မြန်မာနိုင်ငံ၊ စစ်ကိုင်းတိုင်းအထက်ပိုင်း တမူးမြို့နဲ့ အိန္ဒိယနိုင်ငံ မိုးရေးမြို့အကြား နယ်နိမိတ်ချင်း ထိစပ်နေတဲ့နှစ်နိုင်ငံ နယ်စပ်ဒေသမှာ  စစ်ကောင်စီရဲ့ ကင်းထောက်လေယာဉ်တွေ အဆက်မအပြတ် ပျံသန်းနေတဲ့အတွက် စစ်ဘေးရှောင်တွေ တောတောင်တွေထဲ တိမ်းရှောင်နေရတယ်လို့ သိရပါတယ်။

နယ်စပ်ကနေထွက်ပြေးတိမ်းရှောင်နေတဲ့ မြန်မာစစ်ရှောင်တွေခိုလှုံနေတဲ့ အိန္ဒိယနိုင်ငံ၊ မိုးရေးမြို့ကို ဒီနေ့ ဇန်နဝါရီ ၃၀ ရက်မှာ စစ်ကောင်စီဘက်က တာဝန်ရှိသူတွေ လာရောက်မှာဖြစ်တဲ့အတွက် မြို့ထဲမှာ အစစ်အဆေးတွေရှိနေပြီး နေ့လယ်ပိုင်းက မြန်မာစစ်တပ်နဲ့ အိန္ဒိယစစ်တပ်က လေယာဉ်တွေ ပျံသန်းနေတဲ့အတွက် စစ်ရှောင်တွေအနေနဲ့ စိုးရိမ်ကြောက်လန့်ပြီး တောတောင်တွေထဲမှာ ထွက်ပြေးပုန်းရှောင်နေရတယ်လို့ မိုးရေးမြို့မှ စစ်ရှောင်တဦးက ဒီဗွီဘီကို ပြောပါတယ်။

“မိုးရေးနဲ့ အနီးအနားကရွာတွေကို ဝင်စစ်တာ၊ မနေ့ကဆိုလည်း ဗမာကလေးတွေကို စာသင်ပေးနေတဲ့ ကချင်ကျောင်းတကျောင်းကို ဝင်စစ်သေးတယ်။ အခုက အိန္ဒိယစစ်တပ်နဲ့ ဗမာစစ်တပ် ပေါင်းပြီး တအိမ်တက် တအိမ်ဆင်း မြန်မာတွေလိုက်ရှာပြီး ဖမ်းနေတယ်ကြားတယ်။ အင်ဖာဘက်ကို စစ်တပ်ကအရာရှိလာမှာမို့လို့ အခုလို ဖြစ်တာလို့လည်း ကြားပါတယ်။ ဒီဘက်ကို မြန်မာစစ်တပ်ဘက်က လုံခြုံရေး ရှေ့ပြေး အယောက် ၂၀ လည်း ရောက်နေတယ်။ အခုက စစ်ရှောင်တွေ အနားက တောတွေထဲမှာ ပုန်းနေကြရတယ်။ ကျနော်တို့လည်း ရှောင်နေရတယ်။”

မြန်မာနဲ့ အိန္ဒိယ နှစ်နိုင်ငံက ဒေသဆိုင်ရာ နယ်ခြားကော်မတီကို ၆ လတကြိမ် ကျင်းပလေ့ရှိပြီး ဒီနေ့မှာ စစ်တပ်ဘက်က အကြီးအကဲတယောက် လာရောက်မှာဖြစ်တဲ့အတွက် အခုလို ကင်းထောက်လေယာဉ်တွေ ပျံသန်းသွားလာနေတာ ဖြစ်နိုင်တယ်လို့ တမူးဒေသ ကာကွယ်ရေးအဖွဲ့တခုရဲ့ တာဝန်ရှိသူက ပြောပါတယ်။

ပြီးခဲ့တဲ့ ဇန်နဝါရီ ၂၇ ရက်ကလည်း နယ်စပ်ဖြတ်ကျော်ခိုလှုံလာတဲ့ အထောက်အထားမဲ့ မြန်မာနိုင်ငံသား ၈၁ ယောက်ကို တရားမဝင် နယ်စပ်ဖြတ်ကျော်မှု လ.ဝ.က ဥပဒေနဲ့ မဏိပူရ်ပြည်နယ်အစိုးရအဖွဲ့က ဖမ်းဆီးထောင်ချခဲ့ပါတယ်။ 

စစ်တပ် အာဏာသိမ်းပြီး နောက်ပိုင်းမှာ အိန္ဒိယနိုင်ငံ မီဇိုရမ်ပြည်နယ်ဘက် ထွက်ပြေးတိမ်းရှောင်တဲ့ ဒုက္ခသည်ပေါင်း ၄၀,၀၀၀ ခန့်နဲ့ မဏိပူရပြည်နယ်မှာ ၅,၀၀၀ ကျော်ရှိတယ်လို့ လေ့လာသူတွေက ခန့်မှန်းထားကြပါတယ်။

မြောက်အတ္တလန္တိတ် စစ်ရေးမဟာမိတ်အဖွဲ့ (နေတိုး) ရဲ့ ကင်းထောက်လေယာဉ်တွေဟာ နေတိုးအဖွဲ့ရဲ့ အရှေ့ဘက်ခြမ်းဒေသကို အားဖြည့်ဖို့နဲ့ ရုရှားရဲ့ စစ်ရေးလှုပ်ရှားမှုတွေကို စောင့်ကြည့်ကူညီဖို့ ဇန်နဝါရီ ၁၇ ရက်က ရိုမေးနီးယားနိုင်ငံဆီကို ရောက်ရှိလာပါတယ်။

ဂျာမန်လေကြောင်း သတိပေးထိန်းချုပ်ရေးစနစ် AWACS ရဲ့ ထောက်လှမ်းရေးလေယာဉ်တွေဟာ ဘူခါရက်စ်မြို့နားက အိုတိုပေနီ လေတပ်စခန်းဆီ ဆင်းသက်လာပြီး ရက်သတ္တပတ်ပေါင်းများစွာ နေဖို့ စီစဉ်ထားပါတယ်။

ဘူခါရက်စ်မှာ မကြာခင်လုပ်တော့မယ့် စစ်ဆင်ရေးက မဟာမိတ်အဖွဲ့ရဲ့ အရှေ့ဘက်ခြမ်းမှာ ရှိတဲ့ နေတိုးရဲ့ တိုးမြှင့်သတိထားရေး လုပ်ဆောင်ချက်တွေမှာ အရေးကြီးတဲ့ ပံ့ပိုးကူညီမှုတရပ် ဖြစ်လာမယ်လို့ စစ်ဆင်ရေးကို ဦးဆောင်မယ့် ဗိုလ်မှူးချုပ် စတီဖန် ဒဗလျူ နျူးမဲန်းက ပြောပါတယ်။

ဒီလေယာဉ်အုပ်ထဲမှာ ဂျာမနီနိုင်ငံ၊ ဂိုင်လန်ကဲယာရှန် အခြေစိုက် NATO AWACS စနစ်ထဲက လေယာဉ် ၁၄ စင်း ပါဝင်ပါတယ်။

စိန်ခေါ်မှုများပြီး ခက်ခဲတဲ့အချိန်တွေမှာ ဂျာမနီဟာ ရိုမေးနီးယားနဲ့ အတူရပ်တည်နေပြီး ယူကရိန်းအရေးမှာ ရိုမေးနီးယားဟာ စစ်မြေပြင်နဲ့ နယ်နိမိတ်ချင်း ထိစပ်နေတယ်လို့ ရိုမေးနီးယားနိုင်ငံဆိုင်ရာ ဂျာမနီသံအမတ် ပီးယား ဂေဘောင်ဝါက ပြောပါတယ်။

နေတိုးနယ်မြေအတွင်း စပြီး ကင်းထောက်ပျံသန်းမယ့် AWACS ထောက်လှမ်းရေး လေယာဉ်တွေကို ဘူခါရက်စ်မှာ ဖြန့်ကြက်ချထားမယ်လို့ ပြီးခဲ့တဲ့သီတင်းပတ်မှာ နေတိုးက ကြေညာခဲ့ပါတယ်။

မနှစ် ဖေဖော်ဝါရီလမှာ ရုရှားက ယူကရိန်းကို တိုက်လေယာဉ်တွေ၊ ထောက်လှမ်းရေး လေယာဉ်တွေနဲ့ တင့်ကားတွေသုံးပြီး ကျူးကျော်ဝင်ရောက်လာချိန်ကစလို့ နေတိုးဟာ ဥရောပအရှေ့ပိုင်းနဲ့ ဘောလ်တစ်ဒေသမှာ သူ့ရဲ့ လေတပ်စခန်းတွေ ပိုမိုတိုးချဲ့ခဲ့ပါတယ်။

နေတိုးနဲ့ အီးယူအဖွဲ့ဝင် ရိုမေးနီးယားဟာ ယူကရိန်းနဲ့ နယ်နိမိတ်ချင်း ထိစပ်နေပါတယ်။ နေတိုးတပ်ဖွဲ့ဝင် အယောက် ၁၈၀ လောက်ဟာ ဘူခါရက်စ်နားက အော့တိုပေနီမှာရှိတဲ့ အခြေစိုက်စခန်းတခုကနေ ရိုမေးနီးယားလေတပ်ကို ကူညီပေးမှာ ဖြစ်ပါတယ်။