ကော်သူးလေအုပ်ချုပ်နယ်မြေ၊ ခလယ်လွီထူခရိုင်တခုလုံးမှာ စစ်အာဏာသိမ်းပြီးချိန်ကတည်းက စစ်ဘေးကြောင့် အနည်းဆုံး စာသင်ကျောင်းပေါင်း ၁၀၀ ကျော် ပိတ်ခဲ့ရပြီး ကျောင်းသားကျောင်းသူအယောက် ၃၀,၀၀၀ ထက်မနည်း ပညာသင်ကြားခွင့် အခွင့်အရေးတွေ ဆုံးရှုံးခဲ့ရတယ်လို့ ကရင်အမျိုးသားအစည်းအရုံး(ကေအန်ယူ)က ထုတ်ပြန်ပါတယ်။
ဖေဖော်ဝါရီ ၁၃ ရက် မြန်မာနိုင်ငံ ကလေးသူငယ်များနေ့ကို ခလယ်လွီထူခရိုင် တပ်မဟာ (၃) မှာ ကျင်းပခဲ့ပြီး စစ်ဘေးရှောင် ကလေးသူငယ်တွေက လက်ရှိကြုံ တွေ့နေရတဲ့ အခြေအနေတွေအပေါ် ဆန္ဒထုတ်ဖော်ပြသခဲ့ကြတာဖြစ်ပါတယ်။
ဆန္ဒထုတ်ဖော်ခဲ့ကြတာတွေထဲမှာတော့ စစ်ဘေးရှောင် ကလေးသူငယ်တွေအနေနဲ့ တောထဲမှာ မအိပ်လိုတာ၊ ပြည်တွင်းစစ်ကို အလိုမရှိတာ၊ မြန်မာစစ်တပ်ကို ကြောက်ရွံ့တာ၊ ကြောက်ရွံ့စွာ နေထိုင်ရတာ၊ အိမ်ကို မီးရှို့ဖျက်ဆီးခံရတာ၊ ကျောင်းမတက်ရတာ၊ အိမ်ပြန်ချင်တာ၊ လေယာဉ် လာမပစ်စေချင်တာ၊ မိမိတို့ကို မြန်မာစစ်တပ်နဲ့ မခြိမ်းခြောက်စေချင်တာ၊ မြန်မာစစ်တပ်ကို မမြင်ချင်တာ၊ ကလေးသူငယ်အခွင့်အရေးကို အပြည့်အဝ ရယူလိုတာ၊ ကျောင်းတက်ချင်တာ တောထဲတွင် ပုန်းပြီးအိပ်နေရတာ၊ ငြိမ်းချမ်းလွတ်လပ်စွာ နေထိုင်ချင်တာတွေ၊ လက်နက်ကြီးအသံတွေ မကြားချင်တာတွေ စတဲ့ အချက်တွေ ပါဝင်နေတာ ဖြစ်ပါတယ်။
ခုလို မြန်မာနိုင်ငံ ကလေးသူငယ်များနေ့ကို စစ်ဘေးရှောင်နေရာမှာ ကျင်းပရတာက ကလေးသူငယ်တွေရဲ့ အခွင့်အရေးကိုချိုးဖောက်ခံရတာတွေ၊ ကလေးသူငယ်တွေ စစ်ဘေးဒဏ် ခံစားနေရတာတွေကို ကမ္ဘာကသိရှိစေဖို့ သူတို့ရဲ့ အသံတွေ အိပ်မက်တွေကို ထုတ်ဖော်ပြသဖို့ဖြစ်တယ်လို့ ကေအန်ယူက ဆိုပါတယ်။
မြန်မာနိုင်ငံမှာ အကြမ်းဖက်စစ်အုပ်စုက မတရား အာဏာသိမ်းယူထားခဲ့တဲ့ ကာလဟာ ၂ နှစ်ကျော် ကြာမြင့်လာခဲ့ပြီဖြစ်ကာ ဒီကာလတွေအတွင်း နိုင်ငံရေး မတည်ငြိမ်မှုတွေနဲ့အတူ စီးပွားရေး၊ လူမှုရေး၊ ကျန်းမာရေး၊ ပညာရေး ကဏ္ဍတွေ အသီးသီးမှာ အဘက်ဘက်က ကျဆင်းနေခဲ့တာ ဖြစ်ပါတယ်။
ဒါ့အပြင် အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး တိုင်းဒေသကြီးနဲ့ ပြည်နယ်တွေအနှံ့အပြားမှာပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။
ကရင်အမျိုးသားအစည်းအရုံး၊ ကော်သူးလေ ဖာပွန် (မူတြော်) ခရိုင်၊ တပ်မဟာ ၅ နယ်မြေကို CDM လုပ် အလင်းဝင်ရောက်လာတဲ့ စစ်ကောင်စီတပ်ဖွဲ့ဝင် ၂ ယောက်ကို ဆုငွေ ပေးအပ်ချီးမြှင့်ခဲ့တယ်လို့ ကေအန်ယူ မူတြော်ခရိုင်က စက်တင်ဘာ ၂၀ ရက်မှာ သတင်းထုတ်ပြန်ပါတယ်။
သြဂုတ် ၂၁ ရက်က စစ်ကောင်စီရဲ့ ဖာပွန်ခရိုင်အခြေစိုက် အမှတ် ၈ စစ်ဆင်ရေးကွပ်ကဲမှုဌာနချုပ် လက်အောက်ခံ၊ အမှတ် ၄၀၁ ခြေမြန်တပ်ရင်းက တပ်သားအဆင့်ရှိ သာလှ (၂၄ နှစ်) နဲ့ ရဲသီဟထွန်း (၂၁ နှစ်) တို့ဟာ စစ်ကောင်စီတပ်ကို စွန့်ခွာကာ 3A−4 လက်ဖြောင့် သေနတ် ၁ လက်၊ ကျည် ၁၆ တောင့်နဲ့အတူ ကော်သူးလေ တပ်မဟာ ၅ တာဝန်ရှိသူတွေဆီ CDM လုပ် အလင်းဝင်ရောက်လာခဲ့တာပါ။
CDM လုပ် လာရောက်ပူးပေါင်းရာမှာ လက်နက်ယူဆောင်လာတဲ့ တပ်သား သာလှကို ငွေကျပ် ၁၅ သိန်းနဲ့ လက်နက်မယူဆောင်လာတဲ့ တပ်သား ရဲသီဟထွန်းကို ငွေကျပ် ၅ သိန်း ဆုငွေပေးအပ်ချီးမြှင့်ခဲ့ပါတယ်။
မတရားအာဏာသိမ်းပြီးနောက် စစ်ကောင်စီတပ်ဖွဲတွေက ပြည်သူတွေကို အကြမ်းဖက် ဖမ်းဆီးသတ်ဖြတ်နေတာ၊ ပြည်သူတွေရဲ့ အိုးအိမ်စည်စိမ်းတွေကို မီးရှို့ဖျက်ဆီးတဲ့ လုပ်ရပ်တွေကို မနှစ်မြို့တဲ့အပြင် ရှေ့တန်းရောက်စစ်သည်တွေဟာ အနေဆင်းရဲ အစားဆင်းရဲပြီး နောက်တန်းက အထက်အရာရှိတွေက ဇိမ်ကျကျနေထိုင်ကာ ပြည်သူကို ဒုက္ခပြန်ပေးနေတဲ့အပေါ် မနှစ်သက်တော့တဲ့အတွက် CDM လုပ် အလင်းဝင်လာကြတာပါ။
၂၀၂၂ ခုနှစ်အတွင်း တပ်မဟာ ၅ နယ်မြေကို စစ်ကောင်စီရဲ့ လုပ်ရပ်တွေကို မနှစ်သက်တော့တဲ့အတွက် ယာယီတပ်ရင်းမှူးအဆင့် ၁ ယောက်၊ ဗိုလ်ကြီး ၄ ယောက်၊ တပ်စုမှူး ၁ ယောက်၊ တပ်ကြပ် ၄ ယောက်၊ ဒုတပ်ကြပ် ၈ ယောက်နဲ့ တပ်သား ၅၂ ယောက် စုစုပေါင်း အယောက် ၇၀ အထိ CDM လုပ် အလင်းဝင်ရောက်လာတယ်လို့ တပ်မဟာ ၅ ပြောရေးဆိုခွင့်ရှိသူ ဗိုလ်မှူးကြီး စောကလယ်ဒိုက ပြောထားပါတယ်။
အခုလို ပြည်သူ့ရင်ခွင် ခိုလှုံလာသူတွေကို NUG နဲ့ ချိတ်ဆက်ပေးပြီးသွားတဲ့သူတွေ ရှိသလို လက်နက်ပါလာသူတွေ အနေနဲ့ ရရှိတဲ့ချီးမြှင့်ငွေနဲ့ အသက်မွေးဝမ်းကြောင်းအတွက် ရပ်တည်ဖို့ ပြင်ဆင်နေသူတွေရှိတဲ့အပြင် နိုင်ငံခြားထွက်ချင်သူတွေကို စီစဉ်ဆောင်ရွက်ပေးနေတာတွေ ရှိပြီး တဖက်မှာ စစ်ကောင်စီကို တိုက်ခိုက်နေတဲ့ အဖွဲ့အစည်းတွေနဲ့လက်တွဲပြီး ပြန်လည်တိုက်ခိုက်နေသူတွေလည်း ရှိပါတယ်။
