စစ်ကိုင်းတိုင်း၊ ကျွန်းလှမြို့‌ပေါ်မှာ လျှပ်စစ်မီတာခပေးဖို့ အကြွေးကျန်ရှိတဲ့ နေအိမ်တွေကို လျှပ်စစ်ဝန်ထမ်း‌တွေက ဖေဖော်ဝါရီ ၁၀ ရက်ကစပြီး ၁၂ ရက်အထိ မီတာပုံးတွေ လိုက်ဖြုတ်သိမ်းနေတယ်လို့ မြို့ခံတွေဆီက သိရပါတယ်။

ကျွန်းလှမြို့ခံ အမျိုးသားတဦးက “သူတို့က အဲဒီလို လှည့်လည်အော်လည်း ပြည်သူတွေက မီတာကြေးကို အတတ်နိုင်ဆုံး မပေးဆောင်ဘဲ နေကြတယ်။ တချို့လည်း မဆောင်နိုင်ကြဘူး။ အလုပ်အကိုင်က မရှိ၊ ငွေဝင်လမ်းကရှားတော့ မီတာဆောင်ဖို့လည်း မလွယ်ဘူး။ တချို့အိမ်တွေမှာ ၁၀ သိန်းက‌နေ သိန်း ၂၀ လောက်ထိ ကျတယ်။ ဆောင်ဖို့ဆိုတာ မလွယ်ဘူး။ ၁ လပိုင်းအကုန် နောက်ဆုံးဆောင်ဖို့ စစ်ကောင်စီဘက်က အမိန့်ထုတ်ထားတာ။ အခု ၂ လပိုင်းအထိ ဘယ်သူမှ သိပ်မဆောင်ကြတော့ မီတာရုံးကလူတွေက မီတာခမဆောင်တဲ့ အိမ်တွေကို မီတာတွေ လိုက်ဖြုတ်ကြတယ်။ ပိတောက်မြိုင်ရပ်ကွက်က အိမ်ခြေ ၅၀ လောက် မီးဖြတ်ခံရတယ်” လို့ ပြောပါတယ်။

အရင်က မီတာကြွေးကျန်တွေကို အရစ်ကျခွဲပြီး ဆောင်ခွင့်ပြုထားရာကနေ ကြွေးကျန်မှန်သမျှကို ၂၀၂၃ ခုနှစ် ဇန်နဝါရီလကုန်မှာ အပြီးပေးဆောင်ဖို့ လိုက်လံကြေညာပြီးနောက် မီတာခမဆောင်နိုင်တဲ့ နေအိမ်တွေကို လိုက်လံဖြုတ်သိမ်းနေတာ ဖြစ်တယ်လို့ ဒေသခံတွေက ဆိုပါတယ်။

မြို့ခံတဦးက “မီတာတွေလိုက်ဖြုတ်တော့ ပြည်သူတွေလည်း ဒုက္ခရောက်ကြတယ်။ ရှိတဲ့သူတော့ ဆောင်ပေါ့။ မရှိတဲ့သူက အဖြုတ်ခံရုံပဲ။ ဘာမှမတတ်နိုင်ဘူး။ တချို့ဆို မီတာရုံးမှာဆောင်ဖို့ တန်းစီနေတာတောင် အိမ်ကမီတာ ဖြုတ်ခံရတာမျိုးလည်း ရှိတယ်။ မီတာဖြုတ်ခံရရင် မီတာကြေးဆောင်ပြီး ပြန်တပ်ပေးတယ်။ ပြန်တပ်ဆင်ခ ၂,၀၀၀ ပေးရသေးတယ်။ အခုရက်တွေ မီတာကြေးဆောင်ဖို့ မီတာရုံးမှာ မနက် ၇ နာရီလောက်ကနေ စပြီး တန်းစီနေရတယ်။ တချို့ဆို ညနေထိ မပြန်ရဘူး။ ဒါတောင် ဖြတ်ပိုင်းမရဘူး။ နောက်ရက်မှ ယူရတဲ့သူတွေရှိတယ်” လို့ ပြောပါတယ်။

ကျွန်းလှမြို့နယ်မှာ ည ၈ နာရီကနေ မနက် ၆ နာရီအထိသာ အပြင်ထွက် သွားလာခွင့်ပြုထားတယ်လို့ သိရပါတယ်။

စစ်ကိုင်းတိုင်း၊ ကျွန်းလှမြို့နယ် ဝေလမူကျေးရွာကို စစ်ကောင်စီတပ်က မတ် ၁ ရက်နေ့ မွန်းတည့် ၁၂ နာရီလောက် လေကြောင်းတိုက်ခိုက်ခဲ့တယ်လို့ ဒေသခံတွေက ပြောပါတယ်။

စစ်ကောင်စီက ဝေလမူကျေးရွာကို Mi 35 ရဟတ်ယာဉ် နှစ်စီးသုံးပြီး တိုက်ခိုက်ခဲ့တယ်လို့ ကျွန်းလှဒေသခံတစ်ဦးက ပြောပါတယ်။

“သူတို့က ရွာကို လေယာဉ်နှစ်စီးသုံးပြီး တိုက်ခိုက်ခဲ့တယ်။ အဲဒီလိုပစ်ခတ်ပြီးတော့ စစ်သားတွေ မြေပြင်ကို ချတယ်ဗျ။ ရွာသားတွေကတော့ ပြေးသူက ပြေးပေါ့။ ပိတ်မိသူတွေလည်း ရှိနေသေးတယ်ဗျ။ အကျအဆုံး အထိအခိုက်ကတော့ ဘာမှပြောမရသေးဘူး။ သူတို့က အခုရွာထဲမှာပဲ ရှိသေးတာဆိုတော့ ဘာမှ ပြောမရသေးဘူး။ ဘာကြောင့် ကျနော်တို့ ရွာကို တိုက်ခိုက်တာလဲဆိုတော့ ဒီ(-)တွေက လူစိတ်မရှိတော့ဘူး။ ဒလန်သတင်းအမှားပေးလည်း အခုလို လာပစ်တာပဲ။ အမှား အမှန် မခွဲခြားတော့ဘူး။”

အခုလို စစ်ကောင်စီက ပစ်ခတ်တိုက်ခိုက်တာကြောင့်  ဒေသခံရွာသားတွေ နေရပ်စွန့်ခွာ စစ်ဘေးရှောင်နေကြရပါတယ်။ 

ဒေသခံပြည်သူ့ကာကွယ်ရေးအဖွဲ့တွေကတော့ လေယာဉ်ပစ် လက်နက်ရရှိနိုင်ဖို့ အလှူရှင်တွေအနေနဲ့ ဖြစ်ဖြစ်၊ NUG အစိုးရကပဲ ဖြစ်ဖြစ် အမြန်ဆုံးချထားပေးနိုင်ပါက အကောင်းဆုံးဖြစ်မယ်လို့ ‌စစ်ကိုင်းတိုင်းပြည်သူကာကွယ်ရေးအဖွဲ့တွေက ပြောဆိုနေကြပါတယ်။