ထိုင်ဝမ်ဟာ ယူကရိန်းနိုင်ငံသားတွေကို သူတို့နိုင်ငံရဲ့ လွတ်လပ်မှုကို ကာကွယ်ဖို့ကြိုးပမ်းရာမှာ ကူညီခွင့်ရတာ ဂုဏ်ယူမိကြောင်းနဲ့ ဆက်လက်ကူညီသွားမယ်လို့ ထိုင်ဝမ်သမ္မတက စက်တင်ဘာ ၁၉ ရက်မှာ  ပြောကြားလိုက်ပါတယ်။

ထိုင်ဝမ်သမ္မတ ဆိုက်အင်းဝမ်က နယူးယောက်မြို့မှာရှိတဲ့ ကွန်ကရိုးဒီးယားထိပ်သီးအစည်းအဝေး အကြိုမှတ်တမ်းတင် ဗွီဒီယိုမိန့်ခွန်းမှာ ပြောကြားခဲ့တာပါ။

ကိုယ်ပိုင်အုပ်ချုပ်ခွင့်ရ ထိုင်ဝမ်ကျွန်းဟာ လူအများစုဆီကနေ ရရှိခဲ့တဲ့ ဒေါ်လာ သန်း ၃၀ ကျော်ကို လူသားချင်းစာနာထောက်ထားမှုဆိုင်ရာ ကယ်ဆယ်ရေးအတွက် လှူဒါန်းခဲ့ပြီး ရုရှားနိုင်ငံကို အနောက်နိုင်ငံတွေက ပိတ်ဆို့အရေးယူမှုတွေ လုပ်ထားရာမှာလည်း ပါဝင်ခဲ့ပါတယ်။

ယူကရိန်းရဲ့အတိဒုက္ခကို ထိုင်ဝမ်က ကျယ်ကျယ်ပြန့်ပြန့် စာနာခဲ့ပြီး အဲဒီအခြေအနေဟာ ထိုင်ဝမ်ရဲ့ တရုတ်ဆီကနေ ရင်ဆိုင်နေရတဲ့ အခြေအနေနဲ့ ခြိမ်းခြောက်မှုတွေကို ပြိုင်တူမြင်နေရကြောင်း တိုင်ပေအစိုးရက ပြောထားပါတယ်။

ထိုင်ဝမ်ဟာ စစ်ရေးအရ ခြိမ်းခြောက်မှုနဲ့ သြဇာလွှမ်းမိုးမှုဆိုင်ရာ စစ်ဆင်ရေးတွေ အပါအဝင် တရုတ်ဆီကနေ ပိုပြင်းထန်တဲ့ ခြိမ်းခြောက်မှုတွေနဲ့ ရင်ဆိုင်နေရကြောင်း ထိုင်ဝမ်သမ္မတက ပြောကြားခဲ့ပါတယ်။ 

လန်ဒန်မြို့က ဘက်စ်ကားတွေလိုပဲ တိုက်စစ်မှူးသစ် ဒါဝင်နူနက်ဇ်ရဲ့သွင်းဂိုးတွေ လာလိမ့်မယ်လို့ လီဗာပူးနောက်ခံလူ အာနိုးလ်ကပြောပါတယ်။ 

ဘင်ဖီကာအသင်းကနေ ယူရိုသန်း ၁၀၀ အထိ မြင့်မားသွားနိုင်တဲ့ ပြောင်းရွှေ့ကြေးနဲ့ခေါ်ယူခဲ့တဲ့ တိုက်စစ်မှူး ဒါဝင်နူနက်ဇ်ဟာ လီဗာပူးနဲ့ ခြေစမ်းပွဲ ၂ ပွဲမှာ ဂိုးသွင်းယူနိုင်ခြင်းမရှိခဲ့ပါဘူး။ အဲဒီအပေါ်မှာ နူနက်ဇ်ရဲ့ ဂိုးသွင်းစွမ်းရည်အပေါ် ဝေဖန်သုံးသပ်မှုတွေ ထွက်ပေါ်လာခဲ့တာပါ။ 

အသင်းဖော် အာနိုးလ်ကတော့ နူနက်ဇ်ဟာ အသင်းရဲ့ကစားပုံကို လေ့လာသင်ယူနေဆဲဖြစ်ပြီး အသင်းဖော်တွေဘက်ကလည်း နူနက်ဇ်ရဲ့ ကစားပုံကို လေ့လာနေဆဲဖြစ်တယ်လို့ ပြောပါတယ်။ 

“သူဂိုးတွေ သွင်းယူနိုင်ဖို့ ကျနော်တို့က ကူညီပေးသွားမယ်ဆိုတာ သေချာပါတယ်။ သူ့အနေနဲ့ အသင်းအတွက် ပထမဆုံးသွင်းဂိုးရဖို့ ရုန်းကန်နေရပေမယ့် တချိန်မှာတော့ လန်ဒန်က ဘက်စ်ကားတွေလို သူ့ရဲ့သွင်းဂိုးတွေ လာတော့မယ်ဆိုတာ သေချာပါတယ်” လို့ အာနိုးလ်က ပြောပါတယ်။ 

မနှစ်က ဘင်ဖီကာမှာ ၂၆ ဂိုး သွင်းခဲ့တဲ့ တိုက်စစ်မှူး နူနက်ဇ်ဟာ မန်ယူနဲ့ပွဲမှာ နာရီဝက်ခန့် လူစားလဲကစားခဲ့သလို ခရစ္စတယ်ပဲလေ့နဲ့ပွဲမှာလည်း နာရီဝက်သာ လူစားလဲ ကစားခွင့်ရခဲ့ပါတယ်။