မြန်မာနိုင်ငံထဲက စစ်အာဏာရှင်ကို ဆန့်ကျင်တော်လှန်နေသူတွေနဲ့ ဆက်နွှယ် ပတ်သက်နေသူတွေကို ထိုင်းနိုင်ငံ၊ ကန်ချနာပူရီခရိုင်အတွင်းမှာရှိမရှိ  စိစစ်နေပြီး ပတ်သက်နေသူတွေကို ထိုင်းမှာ တရားဝင်နေထိုင်ခွင့် ထုတ်ပေးထားတဲ့ လက်မှတ်တွေကို ပြန်လည် ရုပ်သိမ်းတဲ့အထိ အရေးယူသွားမယ်လို့  ကန်ချနာပူရီခရိုင် အုပ်ချုပ်ရေးတာဝန်ရှိသူတွေက ပြောကြားလိုက်ပါတယ်။

စက်တင်ဘာ ၄ ရက်က ထိုင်း-မြန်မာ ထီးခီးနယ်စပ် ကုန်သည်ကြီးများအသင်း တွေ့ဆုံပွဲမှာ အခုလို ပြောကြားခဲ့တာဖြစ်ပါတယ်။

တနင်္သာရီတိုင်းထဲက ထိုင်း-မြန်မာ နယ်စပ်ဂိတ်တစ်ခုဖြစ်တဲ့ ထီးခီးနယ်စပ်ဂိတ် ပိတ်ထားရတာက အကြမ်းဖက်သမားတွေကြောင့်ဖြစ်တယ်လို့ စစ်ကောင်စီလက်အောက်ခံ ဝန်ကြီးဌာနက တာဝန်ရှိသူနဲ့ တနင်္သာရီတိုင်းထဲက ကုန်သည်လုပ်ငန်းရှင်တွေက ထိုင်းကုန်သည်ကြီးများအသင်းကို ပြောဆိုပြီးတဲ့နောက် ကန်ချနာပူရီခရိုင်အုပ်ချုပ်ရေးက အခုလို ပြန်လည် ပြောကြားခဲ့တာပါ။

လက်ရှိမှာ ထီးခီးနယ်စပ် ပိတ်ထားတဲ့အတွက် လုပ်ငန်းရှင်တွေက နစ်နာနေရတယ်လို့ ထိုင်း ကုန်သည် လုပ်ငန်းရှင်တွေက ပြောဆိုခဲ့ပါတယ်။

ဒါနဲ့ပတ်သက်လို့ စစ်ကောင်စီလက်အောက်ခံ တနင်္သာရီတိုင်း ထားဝယ်ခရိုင် ကူးသန်းရောင်းဝယ်ရေးဝန်ကြီးဌာနက ဦးဇော်လတ်နဲ့ ထီးခီးနယ်စပ် ကုန်သည်ကြီးများအသင်း ဥက္ကဋ္ဌ ဦးမြင့်ဆွေ အပါအဝင် လုပ်ငန်းရှင်တွေက အခုလို ပိတ်ထားတာက အကြမ်းဖက်သမားတွေက နယ်မြေဒေသ လုံခြုံရေးကို ထိပါးနေတဲ့အတွက် ပိတ်ထားရတာဖြစ်တယ်လို့ စွပ်စွဲပြောဆိုခဲ့ကြပါတယ်။

အဲဒီတွေ့ဆုံပွဲကို ထီးခီးနယ်စပ် ကုန်သည်ကြီးများအသင်းက လုပ်ငန်းရှင် ၅ ဦးနဲ့ ထိုင်းကုန်သည် လုပ်ငန်းရှင် ၂၅ ဦး တက်ရောက်ခဲ့ကြပြီး နယ်စပ်ဂိတ်တွေ ပြန်လည်ဖွင့်လှစ်နိုင်ဖို့ အဓိကထား ဆွေးနွေးခဲ့ကြတယ်လို့လည်း သိရပါတယ်။

ထီးခီးနယ်စပ်ဟာ တနင်္သာရီတိုင်းထဲက အရေးပါတဲ့ နယ်စပ်ကုန်သွယ်ရေး ဂိတ်တစ်ခုဖြစ်ပြီး နယ်မြေဒေသလုံခြုံရေးအခြေအနေကြောင့် အခုနှစ် ဧပြီလ ၂၄ ရက်နေ့က စတင်ပြီးယာယီပိတ်ထားခဲ့တာလည်း ဖြစ်ပါတယ်။

တနင်္သာရီတိုင်းဟာ စစ်တပ်ရဲ့ မတရား အာဏာသိမ်းမှုကို  နည်းလမ်းပေါင်းစုံနဲ့ ဆန့်ကျင်တော်လှန်နေတဲ့ ဒေသတခုလည်း ဖြစ်ပါတယ်။

ထိုင်းနိုင်ငံ၊ ကန်ချနပူရီခရိုင်ရှိ ရွာတရွာထဲကို  ဒီဇင်ဘာ ၁၃ ရက်က တရားမဝင် နယ်စပ်ဖြတ်ကျော်ဝင်ရောက်လာတဲ့ မြန်မာနိုင်ငံသား ၁၆ ယောက်ကို ထိုင်းအစိုးရ လှည့်ကင်းတွေက ဖမ်းဆီးခဲ့တယ်လို့ ဘန်ကောက်ပို့စ်သတင်းမှာ ရေးပါတယ်။

ချုံပုတ်ထဲမှာ  ပုန်းအောင်းနေတဲ့ မြန်မာအမျိုးသား ၁၀ ယောက်နဲ့ အမျိုးသမီး ၆ ယောက်တို့ကို ထိုင်းလုံခြုံရေးတပ်ဖွဲ့တွေက တွေ့ရှိခဲ့တာဖြစ်ပြီး သူတို့ဟာချွန်ဘူရီမှာ အလုပ်သွားလုပ်ဖို့  လာကြို့မယ့်ကားကို စောင့်နေကြတာလို့ သိရပါတယ်။

သူတို့အားလုံးဟာ ပဲခူးကနေ လာကြတာဖြစ်ပြီး  သဘာဝတောလမ်းကနေ နယ်စပ်ကို ဖြတ်ကျော်  ဖို့ ပွဲစားကို တယောက်လျှင် ထိုင် ဘတ် ၃၀၀၀၀ စီ ပေးခဲ့ရတယ်လို့လည်းဆိုပါတယ်။

ထိုင်းနိုင်ငံအတွင်း တရားမ၀င် ဝင်ရောက်လာတဲ့ နိုင်ငံခြားသားတွေကို ကူညီပေးခဲ့တဲ့ ထိုင်းလမ်းပြနှစ်ဦးကိုလည်း  ဖမ်းဆီးအရေးယူထားပါတယ်။

ဖမ်းဆီးရမိသူတွေကို တရားမ၀င်ခိုးဝင်မှုနဲ့ တရားစွဲပြီး ဥပဒေအရ အရေးယူ ကာ ပြည်နှင်ဒဏ်ပေးသွားမယ်လို့သိရပါတယ်။