ထိုင်းနိုင်ငံမှာ အောက်တိုဘာလ ၁၆ ရက်ညက  ကျင်းပတဲ့ Thai Fight မွေထိုင်းလက် ဝှေ့ပြိုင်ပွဲမှာ မြန်မာနိုင်ငံက ကရင်နီအမျိုးသမီးလက်ဝှေ့မယ် ဘရော်နီကာ  (Vero V.Rujirawong) က  ပြိုင်ဘက် ဘရားဇီးနိုင်ငံသူ မာရီယာနာကို အလဲထိုး အနိုင်ရရှိသွားပါတယ်။

မနေ့ညကပွဲမှာ ဘရော်နီကာဟာ ဘယ်ညာတွဲလုံး လက်သီးချက်တွေ၊ တံတောင်ရိုက်ချက်တွေနဲ့ ခြေကန်ချက်တွေအစုံသုံးပြီး ပြိုင်ဘက် ဘရာဇီးလက်ဝှေ့မယ်ကို ယှဉ်ပြိုင်ထိုးသတ်ခဲ့တာ ဖြစ်ပါတယ်။

ဒုတိယအချီမှာတော့ ဘရော်နီကာက ပြိုင်ဘက်ရဲ့ မျက်နှာကိုထိုးနေရာကနေ နံကြားကို အားပြင်းတဲ့ ဘယ်လက်သီးတစ်လုံးပစ်သွင်း လိုက်ရာမှာတော့ ပြိုင်ဘက်လက်ဝှေ့မယ် မခံနိုင်တော့ပဲ လဲကျသွားတဲ့အတွက် ဘရော်နီကာက အနိုင်ရသွားပါတယ်။ 

ပြိုင်ဘက် ဘရားဇီးနိုင်ငံသူ မာရီယာနာဟာ မွေထိုင်းလက်ဝှေ့ပြိုင်ပွဲတွေမှာ  နိုင်ပွဲပေါင်း ၂၅ ပွဲရရှိထားသူဖြစ်ပြီး မနေ့ညက ပြိုင်ပွဲမှာတော့ ဘရော်နီကာကို ရှုံးနိမ့်ခဲ့တာ ဖြစ်ပါတယ်။

ဘရော်နီကာဟာ လက်ရှိအချိန်ထိ  ပွဲပေါင်း ၃၀ ကျော် ကစားခဲ့ရာမှာနိုင်ပွဲ ၁၆ ပွဲ၊ ရှုံးပွဲ ၂ ပွဲ၊ သရေ ၁၇ ပွဲ ဖြစ်ပါတယ်။  Thai Fight မွေထိုင်းလက်ဝှေ့ပွဲတွေမှာတော့ သူဟာ ၆ ပွဲဆက်တိုင် အနိုင်ရထားပါတယ်။