို့က ထုတ်ပြန်တိုက်တွန်းထားပါတယ်။
စစ်တပ်အာဏာသိမ်းပြီးနောက် ဧရာ၀တီတိုင်းဒေသကြီးမှာ ပစ်ခတ်တိုက်ခိုက်မှုတွေ ဗုံးပေါက်ကွဲမှုတွေ အနည်းအကျဉ်းသားရှိခဲ့ပေမဲ့ အခုဧပြီလအတွင်းမှာတော့ စစ်ကောင်စီရဲ့ စစ်ရေးပစ်မှတ်တွေ ပိုမိုတိုက်ခိုက်ခံနေရတာ ဖြစ်ပါတယ်။
