စစ်အာဏာရှင်ကို ဆန့်ကျင်တော်လှန်ခဲ့ကြတဲ့ မြန်မာ့နွေဦးတော်လှန်ရေးကာလဟာ အချိန် ၂ နှစ်ကျော် ကြာမြင့်လာခဲ့ပြီဖြစ်ကာ ဒီကာလတွေအတွင်း ရှေ့တန်းကနေ တတပ်တ အားပါဝင်နေကြတဲ့ ကျန်းမာရေးသူရဲကောင်း ဝန်ထမ်းတွေအတွက် တတ်နိုင်တဲ့ဘက်က ပါ ဝင်ထောက်ပံ့နိုင်ဖို့ NUG အစိုးရ ကျန်းမာရေးဝန်ကြီးဌာနက ဖိတ်ခေါ်နေပါတယ်။

နွေဦးကျန်းမာရေးသူရဲကောင်းအဖွဲ့ဝင် (Spring Healthcare Heroes - SHH) အစီအစဉ် ကတော့ "ကျန်းမာရေးစောင့်ရှောက်သူမှ ကျန်းမာရေးစောင့်ရှောက်သူသို့" ကူညီစောင့် ရှောက်မယ့်အစီအစဉ် ဖြစ်ပြီးတော့ တော်လှန်ရေးကာလ ရှေ့တန်းမှာ ရွပ်ရွပ်ချွံချွံ တိုက်ပွဲဝင် နေကြတဲ့ တော်လှန်ရေးရဲဘော်တွေနဲ့ စစ်ဘေးရှောင် ပြည်သူတွေကို ပင်ပန်းဆင်းရဲခံပြီး တသားတည်း ဆေးကုသမှုပေးနေကြတဲ့ ကျန်းမာရေးသူရဲကောင်းဝန်ထမ်းတွေကို ကူညီ စောင့်ရှောက်မယ့် အစီအစဉ် ဖြစ်ပါတယ်။

SHH ဟာ ကျန်းမာရေးစောင့်ရှောက်သူမှ ကျန်းမာရေးစောင့်ရှောက်သူသို့" ဆိုတဲ့အတိုင်း ကမ္ဘာ့နေရာအနှံ့အပြားမှာ ရှိနေတဲ့ ကျန်းမာရေးစောင့်ရှောက်သူတွေက မိမိတို့ရဲ့ ညီအကို မောင်နှမ၊ လုပ်ဖော်ကိုင်ဖက်တွေဖြစ်တဲ့၊ မြေပြင်မှာ တော်လှန်ရေးအတွက် တိုက်ပွဲဝင်နေ ကြတဲ့ ကျန်းမာရေးစောင့်ရှောက်သူတွေကို ပံပိုးကူညီသွားမှာဖြစ်ကာ Member ကြေးကို တလကို အမေရိကန်ဒေါ်လာ ၃၀ နှုန်း သတ်မှတ်ထားပြီး မိမိထည့်ဝင်နိုင်သလောက် ၃ လ၊ ၆ လ၊ ၁ နှစ် အထိ အဖွဲ့ဝင်အဖြစ် ပါဝင်နိုင်မယ်လို့ ဆိုပါတယ်။

“မိမိထောက်ပံ့လိုတဲ့ ရဲဘော်ရဲဘက် အရေအတွက်အလိုက် SHH အဖွဲ့ဝင်ကတ်တွေကို ဝယ် ယူနိုင်ပါတယ်။ ဥပမာ အလှူရှင်တစ်ဦးအနေနဲ့ လစဉ် SHH အဖွဲ့ဝင်ကတ် (၁၀) ကတ် ဝယ်ယူထားပါက ကျန်းမာရေးစောင့်ရှောက်သူ (၁၀) ဦးကို လစဉ်တာဝန်ယူ၊ ထောက်ပံ့ပေးနေတဲ့သဘောပဲ ဖြစ်ပါတယ်။”

အကြမ်းဖက်စစ်အုပ်စုကတော့ မြန်မာနိုင်ငံတဝန်းမှာ စစ်တပ်အာဏာသိမ်း ၂ နှစ်ကျော် ကာလအတွင်း ကျန်းမာရေးဝန်ထမ်း အယောက် ၇၀ လောက်ကို သတ်ဖြတ်ခဲ့တယ်လို့ NUG အစိုးရက ထုတ်ပြန်ပါတယ်။

ကျန်းမာရေးကဏ္ဍအပေါ် အကြမ်းဖက်စစ်ကောင်စီက လေကြောင်းတိုက်ခိုက်မှုတွေ၊ ကျန်းမာရေးဝန်ထမ်းတွေကို ဖမ်းဆီး၊ နှိပ်စက်၊ သတ်ဖြတ်မှုတွေနဲ့ တခြားအကြမ်း ဖက်မှုတွေကို လူမဆန်စွာ ဆက်တိုက်ကျူးလွန်ခဲ့တွေနဲ့ ပတ်သက်ပြီးတော့ ပြီးခဲ့တဲ့ ဖေဖော်ဝါရီ ၂၈ ရက်စွဲနဲ့ NUG အစိုးရအဖွဲ့၊ ကျန်းမာရေးဝန်ကြီးဌာန ထုတ်ပြန်ချက်မှာ ခုလိုဖော်ပြထားတာ ဖြစ်ပါတယ်။

လတ်တလောအချိန်ထိ ကျန်းမာရေးဝန်ထမ်း အယောက် ၉၀၀ လောက် ဖမ်းဆီးခံ ထားရပြီး အယောက် ၇၈၀ ကျော် ထိခိုက်ဒဏ်ရာရခဲ့ကာ အကြမ်းဖက်စစ်အုပ်စုက ဆေးရုံ/ဆေးခန်း ၁၆၀ ကျော်ကိုလည်း ဖျက်ဆီးတာတွေ ကျူးလွန်ခဲ့တယ်လို့ ဆိုပါတယ်။

စစ်အုပ်စုက ကျန်းမာရေးကဏ္ဍအပေါ် ရည်ရွယ်ချက်ရှိရှိ ပစ်မှတ်ထားကာ အကြမ်းဖက် တိုက်ခိုက်နေတာက ဂျီနီဗာကွန်ဗန်းရှင်း၊ ကုလသမဂ္ဂ လုံခြုံရေးကောင်စီ ဆုံးဖြတ်ချက် တွေ၊ နိုင်ငံတကာဥပဒေတွေနဲ့ ပြည်တွင်းဥပဒေတွေကို ပြောင်ပြောင်တင်းတင်း ချိုးဖောက်နေတာလို့လည်း NUG အစိုးရက ပြောပါတယ်။

လက်ရှိမှာတော့ နွေဦးကျန်းမာရေးသူရဲကောင်းအဖွဲ့ဝင် (Spring Healthcare Heroes - SHH) အစီအစဉ်မှာ Member ဝင်ဖို့အတွက် နိုင်ငံအသီးသီးရဲ့ ကိုယ်စားလှယ်တွေ စာရင်းတွေကိုလည်း NUG ကျန်းမာရေးဌာနက ထုတ်ပြန်ထားပါတယ်။

၂၀၂၂ ခုနှစ် တက္ကသိုလ်ဝင်စာမေးပွဲအောင်မြင်သူတွေထဲက ဆေးတက္ကသိုလ်နဲ့ သွားဘက်ဆိုင်ရာ ဆေးတက္ကသိုလ်တွေကို တက်လိုသူတွေအနေနဲ့ ကျောင်းလခ ငွေကျပ် သိန်း ၆၀၀ ကနေ သိန်း ၇၀၀ အထိအကုန်အကျခံပြီး တက်နိုင်မယ့်အစီအစဉ်ရှိတယ်လို့  စစ်ကောင်စီလက်အောက်ခံ ကျန်းမာရေးဝန်ကြီးဌာနက ကြေညာထားပါတယ်။

၂၀၂၂-ခုနှစ် တက္ကသိုလ်ဝင် စာမေးပွဲအောင်မြင်ပြီး ဆေးတက္ကသိုလ်တွေနဲ့ သွားဘက်ဆိုင်ရာ ဆေးတက္ကသိုလ်တွေကို ဝင်ခွင့်ရရှိသူတွေဟာ နိုင်ငံတော်အစီအစဉ်နဲ့ပညာသင်ကြားခွင့်(သို့မဟုတ်) မိမိအစီအစဉ်နဲ့ ပညာသင်ကြားခွင့်ကို ရွေးချယ်ပိုင်ခွင့်ရရှိကြမယ်လို့ ဆိုပါတယ်။

နိုင်ငံတော်အစီအစဉ်နဲ့ဆိုရင် ဆေးတက္ကသိုလ်တွေနဲ့ သွားဘက်ဆိုင်ရာ ဆေးတက္ကသိုလ်တွေမှာ တက္ကသိုလ်သင်တန်းကြေးအဖြစ် တစ်လကို ငွေကျပ် ၈၀၀ သာ ပေးသွင်းရမှာဖြစ်ပြီး မိမိအစီအစဉ်နဲ့ဆိုရင် တက္ကသိုလ်သင်တန်းကြေးကို ပညာသင်နှစ်အလိုက် လစဉ် ပေးသွင်းရမှာ ဖြစ်ပါတယ်။

ဆေးတက္ကသိုလ်တွေ အတွက်ကတော့ ပညာသင်ကာလ ပြီးဆုံးတဲ့အထိ ငွေကျပ်သိန်း ၆၀၀ အကုန်အကျခံရမှာဖြစ်ပြီး သွားဘက်ဆိုင်ရာ ဆေးတက္ကသိုလ်တွေကတော့ ပညာသင်ကာလ ပြီးဆုံးတဲ့အထိ ငွေကျပ်သိန်း ၇၀၀ အကုန်အကျခံရမှာ ဖြစ်ပါတယ်။

နိုင်ငံတော်အစီအစဉ်နဲ့ ပညာသင်ကြားခွင့်ရရှိတဲ့သူတွေကတော့ ဘွဲ့ရရှိပြီးတဲ့နောက် နိုင်ငံ့ဝန်ထမ်း အဖြစ် အနည်းဆုံး ၅ နှစ် မဖြစ်မနေ တာဝန်ထမ်းဆောင်ရမှာဖြစ်ပြီး နိုင်ငံ့ဝန်ထမ်းတွေသာ တက်ခွင့်ရှိတဲ့ ဘွဲ့လွန်သင်တန်းတွေကို ဆက်လက်တက်ရောက်ခွင့်ရရှိမယ်ဆိုရင် နောက်ထပ် ၅ နှစ် နိုင်ငံ့ဝန်ထမ်းအဖြစ် ဆက်လက်တာဝန် ထမ်းဆောင်ရမှာ ဖြစ်ပါတယ်။

မိမိအစီအစဉ်နဲ့ ပညာသင်ကြားခွင့်ရရှိတဲ့သူတွေကတော့ လတ်တလောအနေနဲ့ နိုင်ငံ့ဝန်ထမ်းအဖြစ် ၅ မဖြစ်မနေ ဝင်ရောက်စရာမလိုပေမယ့် နိုင်ငံ့ဝန်ထမ်းတွေသာ တက်ရောက်ခွင့်ရှိတဲ့ ဘွဲ့လွန်သင်တန်းတွေ တက်ရောက်လိုလို့ဖြစ်စေ၊ နိုင်ငံ့တာဝန်ကို ဝင်ရောက်ထမ်းဆောင်ချင်လို့ဖြစ်စေ နိုင်ငံ့ဝန်ထမ်းအဖြစ် ဝင်ရောက်တာဝန် ထမ်းဆောင်လို ပါကလည်း တာဝန်ထမ်းဆောင်နိုင်မှာ ဖြစ်ပါတယ်။

၂၀၂၂ ခုနှစ်အတွက် ဆေးတက္ကသိုလ်ဝင်ခွင့်တွေကိုလည်း စစ်ကောင်စီရဲ့ ကျန်းမာရေးဌာနက ခါတိုင်းနှစ်တွေထက် ရမှတ် ၅၀ လောက်လျှော့ချပြီးခေါ်ယူထားတာဖြစ်ပါတယ်။

စစ်ကောင်စီလက်အောက်က ကျန်းမာရေးဝန်ကြီးဌာနက ၂၀၂၂ ခုနှစ် တက္ကသိုလ်ဝင်စာမေးပွဲ အောင်မြင်ခဲ့သူတွေထဲက အမှတ်ပေါင်း ၄၅၀ နဲ့အထက် ရရှိသူတွေ ဆေးတက္ကသိုလ် လျှောက်ထားနိုင်တယ်လို့ သတ်မှတ်လိုက်ပါတယ်။

ဆက်လက်ပြီးတော့ ၆ ဘာသာ ရမှတ်စုစုပေါင်း အမှတ် ၄၅၀ နဲ့အထက် ရရှိသူတွေအနက် အင်္ဂလိပ်စာ၊ ဓာတုဗေဒ၊ ဇီဝဗေဒ၊ ၃ ဘာသာရမှတ်ပေါင်း အများ/အနည်းပေါ်မူတည်ပြီး ပထမဦးစားပေး ဆေးတက္ကသိုလ် လျှောက်ထားသူတွေကို ပဏာမအဆင့် ရွေးချယ်ခံရသူတွေအဖြစ် သတ်မှတ်ထားရှိမယ်လို့ ကျန်းမာရေး လူ့စွမ်းအားအရင်းအမြစ် ဦးစီးဌာနက သိရပါတယ်။

ဆေးတက္ကသိုလ်ဝင်ခွင့်ကို အရင်နှစ်တွေက ရမှတ်သတ်မှတ်ပေးတာမျိုးနဲ့ ဝင်ခွင့်ပေးတာမျိုး မဟုတ်ဘဲ တက္ကသိုလ်ဝင်ခွင့် လျှောက်ထားသူတွေရဲ့ ဦးစားပေးတက္ကသိုလ် လျှောက်ထားတာမျိုးကို ပြန်လည်စိစစ်ပြီး ရမှတ်အများဆုံးသူကနေ ဝင်ခွင့်ပေးမယ့် ဦးရေအပေါ် မူတည်ပြီး ရွေးချယ်ခဲ့တာပါ။

ဒါကြောင့် ဆေးတက္ကသိုလ်တွေရဲ့ ဝင်ခွင့်အမှတ်တွေဟာ နှစ်စဉ် အမြင့်ဆုံး ၆ ဘာသာ ရမှတ်ပေါင်း ၅၀၀ ကျော်အထိ ရှိခဲ့ပြီးတော့ အနိမ့်ဆုံးရမှတ်ဟာ ၅၀၀ ဝန်းကျင်အထိ ရှိခဲ့တာလို့ အရင်နှစ်တွေက ကြေညာခဲ့တဲ့ ဆေးတက္ကသိုလ်ဝင်ခွင့်တွေအရ သိရပါတယ်။

၂၀၂၂ ခုနှစ် တက္ကသိုလ်ဝင်စာမေးပွဲ အောင်မြင်သူတွေကတော့ ဆေးတက္ကသိုလ် ဝင်ခွင့်တွေကို အမှတ်သတ်မှတ်လိုက်ပြီး ဝင်ခွင့်ဖြေဆိုခွင့်ရသူတွေကို လူတွေ့နှုတ်မေးစာမေးပွဲ စစ်ဆေးသွားမှာဖြစ်ပြီး ပဏာမရွေးချယ်ထားသူအားလုံးဟာ စိတ်ပိုင်းဆိုင်ရာ ဆန်းစစ်ခြင်း (ရေးဖြေ) စာမေးပွဲကိုလည်း ဝင်ရောက်ဖြေဆိုရမှာ ဖြစ်ပါတယ်။

ဆက်လက်ပြီး သင်တန်းသား အပြီးသတ်ရွေးချယ်ခြင်းအနေနဲ့ အင်္ဂလိပ်စာ၊ ဓာတုဗေဒ၊ ဇီဝဗေဒ၊ ၃ ဘာသာပေါင်းရမှတ်နဲ့ လူတွေ့နှုတ်မေးစစ်ဆေးခြင်း ရမှတ်အပေါ် မူတည်ကာ အမှတ် အများ/အနည်းအလိုက်စီပြီး အမှတ်အများဆုံး ရရှိတဲ့သူတွေကို ဆေးတက္ကသိုလ်တွေအတွက် သတ်မှတ်ဦးရေပေါ်  မူတည်ရွေးချယ်သွားမယ်လို့ ဆိုပါတယ်။

စစ်ကောင်စီဟာ ဒီနှစ်ထဲမှာ တက္ကသိုလ်တွေကို ပြန်လည်ဖွင့်လှစ်ခဲ့ပေမဲ့ ကျောင်းတက်သူ မရှိသလောက် နည်းပါးနေတာကြောင့် ကျောင်းတက်မယ့်သူ များလာစေဖို့အတွက် အမျိုးမျိုး လုပ်ဆောင်နေပြီး တခြားတက္ကသိုလ်တွေက ကျောင်းသားတွေအနေနဲ့ ဆေးတက္ကသိုလ် တက်ချင်တယ်ဆိုရင် လျှောက်ထားနိုင်တယ်ဆိုပြီး ကြေညာခဲ့ပါသေးတယ်။