အမေရိကန်နိုင်ငံ၊ ဒါးလက်စ်မြို့မြောက်ဘက်က လူစည်ကားတဲ့ ကုန်တိုက်တစ်ခုမှာ မေ ၆ ရက်က သေနတ်သမား တဦးရဲ့ ပစ်ခတ်မှုကြောင့် လူကိုးယောက်ထက်မနည်း ပစ်ခတ်ခံရပြီး ဒဏ်ရာရရှိ သွားပေမဲ့ ရဲတွေက မေ ၇ ရက်ထိ လူဘယ်နှယောက် သေဆုံးခဲ့တယ်ဆိုတာကို အတည် မပြုနိုင်သေးဘူးလို့ ပြောပါတယ်။

သေနတ်သမားက တကိုယ်တော် လှုပ်ရှားသွားတယ်လို့ ယုံကြည်ကြောင်း အာဏာပိုင်တွေက ပြောပါတယ်။ 

တက္ကဆက်ပြည်နယ် အယ်လန်မြို့ထဲက အယ်လန် ပရီမီယံအောက်လက်စ်ကုန်တိုက်တန်း အပြင်ဘက်မှာ သေနတ်သမားက စတင် ပစ်ခတ်အပြီး ရဲအရာရှိ တယောက်က သေနတ်သမားကို ပစ်သတ်ခဲ့တယ်လို့ မြို့ ရဲအုပ် ဘရိုင်ယန်ဟာဗေးက သတင်းစာရှင်းလင်းပွဲမှာ ပြောပါတယ်။

အယ်လန်မြို့ မီးသတ်တပ်ဖွဲ့ဟာ သေနတ်ဒဏ်ရာနဲ့ လူ ၉ ယောက်ထက်မနည်းကို ဆေးရုံတွေဆီပို့ ပေးခဲ့တယ်လို့ မီးသတ်တပ်ဖွဲ့ အကြီးအကဲ ဂျွန်ဘွိုက်ဒ်က ပြောပါတယ်။

နောက်ထပ် တခြားလူ ၃ယောက်လောက်လည်း ဒဏ်ရာရခဲ့နိုင်တယ်လို့ သူက ဆက်ပြောပေမဲ့ ဒဏ်ရာရသူတွေရဲ့ အခြေအနေကိုတော့ သူက မပြောခဲ့ ပါဘူး။

ကုန်တိုက်တန်းရဲ့ အပြင်ဘက်က လူသွားစင်္ကြန်ပေါ်မှာ သွေးတွေနဲ့ အလောင်းဖြစ်ပုံရတာတွေကို အဝတ်ဖြူနဲ့ အုပ်ထားတာတွေကို မြင်ရပါတယ်။

ဒီပစ်ခတ်မှုဟာ ပြောမပြနိုင်လောက်တဲ့ ကပ်ဆိုးပဲလို့ တက္ကဆက်ပြည်နယ် အုပ်ချုပ်ရေးမှူးက ပြောပါတယ်။

လူဦးရေ တသိန်းလောက်နေတဲ့ အယ်လန်မြို့အတွက် ဒေသအာဏာပိုင်တွေ လိုအပ်သမျှ အကူအညီကို ကမ်းလှမ်းဖို့ အစိုးရက ပြင်ဆင်နေတယ်လို့လည်း သူက ကြေညာချက် ထုတ်ပြန်ခဲ့ပါတယ်။

အင်ဒိုနီးရှားနိုင်ငံ၊ မာကတ်ဆာမြို့က ကုန်တိုက်တန်းတခုမှာ ဧပြီ ၂၄ ရက်က မီးလောင်ခဲ့ပေမဲ့ အသေအပျောက် မရှိခဲ့ဘူးလို့ ဒေသန္တရ အာဏာပိုင်တွေက ပြောပါတယ်။

ထရန်စ်စတူဒီယို မာကက်ဆာကုန်တိုက်တန်းရဲ့ ဒုတိယထပ်ကနေ ညနေ ၆ နာရီလောက်မှာ မီးစတင်လောင်ကျွမ်းခဲ့တာပါ။ ဒါကြောင့် စျေးဝယ်သူတွေ ထိတ်လန့်တကြား ဖြစ်ခဲ့ပြီး အဆောက်အဦထဲကနေ ဝရုန်းသုန်းကား ထွက်ပြေးခဲ့ကြတယ်လို့ မျက်မြင်သက်သေတွေ၊ မီဒီယာတွေနဲ့ လူမှုကွန်ရက်ပေါ်က ရုပ်သံတွေမှာ ဖော်ပြခဲ့ကြပါတယ်။

စျေးဆီလာသူတွေကို အဆောက်အဦထဲကနေ ရှင်းထုတ်ခဲ့လို့ အသေအပျောက် မဖြစ်ခဲ့ဘူးလို့ ကုန်တိုက်တန်းရဲ့ အမှုဆောင်အရာရှိချုပ် မက်စ် ခမ်ဘူအန်က ပြောပါတယ်။

အင်ဒိုနီးရှားမှာ သီတင်းပတ်တပတ်ကြာ အိဒ် အားလပ်ရက်အတွင်း လာရောက်လည်ပတ်သူတွေ ပြည့်ကြပ်နေချိန်မှာ မီးလောင်ခဲ့တာလည်း ဖြစ်ပါတယ်။ မီးလောင်ရတဲ့ အကြောင်းရင်းကိုတော့ မသိရသေးပါဘူး။