စပိန်နိုင်ငံ ဘာဂို့စ်ပြည်နယ်မှာ ဇူလိုင် ၂၄ ရက်က စတင်လောင်ကျွမ်းတဲ့ တောမီးနဲ့ ပတ်သက်ဆက်နွှယ်ပြီး အသက် ၄၇ နှစ်အရွယ် အမျိုးသားတဦးကို ဖမ်းဆီးလိုက်တယ်လို့ ဇူလိုင် ၂၆ ရက်မှာ စပိန်ရဲတပ်ဖွဲ့က သတင်းထုတ်ပြန်ချက်ထားပါတယ်။

ဘာဂို့စ်ပြည်နယ်၊ Tejada y Quintanilla del Coco မှာရှိတဲ့ လယ်တောတခုမှာ ကောက်ရိတ်စက် လည်ပတ်မှုအတွင်း ပေါ့ဆမှုကြောင့် မီးစလောင်ခဲ့တာဖြစ်နိုင်ကြောင်း ရဲတပ်ဖွဲ့က ပြောပါတယ်။

သူတို့ရဲ့ စုံစမ်းစစ်ဆေးမှုအရ မီးဘေးအန္တရာယ်ကြောင့် ဒေသအတွင်း ရိတ်သိမ်းတာကို တားမြစ်ပိတ်ပင်ထားချိန် ဒေသစံတော်ချိန် ၁၂ နာရီဝန်းကျင်မှာ မီးစတင်လောင်ကျွမ်းခဲ့တာလို့ ဆိုပါတယ်။

နေ့လယ်အချိန်ကနေ ဒေသစံတော်ချိန် ညနေ ၅ နာရီအတွင်း ရိတ်သိမ်းတာကို ခွင့်မပြုထားပါဘူး။

မီးလောင်မှုကြောင့် ဟက်တာ ၃,၀၀၀ လောက် (ဧက ၇,၄၁၃) လောင်ကျွမ်းခဲ့ပြီး လူနေအိမ်ခြေ ၉၀၀ လောက်ကို ဘေးလွတ်ရာ ရွှေ့ပြောင်းပေးခဲ့ရပါတယ်။

စပိန်နိုင်ငံဟာ နွေရာသီ စတင်ချိန်ကတည်းက အပူလှိုင်းနှစ်ခုကို ကြုံတွေ့ခဲ့ရပြီး အစိုးရကိန်းဂဏန်းတွေအရ ဇူလိုင် ၁၇ ရက်အထိ ဟက်တာ ၇၈,၀၀၀ (၁၉၂,၇၄၂.၂ ဧက) မီးလောင်ခဲ့ပြီး ဆယ်စုနှစ်အတွင်း အဆိုးရွားဆုံးဖြစ်ပါတယ်။

ရုရှားဟာ ခရိုင်းမီးယားဒေသမှ စွယ်စုံသုံး သီးနှံရိတ်စက်တွေကို ရုရှားသိမ်းပိုက်ထားတဲ့ ယူကရိန်း ဒေသ နှစ်ခုဆီ ပေးပို့လိုက်ကြောင်း ရုရှား-ခန့်အပ်တဲ့-ဒေသအုပ်ချုပ်ရေးအဖွဲ့ရဲ့ ကိုယ်စားလှယ်တဦးက ပြောကြားခဲ့ပါတယ်။ 

ဇာပိုရဇ်ဟီယာ နဲ့ ခါရ်ဆွန်း ဒေသတွေမှာ ရိတ်သိမ်းချိန်အတွင်း လယ်ယာသုံး စက်ယန္တရားတွေ ပြတ်လပ်သွားတာကို ကာမိစေဖို့ ပေးပို့လိုက်တာဖြစ်ကြောင်း ခရိုင်းမီးယားမြောက်ပိုင်း လိုဘာနော့ဗ်ကျေးရွာက အမည်မဖော်လိုသူ ရုရှားဩဇာခံ ဇာပိုရဇ်ဟီယာဒေသ အုပ်ချုပ်ရေးမှူးက သတင်းထောက်တွေကို ပြောကြားခဲ့ပါတယ်။ 

အရင်က ရှိခဲ့တဲ့ ပစ္စည်းကိရိယာတွေက ပျက်သွားတာမျိုး၊ အရင်ပိုင်ရှင်တွေက နယ်မြေပြင်ပကို ယူသွားတာမျိုးတွေကြောင့် ကောက်ရိတ်စက်တွေကို လိုအပ်နေတာ ဖြစ်ကြောင်း တာဝန်ရှိသူက ပြောပါတယ်။ 

ဇာပိုရဇ်ဟီယာရှိ အလုပ်အကိုင် စီမံခန့်ခွဲရေး အကြီးအကဲ အက်ဗ်ဂျဲနီ ဘာလစ်စကီက ဒီ စွယ်စုံသုံး ကောက်ရိတ်စက်တွေဟာ ရုရှား စိုက်ပျိုးရေးဝန်ကြီးဌာနက ပံ့ပိုးပေးထားကြောင်း လူမှုမီဒီယာမှာ ပြောကြားခဲ့ပါတယ်။ 

ရိတ်သိမ်းချိန်အတွင်း ဒီဒေသမှာ နောက်ထပ် လယ်ယာသုံးစက် ၇၅ စီး ထပ်ရရှိသင့်ကြောင်း သူက ဆိုပါတယ်။ 

ယူကရိန်းကတော့ ကမ္ဘာ့အကြီးဆုံး ဂျုံတင်ပို့သူ ရုရှားဟာ သူ့စစ်တပ်က သိမ်းပိုက်ထားတဲ့ ယူကရိန်းနယ်မြေထဲက ကောက်နှံစပါးတွေကို ခိုးယူနေကြောင်း စွပ်စွဲထားပြီး မော်စကိုကတော့ ဒါကိုငြင်းဆန်ထားပါတယ်။