ရန်ကုန်၊ မင်္ဂလာဒုံစက်မှုဇုန်အတွင်းရှိ စက်ရုံ၊ အလုပ်ရုံတွေက အလုပ်သမားတွေရဲ့ ကိုယ်ရေးအချက်အလက်တွေကို ဧပြီ ၂၉ ရက် နောက်ဆုံးထားပြီး တပ်နယ်မှူးရုံးကို ပို့ရမယ်လို့ စာပေးပို့လာကြောင်း လုပ်ငန်းရှင်တွေဆီက သိရပါတယ်။
ရန်ကုန်တိုင်းစစ်ဌာနချုပ်မှာ ဧပြီ ၁၈ ရက်က တိုင်းမှူးနဲ့ တပ်နယ်မှူးတွေ အစည်းအဝေးပြုလုပ်ခဲ့ပြီး ဧပြီ ၁၉ ရက်မှာ ခရိုင်အုပ်ချုပ်ရေးမှူးရုံးတွေကို ညွှန်ကြားခဲ့တာဖြစ်တယ်လို့ လုပ်ငန်းရှင်တဦးက ပြောပါတယ်။
“တိုင်းအစည်းအဝေးပြီးမှ ခရိုင်တွေကို ညွှန်ကြားတာ။ မြောက်ဥက္ကလာ မင်္ဂလာဒုံတဝိုက်မှာ ဖြစ်တဲ့ ဗုံးပေါက်မှု၊ ပစ်ခတ်မှုတွေကြောင့် ကိုယ်ရေးအချက်အလက်တောင်းတာ။”
ဇေကမ္ဘာစက်မှုဇုန်အတွင်းရှိ စက်ရုံ၊ အလုပ်ရုံတွေက အလုပ်သမားတွေဟာ ကိုယ်ရေးအချက်အလက် ပေးရုံတင်မဟုတ်ဘဲ ရပ်ကွက်ရုံးတွေကိုပါ နေထိုင်တဲ့ လူဦးရေအလိုက် ဓာတ်ပုံရိုက်ပြီး ပေးရတယ်လို့ အထည်ချုပ်စက်ရုံ အလုပ်သမားတဦးက ပြောပါတယ်။
“ရွှေပေါက်ကံမှာ ဓာတ်ပုံရိုက်ပြီး ရုံးကိုပို့ပေးရတယ်။ သုံးယောက်နေရင် သုံးယောက်တွဲရိုက်၊ ငါးယောက်နေရင် ငါးယောက်တွဲပြီး ရိုက်ရတယ်။ ရိုက်မပို့ရင် ဧည့်စာရင်းမပေးဘူး။”
မဂ်လာဒုံလေတပ်စခန်းဌာနချုပ် မကြာခဏ ပစ်ခတ်ခံရပြီးနောက် စက်ရုံ၊ အလုပ်ရုံတွေက အလုပ်သမားတွေရဲ့ ကိုယ်ရေးအချက်အလက်ကို တောင်းခံတာဖြစ်တယ်လို့ တပ်နယ်မှူးရုံးနဲ့ နီးစပ်သူတဦးက ပြောပါတယ်။
“ဗိုလ်ချုပ်ဇော်ဟိန်းက ဗိုလ်မှူးချုပ်အောင်မင်းဦးကို မှာတယ်၊ ညီလေးရေ လေတပ် ခဏခဏအပစ်ခံရတာ မကောင်းဘူးနော်၊ အသံတွေထွက်နေတယ်။ စက်ရုံ၊ အလုပ်ရုံတွေကိုလည်း ကြည့်ထိန်းထား၊ လိုအပ်ရင် အချက်အလက်တွေ ယူထားလို့ပြောတယ်၊ အဲ့လိုပြောပြီး အခုစာထွက်လာတာပဲ။”
အဆိုပါညွှန်ကြားစာမှာ အလုပ်သမားတွေရဲ့ ကိုယ်ရေးအချက်အလက်တွေ ပေးပို့ဖို့နဲ့ စစ်တပ်က တောင်းပါက CCTV record ပေးဖို့၊ ဧည့်စာရင်းပုံမှန်တိုင်ဖို့နဲ့ အရေးပေါ်အခြေအနေမှာ စက်ရုံက စစ်တပ်နဲ့ပူးပေါင်းဖို့ အချက်အလက်တွေ ပါဝင်ပါတယ်။
ဧရာဝတီတိုင်း၊ ပုသိမ်မြို့မှာ စစ်တပ်အာဏာသိမ်းပြီးနောက်ပိုင်း ဘုရားဖူးခွင့်ရဖို့အတွက် ကိုယ်ရေးအချက်အလက်အပြည့်အစုံပြော ရတာမျိုးတွေ ရှိလာတယ်လို့ သိရပါတယ်။
ပုသိမ်မြို့ရဲ့ သမိုင်းဝင်စေတီတော်ဖြစ်တဲ့ ရွှေမုဌောစေတီတော်ကို ဖူးမျှော်ဖို့လာတဲ့ ပြည်သူတွေကို အကြမ်းဖက်စစ်ကောင်စီရဲ့အမိန့်နဲ့ ဘုရားလုံခြုံရေးတွေက ကိုယ်ရေးအချက်အလက် ပြည့်စုံအောင်မေးပြီးမှ ဝင်ခွင့်ပေးတယ်လို့ ဒေသခံတွေက ပြော ပါတယ်။
“ဘုရားက စစ်တပ်အာဏာသိမ်းပြီးမှ ပြန်ဖွင့်တာ၊ အရင်က ကိုဗစ်ကြောင့် ပိတ်ထားရတာ။ ကိုဗစ်ကာလကတောင် တောင်းတာမရှိဘူး ခုမှတောင်းတာ အဓိကတော့ ဗုံးခွဲခံရမှာ ကြောက်လို့ထင်တယ်၊ ဒါကလည်း ကျနော်တို့ပြည်သူတွေမလုပ်ဘူး သူတို့ပဲလုပ်မှာ” လို့ ဒေသခံ တဦးက ပြောပါတယ်။
ဘုရားဖူးဖို့အတွက် ခုလို ကိုယ်ရေးအချက်အလက်ပေးပြီး ဝင်ရတာဟာ ကိုယ့်ဘာသာ သာသာနကို ကြည်ညိုခွင့်ရဖို့အတွက် ကန့်သတ်ချက်တစ်ခုလိုဖြစ်နေတယ်လို့ ဒေသခံအများစုက ပြောပါတယ်။
NLD အစိုးရလက်ထက်က ကိုဗစ်ရောဂါကာကွယ်ရေးအတွက် ပိတ်ထားတဲ့ဘုရားတွေကို စစ်တပ်က အာဏာသိမ်းပြီးနောက်ပိုင်း လပိုင်းအကြာမှာ ပြန်ဖွင့်ပေးခဲ့ပြီး ဘုရားဖူးမျှော်ဖို့အတွက် ကိုယ်ရေးအချက်အလက်တောင်းတာတွေ ပြုလုပ်လာတာပါ။
မြို့ပေါ်မှာမရှိတဲ့ ရပ်ကွက်တွေထဲက ဘုရား ကျောင်း ကန် စေတီ ပုထိုးတွေမှာတော့ အကြမ်းဖက်စစ်တပ်က ဝင်ရောက်တပ်စွဲပြီး ခံတပ်ပုံစံမျိုးပြုလုပ်ထားတာကာ ဒေသခံပြည်သူတွေကို စိတ်ဒုက္ခ အမျိုးမျိုးပေးနေတယ်လို့ ဒေသခံတွေကပြောဆိုပါတယ်။
