ကိုဗစ်-၁၉ ရောဂါ  တကျော့ပြန်လာမှာ စိုးရိမ်တာကြောင့် တရုတ်နိုင်ငံ ပေကျင်းမြို့မှာ ရောဂါ စစ်ဆေးမှုကို မေ ၇ ရက်က ပြန်လည် စတင်နေပါတယ်။ 

ရှန်ဟိုင်းမှာလိုမျိုး လူသန်းနဲ့ချီ တလကျော်ကြာ လော့ဒေါင်း မဖြစ်အောင်၊ နိုင်ငံတဝန်းလုံးမှာ ကိုဗစ်-၁၉ လုံးဝကင်းစင်ရေးအထိ ဆောင်ရွက်မယ်လို့ အာဏပိုင်တွေက ပြောပါတယ်။

စစ်ဆေးမှုတွေကို ပေကျင်းမြို့က သံရုံးတွေ၊ ကြီးကြီးမားမား အစိုးရရုံးတွေ တည်ရှိတဲ့  ချိုယောင်း မြို့နယ်ထဲမှာ နေ့စဉ် ဆောင်ရွက်သွားမယ်လို့ဆိုပါတယ်။ 

ကိုဗစ်-၁၉ လူနာတွေ တွေ့ရှိတဲ့ တခြား မြို့နယ်တွေက ပြည်သူတွေကလည်း စနေ၊ တနင်္ဂနွေ ပိတ်ရက်တွေမှာ စစ်ဆေးမှုခံယူဖို့ လိုအပ်ပါတယ်။ 

လူဦးရေ ၂၂ သန်းရှိတဲ့ ပေကျင်းမြို့မှာ ကိုဗစ်-၁၉ ကူးစက်မှုကြောင့် မြေအောက်ရထားဘူတာ ၆၀ လောက်ကို ပိတ်ထားရပါတယ်။ 

ဒီရက်ပိုင်း ကိုဗစ်-၁၉ ရောဂါ ကူးစက်မှုတွေ ပြန်တွေ့လာရလို့ မြို့နယ် အတော်များများမှာလည်း စားသောက်ဆိုင်တွေကို ပိတ်ခိုင်းထားပါတယ်။

ရေဦးမြို့မှာ ဩဂုတ်လ ၂ ရက်နေ့က ကိုဗစ်-၁၉ သံသယလူနာ ၉၃ ဦးကို စစ်ဆေးခဲ့ရာ ၄၈ ဦး ရောဂါပိုးတွေ့ရှိခဲ့တယ်လို့ ကိုဗစ်ကော်မတီရဲ့ထုတ်ပြန်ချက်အရ သိရပါတယ်။

စစ်ကိုင်းတိုင်း၊ ရေဦးမြို့မှာ ကျန်းမာရေးဝန်ထမ်း ၁၀ ဦးလောက် ကိုဗစ်-၁၉ ရောဂါပိုးတွေ့လို့ ဇူလိုင်လ ၂၆ ရက်နေ့ကစပြီး ကိုဗစ်စစ်ဆေးမှုတွေ တပတ်ကြာရပ်နားထားပြီး ဩဂုတ် ၂ ရက်နေ့က ပြန်လည်စစ်ဆေးခဲ့တာပါ။

မြို့မိမြို့ဖတစ်ဦးက “ကူးစက်မှုနှုန်းက ကျနော်တို့မြို့မှာ လုံးဝ မကျသေးဘူး။ အားလုံးသတိ ဝီရိယ ထားပြီး စည်းကမ်းတွေ လိုက်နာကြဖို့လိုပြီ။ သံသယ လူနာလောက်ပဲလာစစ်တာကို ၅၀ ရာခိုင်နှုန်းကျော် ပိုးတွေ့နေဆဲပဲ။ နောက်ဆရာဝန်ကြီးကလည်း ဒီတခေါက် ဆေးရုံတက်လူနာတွေက သက်ကြီးပိုင်းလည်း များပြီး အောက်ဆီဂျင် လိုအပ်ချက်လည်းရှိတော့ သေဆုံးမှုများနိုင်တယ်လို့ပြောတယ်ဗျ” လို့ ပြောပါတယ်။

ရေဦးမြို့မှာ ဇွန်လလယ်ကစပြီး ဩဂုတ် ၂ ရက်နေ့အထိ ကိုဗစ်အတည်ပြုလူနာပေါင်း ၄၀၃ ယောက်၊ သေဆုံးသူ ၁၀ ဦးနဲ့ သက်သာပျောက်ကင်းလို့ ဆေးရုံကဆင်းသွားသူ ၃၀၂ ‌ဦးရှိပြီလို့ သိရပါတယ်။