မူးယစ်ဆေးဝါးတွေကို သင်္ဘောကုန်းပတ်ပေါ်မှာ တင်ဆောင်လာခဲ့တဲ့ ရေငုပ်သင်္ဘောတပိုင်း ရေယာဉ်ကို ကိုလံဘီယာ ရေတပ်အရာရှိတွေက ဖမ်းမိခဲ့တဲ့ ဗီဒီယိုဖိုင်ကို ကိုလံဘီယာရေတပ်က မတ် ၁၁ ရက်မှာ ထုတ်ပြန်ခဲ့ပါတယ်။
ဒီစစ်ဆင်ရေးအတွင်းမှာ ကိုကင်း ကလိုရိုဟိုက်ဒရိတ် ၂ ဒသမ ၆ တန်ကို သိမ်းဆည်းရမိခဲ့ကြောင်း တာဝန်ရှိသူတွေက သတင်းထုတ်ပြန်ခဲ့ပါတယ်။
သင်္ဘောကို စစ်ဆေးချိန်အတွင်း သူတို့ဟာ မူးယစ်ဆေးဝါးတင်ပို့မှုနဲ့အတူ သေဆုံးသူ ၂ ဦးရဲ့ အလောင်းတွေအပြင် လောင်စာဆီမှ အဆိပ်အတောက်ငွေ့တွေကို ရှူရှိုက်မိတာကြောင့် ကျန်းမာရေးချို့တဲ့သူ ၂ ဦးကိုလည်း တွေ့ရှိခဲ့ကြောင်း အာဏာပိုင်တွေက ပြောပါတယ်။
ရေငုပ်သင်္ဘောတပိုင်း ပင်လယ်ရေယာဉ်၊ ကယ်ဆယ်ရေးသမားများ၊ ရုပ်အလောင်းတွေနဲ့ မူးယစ်မှောင်ခိုကုန်တွေကို အီကွေဒေါနယ်စပ်အနီးက ကိုလံဘီယာနိုင်ငံ အနောက်တောင်ပိုင်းရှိ တူမာကိုဆိပ်ကမ်းကို ရေတပ်က စောင့်ကြပ် ပို့ဆောင်ခဲ့ပါတယ်။
မူးယစ်ဆေးဝါးတင်ပို့မှုဟာ ဗဟိုအမေရိကနိုင်ငံတွေဆီ ဦးတည်သွားတာဖြစ်ကြောင်း ရေတပ်အရာရှိတွေက ပြောပါတယ်။
ကိုလံဘီယာရေတပ်ဟာ တရားမဝင် ကုန်တင်ရေငုပ်သင်္ဘောကို ဇန်နဝါရီ ၂၃ ရက်မှာ ကြားဖြတ်ဖမ်းဆီးခဲ့ပြီးတဲ့နောက် ကိုကင်းဟိုက်ဒရိုကလိုရိုက် ၄ တန်ကျော်ကို သိမ်းဆည်းရမိခဲ့ပါတယ်။
ဒရုန်းနဲ့ရိုက်ကူးထားတဲ့ ရုပ်သံတွေထဲမှာ ကုန်တင်ရေငုပ်သင်္ဘောကို ဆွဲပြီး သင်္ဘောကျင်းတခုဆီ ခေါ်သွားတာနဲ့ ဓာတုစမ်းသပ်မှုလုပ်ဖို့ အထုပ်အပိုးတွေကို တပ်သားအသီးသီးက တင်ဆောင်နေကြတာကို တွေ့ရပါတယ်။
ဒီစစ်ဆင်ရေးမှာ ကိုလံဘီယာရေတပ်၊ ကမ်းရိုးတန်းစောင့်တပ်တွေ၊ ရေတပ်လေကြောင်းနဲ့ နိုင်ငံခြားအကူအညီတွေ ပါခဲ့ပါတယ်။
သင်္ဘောပေါ်မှာတွေ့တဲ့ သင်္ဘောသားလေးဦးကို ဖမ်းဆီးထားပြီး မူးယစ်ဆေးဝါး ရောင်းဝယ်ဖောက်ကားမှု၊ ထုတ်လုပ်မှုနဲ့ သယ်ယူပို့ဆောင်မှုဆိုင်ရာ စွဲချက်တွေအတွက် စုံစမ်း စစ်ဆေးမှာပါ။
အခုနှစ် ပထမလအတွင်း ကိုလံဘီယာရေတပ်ဟာ ကိုကင်း ဟိုက်ဒရိုကလိုရိုက် ၁၀ တန်နီးပါး သိမ်းဆည်းရမိခဲ့ပြီးပါပြီ။
