ရခိုင်ပြည်နယ်၊ ကျောက်တော်မြို့ရှိ မဟာမုနိဘုရားပေါ်မှာ တပ်စွဲထားတဲ့ စစ်ကောင်စီတပ်သားသုံးဦး မေ ၂၂ ရက်က ထွက်ပြေးသွားခဲ့ကြပြီး တဦးမှာ အေအေဘက် ခိုလှုံသွားတယ်လို့ ကျောက်တော်မြို့ ဒေသခံတွေက ပြောပါတယ်။
“ဟုတ်တယ်။ သူတို့သုံးဦးက မေလ ၂၂ ရက်နေ့ကတည်းက ထွက်ပြေးသွားကြတာလို့ သိရတယ်။ ကျနော်တို့ကတော့ ဒီနေ့မှပဲ အတိအကျ သိရတာ။ လက်နက်တွေတော့ ယူမသွားကြဘူးလို့တော့ သိတယ်ဗျ" လို့ စစ်ကောင်စီနဲ့ နီးစပ်တဲ့ ကျောက်တော်ဒေသခံတဦးက ပြောပါတယ်။
အေအေဘက် ခိုလှုံသွားသူဟာ ဧရာဝတီတိုင်း၊ ဟင်္သာတမြို့နယ်၊ ကုန်းကြီးကျေးရွာမှ အသက် ၃၀ အရွယ် ဒုတပ်ကြပ် ကံကောင်း၊ ကိုယ်ပိုင်အမှတ် ၄၃၇/၂၁၅ ဖြစ်ပြီး ရှမ်းပြည်နယ် တောင်ကြီးအခြေစိုက် တပ်မ ၅၅ မှဖြစ်ကာ ရခိုင်မှာ တာဝန်ကျနေတာ ၃ လခန့်ရှိပြီး မဟာမုနိဘုရားပေါ်မှာ တာဝန်ကျနေတာ ၁ လလောက်ပဲ ရှိသေးတယ်လို့ မဟာမုနိဘုရားအနီး နေထိုင်တဲ့ ဒေသခံတွေဆီက သိရပါတယ်။
သူနဲ့အတူ ထွက်ပြေးခဲ့တဲ့ နောက်ထပ် စစ်သား ၂ ဦးကတော့ ဘယ်နေရာကို ထွက်ပြေးသွားတယ်ဆိုတာ မသိဘူးလို့ ဆိုပါတယ်။
နိုင်ငံရေးလေ့လာသူတဦးက “အနာဂတ်မှာတော့ စစ်ကောင်စီတပ်သားတွေ ဒီလို ထွက်ပြေးကြပြီး လက်နက်ကိုင်တပ်ဖွဲတွေဆီ ခိုလှုံသွားနိုင်တဲ့ အနေအထား ရှိနေတယ်" လို့ သုံးသပ်ပါတယ်။
ကျောက်တော်မြို့အနီး မဟာမုနိဘုရားဝင်းထဲမှာရှိတဲ့ တပ်မတော်တပ်စခန်းတစ်ခုကို ဇွန် ၂၇ ရက်နေ့ ညနေပိုင်းမှာ အေအေက ဝင်ရောက်စီးနင်းခဲ့ပြီး လက်နက်တချို့ ယူဆောင်သွားတယ်လို့ ဒေသခံတွေက ပြောပါတယ်။
ဖြစ်စဉ်အသေးစိတ်ကို သေချာမသိရသေးပေမယ့် စစ်ကောင်စီလက်နက်ကိုင်တွေကတော့ ဒီမနက်မှာ မဟာမုနိဘုရားကို စစ်ကားတွေနဲ့ ရောက်ရှိလာခဲ့တယ်လို့ ဆိုပါတယ်။
ဒါနဲ့ပတ်သက်လို့ အေအေဘက်ကို ဒီဗွီဘီက ဆက်သွယ်မေးမြန်းနေပေမယ့် ဆက်သွယ်လို့ မရသေးပါဘူး။ ဒေသတွင်းမီဒီယာတွေကိုတော့ လူငယ်ဘာသာဘာဝ ဖြစ်ပျက်ခဲ့တာဖြစ်ပြီး ဖြေရှင်းပြီးသွားပြီလို့ အေအေပြောခွင့်ရ ခိုင်သုခက ဖြေကြားထားပါတယ်။
စစ်ကောင်စီတပ်တွေဟာ အေအေနဲ့ဖြစ်ပွားခဲ့တဲ့ တိုက်ပွဲတွေအတွင်း ဘာသာရေး အဆောက်အအုံတွေ၊ ဘုရားဝင်းတွေထဲ တပ်စွဲထားခဲ့ကြတာဖြစ်ပြီး ခုချိန်ထိလည်း တပ်စွဲထားတဲ့နေရာ အများအပြား ရှိနေပါတယ်။
