စစ်ကိုင်းတိုင်း၊ မြောင်မြို့နယ်ရှိ ကျောက်ရစ်ရဲစခန်းကို နိုဝင်ဘာ ၉ ရက် မနက်ပိုင်းက ဒရုန်းနဲ့ ဗုံးသီး ၆ လုံးချပြီး တိုက်ခိုက်ခဲ့တယ်လို့ ဒေသကာကွယ်ရေးအဖွဲ့က ပြောပါတယ်။

ကျောက်ရစ်ရဲစခန်းဝင်းအတွင်းကို‌ ဒေသကာကွယ်ရေး ပူးပေါင်းအဖွဲ့က မနက် ၈ နာရီခွဲမှာ ဗုံးသီး ၂ လုံး၊ ၁၀ နာရီလောက်မှာ ဗုံး ၄ လုံးတို့ကို ဒရုန်းတွေမှာ ချိတ်ဆွဲပြီး ပစ်ချတိုက်ခိုက်ခဲ့တာလို့ သိရပါတယ်။

Black Eagle Defence Force-MMU တာဝန်ရှိသူတယောက်က “စုစုပေါင်း ဗုံးသီး ၆ လုံး သုံးတယ်။ စခန်းထဲက သူတို့ရှိမယ့် အဓိကကျတဲ့ နေရာတွေကို ရွေးချယ်ပစ်ချခဲ့တာပါ။ စကစဘက်က အထိခိုက် အသေပျောက်တွေ ရှိတယ်လို့ပဲ ကနဦး သိထားရပါတယ်။ အရေအတွက် အတိအကျတော့ မသိရသေးဘူး” လို့ ပြောပါတယ်။

တိုက်ခိုက်မှုအတွင်း ကျောက်ရစ်ရဲစခန်းအတွင်းမှ ပြန်လည်ပစ်ခတ်တာတွေရှိခဲ့ပြီး စစ်ကောင်စီတပ်ဘက်က အခြေအနေ အသေးစိတ်ကိုတော့ စုံစမ်းနေတယ်လို့ ဒေသကာကွယ်ရေးအဖွဲ့က ဆိုပါတယ်။

အဲဒီတိုက်ခိုက်မှုကို Black Eagle Defence Force-MMU၊  မြင်းမူမြို့နယ် ပကဖ၊ Farmer Revolution Force CHU (FRF)၊ မြောင်မြို့နယ် တော်လှန်ရေးတပ်-Myaung Revolution Army တို့ ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ နိုဝင်ဘာ ၆ ရက်ကလည်း မြောင်မြို့နယ် ကျောက်ရစ်ရဲစခန်းကို T.G.R Women Drone Force က ဒရုန်းနဲ့ ဗုံးသီးချတိုက်ခိုက်မှု ၂ ကြိမ် ပြုလုပ်ခဲ့ပါတယ်။

စစ်ကိုင်းတိုင်း၊ မြောင်မြို့နယ် ကျောက်ရစ်ရဲစခန်းကို ဒီနေ့ စက်တင်ဘာ ၁၉ ရက် မနက်က ဒရုန်းနဲ့ ဗုံးသီး ပစ်ချ တိုက်ခိုက်ခဲ့တယ်လို့ ဒေသကာကွယ်ရေးတပ်ဖွဲ့တွေက ပြောပါတယ်။

အဲဒီကျောက်ရစ်ရဲခန်းမှာ ဒရုန်းဖျက်ကိရိယာ (Jammer) တပ်ဆင်ထားပေမယ့် ရည်ရွယ်ထားတဲ့ ပစ်မှတ်ကို ထိရောက်အောင် တိုက်ခိုက်နိုင်ခဲ့တယ်လို့ ဆိုပါတယ်။

“ဒီ ၉ လပိုင်းထဲမှာ ကျနော်တို့ရဲ့ ဒရုန်း ၃ စီးကို သူတို့က ဖျက်ဆီးလိုက်နိုင်တယ်။ တစီးကိုတော့ သူတို့က ဆွဲခေါ်သွားပြီး အောက်ကနေ ပိုက်တွေကာပြီး ဝိုင်းဖမ်းကြတာ။ သူတို့ ရသွားတယ်။ နောက်တစီးက jammer မိပြီး စခန်းဘေးကျသွားတယ်။ နောက်တစီးကတော့ ထိန်းချုပ်မရတော့ဘဲ အီနာဂါ(ဗုံး)နဲ့အတူ ပေါက်ကွဲသွားတယ်။ အဲဒီနောက် စခန်းမှူးက ရဲစခန်းပေါ်မှာ ကြိုက်တဲ့ ဒရုန်းပျံခဲ့ ပြန်လမ်းမရှိစေရဆိုပြီး စိန်ခေါ်ထားတာ။ အဲဒါကြောင့် Jammer မိတဲ့နေရာကိုပဲ ရွေးလုပ်ပြခဲ့တယ်။ တိုက်ခိုက်မှုအတွင်း ရန်သူဘက်က ဒဏ်ရာရတာတော့ရှိတယ်။ အသေစာရင်းက မသိရသေးဘူးဗျ။ တခါတရံ ၂ ရက်လောက်နေမှ သိတာမျိုး ခဏ ခဏရှိတော့ အသုဘချမှပဲ အလောင်းဘယ်လောက်ဆိုတာ အတိအကျသိရတာမျိုးလည်း ရှိတယ်ဗျ” လို့ မြောင်မြို့နယ် ကာကွယ်ရေးနဲ့လုံခြုံရေးတပ်ဖွဲ့ (CDSOM) ရဲ့ တာဝန်ရှိသူက ပြောပါတယ်။ 

အဲဒီတိုက်ခိုက်မှုမှာ စခန်းပေါ်ကို ဒရုန်း ၂ စင်းနဲ့ အီနာဂါဗုံးသီး ၂ လုံး ပစ်ချခဲ့တာဖြစ်ပြီး ဒေသကာကွယ်ရေးတပ်ဖွဲ့တွေဖြစ်တဲ့ Wings Of The Irrawaddy၊ Chaung U Revolation Army - CRA ၊ CDSOM၊ Young Fighter နဲ့ နယ်မြေခံလုံခြုံရေးအဖွဲ့သားတွေ ပူးပေါင်းလုပ်ဆောင်ခဲ့တာဖြစ်တယ်လို့ ဆိုပါတယ်။ 

စက်တင်ဘာ ၁၆ ရက်နေ့ကလည်း မြောင်မြို့နယ် ကျောက်ရစ်ရဲစခန်းနဲ့ နနွမ်းကိုင်းရွာနားမှာ ကျေးရွာကို စစ်ကြောင်းထိုးပစ်ခတ်ခဲ့တဲ့ စစ်ကောင်စီတပ်ဖွဲ့ကို ဒေသကာကွယ်ရေးတပ်ဖွဲ့တွေက ကြားဖြတ်တိုက်ခိုက်ခဲ့ပြီး အဲဒီတိုက်ပွဲမှာ စစ်ကောင်စီတပ်ဖွဲ့ဝင် ၃ ယောက် သေဆုံးခဲ့တယ်လို့ သိရပါတယ်။