ထိုင်းနိုင်ငံမှာ အောက်တိုဘာလ ၁၆ ရက်ညက ကျင်းပတဲ့ Thai Fight မွေထိုင်းလက် ဝှေ့ပြိုင်ပွဲမှာ မြန်မာနိုင်ငံက ကရင်နီအမျိုးသမီးလက်ဝှေ့မယ် ဘရော်နီကာ (Vero V.Rujirawong) က ပြိုင်ဘက် ဘရားဇီးနိုင်ငံသူ မာရီယာနာကို အလဲထိုး အနိုင်ရရှိသွားပါတယ်။
မနေ့ညကပွဲမှာ ဘရော်နီကာဟာ ဘယ်ညာတွဲလုံး လက်သီးချက်တွေ၊ တံတောင်ရိုက်ချက်တွေနဲ့ ခြေကန်ချက်တွေအစုံသုံးပြီး ပြိုင်ဘက် ဘရာဇီးလက်ဝှေ့မယ်ကို ယှဉ်ပြိုင်ထိုးသတ်ခဲ့တာ ဖြစ်ပါတယ်။
ဒုတိယအချီမှာတော့ ဘရော်နီကာက ပြိုင်ဘက်ရဲ့ မျက်နှာကိုထိုးနေရာကနေ နံကြားကို အားပြင်းတဲ့ ဘယ်လက်သီးတစ်လုံးပစ်သွင်း လိုက်ရာမှာတော့ ပြိုင်ဘက်လက်ဝှေ့မယ် မခံနိုင်တော့ပဲ လဲကျသွားတဲ့အတွက် ဘရော်နီကာက အနိုင်ရသွားပါတယ်။
ပြိုင်ဘက် ဘရားဇီးနိုင်ငံသူ မာရီယာနာဟာ မွေထိုင်းလက်ဝှေ့ပြိုင်ပွဲတွေမှာ နိုင်ပွဲပေါင်း ၂၅ ပွဲရရှိထားသူဖြစ်ပြီး မနေ့ညက ပြိုင်ပွဲမှာတော့ ဘရော်နီကာကို ရှုံးနိမ့်ခဲ့တာ ဖြစ်ပါတယ်။
ဘရော်နီကာဟာ လက်ရှိအချိန်ထိ ပွဲပေါင်း ၃၀ ကျော် ကစားခဲ့ရာမှာနိုင်ပွဲ ၁၆ ပွဲ၊ ရှုံးပွဲ ၂ ပွဲ၊ သရေ ၁၇ ပွဲ ဖြစ်ပါတယ်။ Thai Fight မွေထိုင်းလက်ဝှေ့ပွဲတွေမှာတော့ သူဟာ ၆ ပွဲဆက်တိုင် အနိုင်ရထားပါတယ်။
ထိုင်းနိုင်ငံ၊ ဘန်ကောက်မြို့မှာ ဧပြီ ၁၇ ရက်ညက ယှဉ်ပြိုင်ထိုးသတ်သွားတဲ့ Thai Fight မွေထိုင်းလက်ဝှေ့ ပြိုင်ပွဲမှာ ကယန်းကျားသစ်မယ်လို့ လူသိများတဲ့ မြန်မာနိုင်ငံက ကရင်နီ အမျိုးသမီးလက်ဝှေ့သမား ဘရော်နီကာ (Vero V.Rujirawong) က ထိုင်းပြိုင်ဘက် ယင်မ်ဆီရမ်ကို အနိုင်ရသွားပါတယ်။
သုံးချီယှဉ်ပြိုင်ထိုးသတ်ရတဲ့ ပြိုင်ပွဲမှာ ပထမအချီမှာပဲ ဘရော်နီကာက ပြိုင်ဘက် ထိုင်းအမျိုးသမီးလက်ဝှေ့မယ်ကို ဘယ်ညာတွဲလုံးတွေနဲ့ အလဲထိုးအနိုင်ရရှိခဲ့တာ ဖြစ်ပါတယ်။
မနေ့ညက ပြိုင်ပွဲမှာ မြန်မာကိုယ်စားပြုလက်ဝှေ့သမားအဖြစ် ဘရော်နီကာက တယောက်တည်း လာပြီး ယှဉ်ပြိုင်တာ ဖြစ်ပါတယ်။
Thai Fight က ဘရော်နီကာနဲ့ ၃ နှစ် စာချုပ်ချုပ်ဆိုလိုက်ပြီး မြန်မာနိုင်ငံက လက်ဝှေ့သမား တယောက်ကို ပထမဆုံးစာချုပ်ဆို ပုံမှန်ထိုးသတ်ခွင့်ပြုလိုက်တာ ဖြစ်ပါတယ်။
