မြန်မာနိုင်ငံဆိုင်ရာ အာဆီယံအထူးကိုယ်စားလှယ်ဟာ လာမယ့် သီတင်းပတ်တွေအတွင်း မြန်မာနိုင်ငံကို တတိယအကြိမ် သွားရောက်ဖို့ ရှိနေပြီး ဒီခရီးစဉ်မှာ မြန်မာနိုင်ငံကို ပုံမှန်အခြေအနေအတိုင်း ဒီမိုကရေစီလမ်းကြောင်းပေါ် ပြန်လည်ရောက်ရှိရေးအတွက် ကူညီဆောင်ရွက်ပေးနိုင်ရေး ထပ်မံကြိုးပမ်းသွားဖို့ စီစဉ်ထားတယ်လို့ ထုတ်ပြန်ပါတယ်။

ဒါ့အပြင် စစ်ကောင်စီက အကျဉ်းသား ၅၇၀၀ ကျော်ကို ပြန်လွှတ်ပေးခဲ့တဲ့အပေါ် ကြိုဆိုကြောင်းလည်း ကမ္ဘောဒီးယားနိုင်ငံရဲ့ ဒုတိယဝန်ကြီးချုပ်လည်းဖြစ် နိုင်ငံခြားရေးဝန်ကြီးလည်း ဖြစ်တဲ့ ပရက်ဆော့ခွန်းက ပြောပါတယ်။

ခုလိုလွှတ်ပေးလိုက်တာက လက်ရှိအကျပ်အတည်းအတွက် ငြိမ်းချမ်းတဲ့ အဖြေကို ရှာဖွေနိုင်ဖို့အတွက် အာဆီယံဘုံသဘောတူညီချက် ၅ ရပ်ကို အကောင်အထည် ဖော်ဖို့ ပွင့်လင်းကောင်းမွန်လာတဲ့ လက္ခဏာတရပ်လည်းဖြစ်တယ်လို့ ထုတ်ပြန်ချက်မှာ ဖော်ပြပါတယ်။

စစ်ကောင်စီက နိုင်ငံတဝန်း အကျဉ်းထောင်အသီးသီးကနေ ပြန်လွှတ်ပေးခဲ့သူတွေထဲမှာတော့ NLD အစိုးရလက်ထက် စီးပွားရေးအကြံပေး မစ္စတာ ရှောင်တာနယ်လ်၊ အတိုင်ပင်ခံရုံးဝန်ကြီး ဦးကျော်တင့်ဆွေ၊ မြန်မာနိုင်ငံဆိုင်ရာ ဗြိတိန်သံအမတ်ဟောင်း ဗစ်ကီဘိုးမန်း၊ ဂျပန်နိုင်ငံသား မှတ်တမ်းရုပ်ရှင်ရိုက်ကူးသူ တိုရူကူဘိုတာစတဲ့သူတွေပါဝင်ပြီး နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသား အတော်များများကတော့ လွတ်မြောက်လာခြင်း မရှိသေးပါဘူး။

ပထမအကြိမ်နဲ့  ဒုတိယ တရားဝင်ခရီးစဉ်တွေမှာ အာဆီယံ အထူးကိုယ်စားလှယ်က ဒေါ်အောင်ဆန်းစုကြည်နဲ့ တွေ့ခွင့်တောင်းတာကို  စစ်ကောင်စီက ငြင်းပယ်ခဲ့ပြီး အခုလာမယ့် တတိယအကြိမ်မှာလည်း တွေ့ ဆုံခွင့်ရမယ် မရဘူးဆိုတာ မသိရသေးပါဘူး။

အာဆီယံအထူးကိုယ်စားလှယ်က ဒေါ်အောင်ဆန်းစုကြည်နဲ့ တွေ့ဆုံခွင့်တောင်းတိုင်းမှာ လက်ရှိအမှုတွေ ရင်ဆိုင်နေရတာကို အကြောင်းပြပြီး  စစ်ကောင်စီက ငြင်းပယ်နေခဲ့တာ ဖြစ်ပါတယ်။

ပြီးခဲ့တဲ့ ဇွန်လအတွင်းမှာ အာဆီယံအထူးကိုယ်စားလှယ် မြန်မာနိုင်ငံကို လာရောက်ခဲ့စဉ် ဒေါ်အောင်ဆန်းစုကြည်နဲ့တွေ့ဆုံဖို့ တောင်းဆိုတာကို အာဏာသိမ်း စစ်ခေါင်းဆောင်မင်းအောင်လှိုင်က ငြင်းဆိုခဲ့ပြီး နောက်အကြိမ်တွေမှာတော့ ဖြစ်ကောင်းဖြစ်နိုင်လိမ့်မယ်လို့ ဖြေကြားခဲ့ပါတယ်။

အခုချိန်မှာ စစ်ကောင်စီက နိုင်ငံတော်အတိုင်ပင်ခံပုဂ္ဂိလ် ဒေါ်အောင်ဆန်းစုကြည်ကို နေပြည်တော်က သီးသန့်အကျဉ်းထောင်မှာ ပို့ဆောင်ပြီး တယောက်တည်း အကျဉ်းချထားပါတယ်။

မြန်မာနိုင်ငံရဲ့ ဒီမိုကရေစီအသွင်ကူးပြောင်းရေးလုပ်ငန်းစဉ် ပြန်လည်စတင်ပြီး တိုင်းပြည်အာဏာကို ပြည်သူတွေထံ ပြန်လည်အပ်နှင်းရေး မျှော်မှန်းချက် အကောင်အထည်ဖော်ဖို့ တရုတ်နိုင်ငံခြားရေးဝန်ကြီး ဝန်ယိက တိုက်တွန်းပြောကြားလိုက်ပါတယ်။

ဇူလိုင် ၃  ရက်က ပုဂံမြို့မှာ မြန်မာနိုင်ငံဆိုင်ရာအာဆီယံအထူးကိုယ်စားလှယ် ကမ္ဘောဒီးယား နိုင်ငံခြားရေးဝန်ကြီး ပရတ်ဆာခွန်းနဲ့ မြန်မာ့အရေးဆွေးနွေးရာမှာ တရုတ်နိုင်ငံ နိုင်ငံတော်ကောင်စီဝင်နဲ့  နိုင်ငံခြားရေးဝန်ကြီး ဝန်ယိက ပြောဆိုခဲ့တာလို့ တရုတ်သံရုံးက သတင်းထုတ်ပါတယ်။

တွေ့ဆုံပွဲမှာ မြန်မာနိုင်ငံအရေး ဖြေရှင်းဖို့  တရုတ်နိုင်ငံရဲ့ မျှော်လင့်ချက်သုံးရပ်အကြောင်း  မစ္စတာ ဝန်ယိက ပြောပါတယ်။ 

ပထမအချက်ကတော့ ဖွဲ့စည်းပုံအခြေခံဥပဒေနဲ့ ဥပဒေမူဘောင်တွေအောက် မြန်မာနိုင်ငံမှာ နိုင်ငံရေးပြန်လည်သင့်မြတ်ရေး စဉ်ဆက်မပြတ် တွန်းအားပေးဖော်ဆောင်ဖို့ တရုတ်နဲ့ အာဆီယံ ပူးတွဲလုပ်ဆောင်ဖို့မျှော်လင့်ကြောင်း  မြန်မာနိုင်ငံရှိ အဖွဲ့အစည်းအသီးသီးက နိုင်ငံရဲ့အခင်းအကျင်းနဲ့ ပြည်သူလူထု အကျိုးစီးပွားကို အလေးထားပြီး ဆင်ခြင်တုံတရားနဲ့ လက်တွေ့ကျမှု၊ အပြန်အလှန် နားလည်သည်းခံမှုတွေနဲ့ ဘက်ပေါင်းစုံရဲ့ ကျိုးကြောင်းဆီလျော်တဲ့ တောင်းဆိုချက်တွေကို ထည့်သွင်းစဉ်းစားကာ တည်ငြိမ်အေးချမ်းရေးကို ဆောလျင်စွာ ဖော်ဆောင်ဖို့ အားပေးတယ်လို့ ဆိုပါတယ်။

ဒုတိယအချက်ကတော့ မြန်မာ့ဒီမိုကရေစီအသွင်ကူးပြောင်းရေးလုပ်ငန်းစဉ် ပြန်လည်စတင်ပြီး တိုင်းပြည်အာဏာကို ပြည်သူတွေထံ ပြန်လည်အပ်နှင်းရေး မျှော်မှန်းချက် အကောင်အထည်ဖော်ဖို့ တရုတ်နဲ့ အာဆီယံ အတူတွန်းအားပေးကာ မြန်မာနိုင်ငံအခြေအနေနဲ့ ကိုက်ညီတဲ့ မြန်မာ့ဝိသေသလက္ခဏာဆောင်တဲ့ နိုင်ငံရေးဖွံ့ဖြိုးတိုးတက်မှုလမ်းကြောင်းကို ရှာဖွေဖို့ မျှော်လင့်ကြောင်း ပြောပါတယ်။

တတိယအချက်မှာ အာဆီယံက “အာဆီယံနည်းလမ်း” ကို လက်ကိုင်စွဲကာ ပြည်တွင်းရေး ဝင်ရောက်စွက်ဖက်မှုမရှိရေး၊ ပေါင်းစပ်ညှိနှိုင်းရေ အခြေခံမူနဲ့ အစဉ်အလာတွေကို ခိုင်မြဲစေကာ တည်တည်ငြိမ်ငြိမ်နဲ့ နှောင့်ယှက်မှုတွေကို  ဖယ်ရှားပြီး စိတ်ရှည်လက်ရှည် ညှိနှိုင်းခြင်းဖြင့် အာဆီယံ၏ “တူညီဆန္ဒငါးရပ်”ကို  အပြုသဘောဆောင်စွာ အကောင်အထည်ဖော်ရင်း အာဆီယံရဲ့ စည်းလုံးညီညွတ်တဲ့  ဦးဆောင်မှုအခန်းကဏ္ဍကို ထိန်းသိမ်းဖို့ မျှော်လင့်ကြောင်းနည်း တရုတ်နိုင်ငံခြားရေးဝန်ကြီးက ပြောပါတယ်။

အာဆီယံ အထူးကိုယ်စားလှယ်ဟာလည်း သူ့ရဲ့ မြန်မာနိုင်ငံခရီးစဉ် အခြေအနေတွေကို မိတ်ဆက်ပြောကြးခဲ့တယ်လို့ဆိုပါတယ်။

တရုတ်နိုင်ငံခြားရေးဝန်ကြီး ဝန်ယိ ခေါင်းဆောင်တဲ့ ကိုယ်စားလှယ်အဖွဲ့ဟာ (၇) ကြိမ်မြောက် မဲခေါင်-လန်ချန်း ပူးပေါင်းဆောင်ရွက်မှု နိုင်ငံခြားရေးဝန်ကြီးများအစည်းအဝေးကို တက်ရောက်ဖို့ ဇူလိုင် ၂ ရက်ကတည်းက မြန်မာ့ရှေးဟောင်းယဉ်ကျေးမှုနယ်မြေ ပုဂံမြို့မှာ ရောက်ရှိနေတာ ဖြစ်ပါတယ်။