ကမ္ဘာ့ဖလားပြိုင်ပွဲကို နောက်ဆုံးဗိုလ်လုပွဲကစားပြီး နှုတ်ဆက်ရမယ့်အပေါ် ကျေနပ်ဂုဏ်ယူကြောင်း မက်ဆီက ပြောပါတယ်။
အသက် ၃၅ နှစ်ရှိ မက်ဆီဟာ အခုနှစ်ကမ္ဘာ့ဖလားဗိုလ်လုပွဲစဉ်ဟာ သူ့အတွက် နောက်ဆုံး ကမ္ဘာ့ဖလားပွဲစဉ်ဖြစ်လာမယ်လို့ ပြောခဲ့တာပါ။
“ကျနော့်ရဲ့ ကမ္ဘာ့ဖလားပြိုင်ပွဲခရီးကို ဗိုလ်လုပွဲစဉ်ကစားပြီး အဆုံးသတ်ရမယ့်အပေါ် ပျော်ရွှင်မိပါတယ်။ ဒါကအလွန်ဂုဏ်ယူကျေနပ်စရာလည်း ကောင်းပါတယ်။ ကမ္ဘာ့ဖလားဆိုတာက နောက်ထပ် ပြိုင်ပွဲ တစ်ခုပြီးတစ်ခုဆက်ရှိနေမှာပါ။ ကျနော်ကတော့ နောက်ထပ်ပြိုင်ပွဲ ဆက်ကစားနိုင်မယ် မထင်ပါဘူး။ ဒါပေမဲ့ ဗိုလ်လုပွဲစဉ် ကစားပြီး နှုတ်ဆက်ရမှာက နှစ်သက်စရာ ကောင်းပါတယ်”လို့ မက်ဆီက ပြောပါတယ်။
မက်ဆီဟာ ကမ္ဘာ့ဖလားပြိုင်ပွဲ ၅ ကြိမ်ဆက်တိုက် ပါဝင်ကစားခဲ့ပြီး ဗိုလ်လုပွဲစဉ်ကစားအပြီးမှာ ပွဲအများဆုံးကစားသမားအဖြစ် စံချိန်တင်နိုင်မှာပါ။
မက်ဆီဟာ အခုနှစ် ကမ္ဘာ့ဖလားပြိုင်ပွဲမှာ သွင်းဂိုး ၅ ဂိုးသွင်းယူထားပြီး ဂိုးသွင်းအများဆုံး ရွှေဖိနပ်ဆုနဲ့ ပြိုင်ပွဲရဲ့ အကောင်းဆုံးဘောလုံးသမား ရွှေဘောလုံးဆုတွေကိုပါ ရယူဖို့ မျှော်လင့်နိုင်ပါတယ်။
မော်ရိုကိုဘောလုံးအဖွဲ့ချုပ်ဟာ ပြင်သစ်နဲ့ ကစားမယ့် ဆီမီးဖိုင်နယ်ပွဲစဉ်အတွက် ပွဲကြည့်လက်မှတ် ၁၃၀၀၀ အခမဲ့ဖြန့်ဝေပေးခဲ့တယ်လို့ သိရပါတယ်။
ကာတာနိုင်ငံမှာရှိတဲ့ မော်ရိုကိုသံရုံးရဲ့ စီစဉ်ပေးမှုနဲ့ မော်ရိုကိုအသင်း အားပေးသူတွေအတွက် လက်မှတ်တွေ အခမဲ့ဖြန့်ဝေခဲ့တာပါ။
လက်ရှိ ချန်ပီယံ ပြင်သစ်နဲ့ မော်ရိုကိုအသင်းတို့ရဲ့ ပွဲစဉ်ကို ပရိသတ် ၇၀,၀၀၀ နီးပါးဝင်ဆံ့တဲ့ Al Bayt ကွင်းမှာ ယှဉ်ပြိုင်ကစားကြမှာပါ။
ဒါ့အပြင် မော်ရိုကို တော်ဝင်လေကြောင်းလိုင်းကနေ လေယာဉ် ၃၀ နဲ့ ပရိသတ်တွေကို ကာတာနိုင်ငံဆီ ပို့ဆောင်ပေးခဲ့ပြီး ထပ်တိုးလေယာဉ် ၇ စင်းလည်း ပျံသန်းပြေးဆွဲပေးခဲ့တယ်လို့ သိရပါတယ်။
မော်ရိုကိုအသင်းဟာ ကွာတားဖိုင်နယ်အဆင့်မှာ နာမည်ကြီး ပေါ်တူဂီကို ၁ ဂိုး ဂိုးမရှိနဲ့ အနိုင်ယူ ကျော်ဖြတ်လာခဲ့တာပါ။
ဒါဟာ အာဖရိကအသင်းတသင်းအနေနဲ့ ပထမဆုံးအကြိမ် ဆီမီးဖိုင်နယ် တက်ခဲ့တာဖြစ်သလို မော်ရိုကိုအတွက်လည်း သမိုင်းဝင်အောင်မြင်မှုတခု ဖြစ်ခဲ့ပါတယ်။
