ချီလီနိုင်ငံမှာ လူမှာ ကြက်ငှက်တုပ်ကွေးရောဂါ ဖြစ်ပွားမှုကို ပထမဆုံး တွေ့ရှိခဲ့ကြောင်း နိုင်ငံရဲ့ ကျန်းမာရေးဝန်ကြီးဌာနက မတ် ၂၉ ရက်မှာ သတင်းထုတ်ပြန်ပါတယ်။

ပြင်းထန်တဲ့ တုပ်ကွေးရောဂါလက္ခဏာတွေ ပြနေတဲ့ အသက် ၅၃ နှစ်အရွယ် အမျိုးသားတဦးမှာ အဲဒီဖြစ်စဉ်ကို တွေ့ရှိခဲ့ကြောင်း ဝန်ကြီးဌာနရဲ့ ထုတ်ပြန်ချက်အရ သိရပါတယ်။

ပြင်းထန်တဲ့ အသက်ရှူလမ်းကြောင်းဆိုင်ရာ ကူးစက်မှုလို့ခေါ်တဲ့ ပြင်းထန်အဆုတ်ရောင်ရောဂါ ဖြစ်ပွားမှု အားလုံးအတွက် အခုချိန်မှာ အစိုးရရဲ့ ပရိုတိုကော ရှိထားတာကြောင့် ဒါကို အမျိုးအစား မခွဲခြားတတ်လို့ ပြည်သူ့ကျန်းမာရေးဌာနကို ပို့လိုက်တဲ့အခါ H5 virus ဖြစ်တဲ့ ကြက်ငှက်ဗိုင်းရပ်စ်လို့ တွေ့ရှိရကြောင်း ချီလီကျန်းမာရေးဝန်ကြီး စီမဲနာ အဂီလယ်ရာက ပြောပါတယ်။

အစိုးရကလည်း ကူးစက်မှုအရင်းအမြစ်အပြင် လူနာနဲ့ ထိတွေ့ခဲ့သူတွေကိုပါ စုံစမ်း စစ်ဆေးနေကြောင်းလည်း ဆိုပါတယ်။

ချီလီနိုင်ငံမှာ တောရိုင်းတိရိစ္ဆာန်တွေမှာ မနှစ်နှောင်းပိုင်းက စတင်ပြီး H5N1 ကြက်ငှက်တုပ်ကွေးရောဂါ ဖြစ်ပွားမှုကို အစီရင်ခံခဲ့ပါတယ်။

ချီလီကျန်းမာရေးအာဏာပိုင်တွေက ဒီဗိုင်းရပ်စ်ဟာ ငှက် သို့မဟုတ် အဏ္ဏဝါနို့တိုက်သတ္တဝါတွေ ဆီကနေ လူကို ကူးစက်နိုင်တယ်လို့ မှတ်ချက်ပြုပေမဲ့ လူမှလူသို့ ကူးစက်ခြင်းမရှိသေးကြောင်း သိရပါတယ်။

ကမ္ဘောဒီးယားနိုင်ငံမှာ အသက် ၁၁ နှစ်အရွယ် မိန်းကလေးတဦးဟာ H5N1 ကြက်ငှက်တုပ်ကွေးဗိုင်းရပ်စ် ကူးစက်ခံရပြီးနောက် ဖေဖော်ဝါရီ ၂၃ ရက်မှာ သေဆုံးခဲ့ကြောင်း ကမ္ဘောဒီးယား ကျန်းမာရေးဝန်ကြီးဌာနက ထုတ်ပြန်ပါတယ်။

၂၀၁၄ ခုနှစ်နောက်ပိုင်း အရှေ့တောင်အာရှနိုင်ငံတွေမှာ H5N1 ရောဂါပိုးတွေ့ရှိရတဲ့ ကမ္ဘောဒီးယားနိုင်ငံရဲ့ ပထမဆုံး လူသားကူးစက်မှုဖြစ်ကြောင်း ကျန်းမာရေးဝန်ကြီး မမ်ဘွန်နေးက ကြာသပတေးနေ့ ထုတ်ပြန်ချက်မှာ ပြောကြားခဲ့ပါတယ်။

ကျန်းမာရေးဝန်ထမ်းတွေဟာ အဲဒီမိန်းကလေးနေထိုင်ရာ မြို့တော် ဖနွမ်းပင်အရှေ့ဘက် ပရေး ‌ဗေးပြည်နယ်ရှိ နေအိမ်ကို ပိုးသတ်ဆေးတွေ ဖျန်းခဲ့ပါတယ်။

ပရေးဗေးပြည်နယ်ကပဲ H5N1 ကူးစက်ခံထားရသူ နောက်ထပ် ၁၂ ဦးကို တွေ့ရှိခဲ့ရပြီး သူတို့ရဲ့နမူနာတွေကို ဖနွမ်းပင်မြို့ကို ယူဆောင်သွားကြောင်းနဲ့ ရလဒ်တွေကို နောက်နေ့တွေမှာ ထုတ်ပြန်ဖို့ရှိကြောင်း ကျန်းမာရေးအတွင်းဝန် ယို့ခ်ဆောင်ဘာက ဖေဖော်ဝါရီ ၂၄ ရက်မှာ ပြောပါတယ်။