ယူကရိန်းနိုင်ငံ မြို့တော်ကီးယက်ဗ်မှာ ရုရှားရဲ့ ကျူးကျော်စစ်ကြောင့် ၃ လကြာ ပိတ်ထားခဲ့တဲ့ အမေရိကန်သံရုံးကို မေ ၁၇ ရက်က ပြန်လည်ဖွင့်လှစ်လိုက်ပါပြီ။

သံရုံးဝင်းထဲမှာ အမေရိကန်ပြည်ထောင်စုရဲ့ အလံကို ပြန်လွှင့်ထားလိုက်ပါပြီလို့ သံရုံးရဲ့ ပြောခွင့်ရ ဒန်နီရယ်လန်ဂန်ကမ့်က ရိုက်တာသတင်းဌာနကို ပြောပါတယ်။ သံရုံးဖွင့်ဖွင့်ချင်းမှာ ဝန်ထမ်းနည်းနည်းနဲ့ လုပ်ငန်းတွေ ပြန်လုပ်မယ်လို့လည်း ပြောပါတယ်။

ကောင်စစ်ဝန်ရုံးကတော့ လောလောဆယ် ပြန်ဖွင့်မှာမဟုတ်သလို အမေရိကန်နိုင်ငံသားတွေ ယူကရိန်းနိုင်ငံဆီ ခရီးမသွားကြဖို့ သတိပေးချက်ကိုလည်း ပြန်ရုပ်သိမ်းမှာ မဟုတ်ဘူးလို့ ပြောပါတယ်။

အမေရိကန်သံရုံးကို ဖေဖောဝါရီ ၁၄ ရက်နေ့မှာ ပိတ်ခဲ့တာပါ။ နောက်ထပ် ၁၀ ရက်အကြာမှာ ရုရှားက ယူကရိန်းကို စတင်ကျူးကျော် တိုက်ခိုက်ခဲ့ပါတယ်။

သံရုံးဝန်ထမ်းတွေဟာ စစ်ဖြစ်တဲ့ကာလ ပထမ ၂ လမှာ ပိုလန်ဘက်အခြမ်းမှာ ရှိနေခဲ့ကြပြီး မေ ၂ ရက်မှာတော့ သံရုံးတာဝန်ခံ ခရစ္စတီးနားကက်ဗင်ဟာ ယူကရိန်းကို တခေါက် ပြန်လာကြည့်ပြီး အခုတော့ သံရုံးကို ပြန်ဖွင့်လိုက်တာပါ၊

အမေရိကန်နည်းတူ ပြင်သစ်၊ ဂျာမနီ၊ ဗြိတိန်တို့ကလည်း ကီးယက်ဗ်မှာ သံရုံးတွေကို ပြန်ဖွင့်ထားလိုက်ကြပြီး ဖြစ်ပါတယ်။

ယူကရိန်းနိုင်ငံ ကီးယက်ဗ်မှာ အမေရိကန် သံရုံးကို မေလအကုန်မှာ ပြန်ဖွင့်သွားဖို့ မျှော်မှန်းထားတယ်လို့ သံရုံးယာယီတာဝန်ခံက မေ ၂ ရက်မှာ ပြောပါတယ်။ 

အမေရိကန်သံတမန်တွေဟာ ရုရှားက ယူကရိန်းကို ကျူးကျော်တဲ့စစ် မစတင်ခင် ၂ ပတ်ကတည်းက  ကီယက်ဗ်ကနေ ထွက်ခွာသွားခဲ့ကြတာပါ။ 

သံရုံး လုပ်ငန်းတွေကို အနောက်ဘက်က ပိုလန်နဲ့ နယ်စပ် ယူကရိန်း မြို့တမြို့ ဖြစ်တဲ့ လီဗြူး မြို့ဆီကို ပြောင်းရွှေ့ခဲ့ပြီး နောက်တော့ ပိုလန်ဘက်အခြမ်းကို ပြောင်းရွှေ့သွားပါတယ်။ 

“မေ ၂ ရက်က ယူကရိန်းကို နေ့ချင်းပြန်အနေနဲ့ ပထမဆုံး ပြန်လာတာပါ။ နောက်တပတ်၊ နှစ်ပတ်လောက်ကြာရင် ထပ်လာဖို့ရှိပါတယ်။ အခြေအနေပေးမယ်ဆိုရင် ဒီလကုန်လောက်မှာ ကီယက်ဗ်ကို ပြန်လာပါမယ်” လို့ ယူကရိန်း နိုင်ငံဆိုင်ရာ အမေရိကန်သံရုံး ယာယီသံအမတ်ကြီး ခရစ္စတီးနား ကီဗင်က ပြောပါတယ်။

ရုရှားက စစ်မျက်နှာကို ယူကရိန်းမြို့တော် ကီယက်ဗ်ကနေ အရှေ့ပိုင်းနဲ့ တောင်ပိုင်းကို ပြောင်းလဲလိုက်တဲ့နောက် အနောက်နိုင်ငံ သံရုံးတွေ အတော်များများဟာ ကီယက်ဗ်မြို့မှာ ပြန်လည် အခြေချနေကြပြီ ဖြစ်ပါတယ်။ 

ဒိန်းမတ်၊ ပြင်သစ် အပါအဝင် နိုင်ငံအတော်များများလည်း ကီယက်ဗ်မှာ ဖွင့်ထားတဲ့ သူတို့သံရုံးကို ရုရှားရဲ့ကျူးကျော်စစ်စတင်တဲ့ ဖေဖော်ဝါရီ ၂၄ ရက်နေ့ နောက်ပိုင်းကတည်းက ပိတ်ထားခဲ့ပြီး အခု ပြန်ဖွင့်တော့မယ်လို့ ကြေညာထားကြပါတယ်။