ကိုဗစ်-၁၉ ကာကွယ်ဆေးအတုအပတွေ တင်သွင်းရောင်းချတာ ကျန်းမာရေးဝန်ကြီးဌာနက ထုတ်ပြန်ထားတဲ့ ကာကွယ်ဆေးတွေ တင်သွင်းဖြန့်ဖြူးဆိုင်ရာ စည်းကမ်းချက်တွေကို လိုက်နာခြင်းမရှိဘဲ တင်သွင်းဖြန့်ဖြူးပါက ထိရောက်စွာ အရေးယူမယ်လို့ စစ်ကောင်စီ ကျန်းမာရေးဌာနက  အသိပေးထုတ်ပြန်ပါတယ်။

ယခုအခါ စျေးကွက်အတွင်းမှာ ကာကွယ်ဆေးအတုအပတွေ အွန်လိုင်းကနေ ရောင်းချနေတာ ရှိသလို တခြားနည်းလမ်းတွေနဲ့လည်း  ရောင်းချနေကြောင်း အဆိုပါ ကာကွယ်ဆေးတွေဟာ တရားဝင်တင်သွင်းလာတဲ့ ကာကွယ်ဆေးတွေ မဟုတ်တာကြောင့် ရောဂါကာကွယ်နိုင်ခြင်းမရှိတဲ့ အပြင်  ဘေးအန္တရာယ်ဖြစ်ပွားနိုင်လို့  ကျန်းမာရေးဝန်ကြီး ဌာနက တရားဝင်အသိအမှတ်ပြုထားတဲ့ ကာကွယ်ဆေးတွေကိုသာ  ထိုးနှံကြဖို့လည်း  တိုက်တွန်း နှိုးဆော်ထားပါတယ်။

ကာကွယ်ဆေးများထိုးနှံရာမှာ အရည်အသွေးကောင်းမွန်ပြီး  ဘေးကင်းစိတ်ချရတဲ့ ကာကွယ်ဆေးများဖြစ်စေဖို့ ထုတ်လုပ်တဲ့ ကုမ္ပဏီတွေက  တရားဝင်ရောင်းချပြီး အအေးလမ်းကြောင်း မပျက်ထားသိုသိမ်းဆည်းထားတဲ့ ကာကွယ်ဆေးတွေဖြစ်ဖို့လိုတယ်လို့ လည်းဆိုပါတယ်။

မြန်မာပြည်တွင်း ပုဂ္ဂလိက ဆေးဝါးလုပ်ငန်းရှင်တွေအနေနဲ့  နိုင်ငံတကာနဲ့ အာရှဒေသအတွင်းမှာ ထိုးနှံဆောင်ရွက်နေတဲ့ အရည်အသွေးအာနိသင်ကောင်းပြီး ဘေးအန္ကရာယ်ကင်းတဲ့ ကိုဗစ်-၁၉ ကာကွယ်ဆေးတွေကို ကိုယ့်အစီအစဉ်နဲ့ကိုယ် တင်သွင်းဖြန့်ဖြူးတာ‎၊ ကာကွယ်ဆေးထိုနှံပေးတာတွေ ဆောင်ရွက်နိုင်တယ်လို့ စစ်ကောင်စီက ခွင့်ပြုထားတာပါ။

ဒီလုပ်ငန်းတွေကို ဆောင်ရွက်ချင်တဲ့ လုပ်ငန်းရှင်တွေက သတ်မှတ်အထောက်အထားတွေနဲ့ အစားအသောက်နဲ့ ဆေးဝါးကွပ်ကဲရေးဦးစီးဌာနကို လျှောက်ထားရတာဖြစ်ပါတယ်။

ကိုဗစ်-၁၉ ကာကွယ်ဆေးတွေကို အစိုးရက ထိုးပေးနေတာရှိသလို ပုဂ္ဂလိကအဖွဲ့အစည်းတွေကနေ ထိုးပေးနေတာတွေလည်းရှိပါတယ်။ ဒါပြင် ပြင်ပ မှောင်ခိုဈေးကွက်မှာ ကာကွယ်ဆေးတွေ  တရားမဝင်တင်သွင်းပြီး   ဈေးကြီးပေးထိုးနှံနေကြတာတွေလည်း ရှိနေပါတယ်။ 

အိန္ဒိယနိုင်ငံ မွမ်ဘိုင်းနဲ့ ကိုလ်ကတ္တားတို့မှာ လူပေါင်း ၂၅၀၀ လောက်ဟာ ကိုဗစ်-၁၉ ကာကွယ်ဆေးအတုတွေ လက်ခံရရှိခဲ့တယ်လို့ ဒေသခံရဲဌာနက ပြောပါတယ်။

 ကာကွယ်ဆေးအတုတွေဟာ တကယ်တော့ ဆေးဝါးကုသရာမှာ သုံးနေကျ ဆလင်း ခေါ် ဆားဖျော်ရည် သို့မဟုတ် ပဋိဇီဝဆေးတွေ ဖြစ်တယ်လို့ မွမ်ဘိုင်းနဲ့ ကိုလ်ကတ္တားရဲဌာနက ပြောပါတယ်။ 

ကာကွယ်ဆေးအတုတွေဟာ မြို့ကြီး ၂ မြို့က ကာကွယ်ဆေးထိုးရာနေရာ ၁၇ ခုကို ရောက်ရှိခဲ့တယ်လို့ ဒေသခံမီဒီယာတွေက ဖော်ပြခဲ့ပါတယ်။ 

ပုဂ္ဂလိကဆေးရုံမှ ဆရာဝန်နှစ်ဦးအပါအ၀င် ဒီကိစ္စမှာ ပါဝင်ပတ်သက်နေတဲ့ သံသယရှိသူ ၁၀ ဦးကို ရဲက ဖမ်းဆီးထားပါတယ်။

 ရဲတွေဟာ ကာကွယ်ဆေးအတုတွေ အများကြီးနဲ့ အိုင်ဒီနံပါတ်အတုတွေ အများကြီးကို တွေ့ရှိခဲ့ပါတယ်။ 

ကာကွယ်ဆေးအတုတွေရဲ့ ဘေးထွက်ဆိုးကျိုးနဲ့ပတ်သက်ပြီး အရေးပေါ်အခြေအနေတွေ ပေါ်လာရင် ဆေးအတုတွေ ထိုးသွင်းခံထားရသူတွေကို ဂရုစိုက်ပေးဖို့ ဆေးဝန်ထမ်းတွေကို ဒေသခံအာဏာပိုင်တွေက စည်းရုံးရမယ်လို့ ကိုလ်ကတ္တား ကျန်းမာရေးအရာရှိတွေက မှာကြားထား ပါတယ်။ 

ကာကွယ်ဆေးအတုတွေ ထိုးသွင်းခံရသူတွေဟာ အိပ်ချင်နေပြီး လက်မောင်း နာကျင်ကိုက်ခဲတာတွေ ခံစားနေရပါတယ်။ 

သူတို့ကတော့ အိန္ဒိယနိုင်ငံမှာ ကိုဗစ်-၁၉ ကူးစက်ရောဂါ တတိယလှိုင်း မတိုင်ခင် အစစ်အမှန်ကာကွယ်ဆေးကို ဘယ်လိုရမလဲဆိုတာကို  အစိုးရိမ်ဆုံးဖြစ်နေရတာပါ။

 ဇွန် ၂၅ ရက်ကတော့ တစ်နိုင်ငံလုံးအတိုင်းအတာနဲ့ ကိုဗစ်-၁၉ ကာကွယ်ဆေးပေါင်း သန်း ၃၀၀ ကျော် (၃၀၇,၉၄၈,၇၄၄) ထိုးပေးပြီးသွားပြီလို့ Johns Hopkins တက္ကသိုလ် သိပ္ပံနှင့်အင်ဂျင်နီယာစင်တာ (CSSE) အရ သိရပါတယ်။ 

အိန္ဒိယနိုင်ငံရဲ့ COVID-19 ကူးစက်ခံရမှုဟာ ဇွန် ၂၅ ရက်အထိ  သန်း ၃၀ ကျော် (၃၀၁၃၄,၄၄၅) ရှိပြီး သေဆုံးသူပေါင်း ၄ သိန်းနီးပါး ရှိပါတယ်။