ထိုင်းနိုင်ငံ၊ ရနောင်းကနေ တနင်္သာရီတိုင်း၊ ကော့သောင်းမြို့ကို ရောက်ရှိလာတဲ့ နေရပ်ပြန် ရွှေ့ပြောင်းမြန်မာအလုပ်သမား ၆၇၀ ဦးကို စစ်ကောင်စီက ကွာရန်တင်းစင်တာမှာ မထားဘဲ သက်ဆိုင်ရာ ဒေသအသီးသီးကို ဖေဖော်ဝါရီ ၃ ရက်မှာ ပြန်လည်ပို့ဆောင်ခဲ့တယ်လို့ ရွှေ့ပြောင်းမြန်မာအလုပ်သမားတွေထံက သိရပါတယ်။

အဆိုပါ ရွှေ့ပြောင်းမြန်မာအလုပ်သမားတွေဟာ အကျဉ်းကျခံရပြီး လွတ်ရက်စေ့ကာ ထိုင်းနိုင်ငံ ရနောင်းမြို့ရှိ လူဝင်မှုကြီးကြပ်ရေးထိန်းသိမ်းရေးစခန်း (IDC) မှာ လပေါင်းများစွာ ရှိနေပြီဖြစ်ပေမဲ့ နေရပ်ပြန်ဖို့ ကြန့်ကြာပြီး လူ့အခွင့်အရေး ချိုးဖောက်ခံနေရလို့ ပြီးခဲ့တဲ့ ဇန်နဝါရီ ၂၈ ရက်ကစပြီး ၂ ရက်ဆက်တိုက် ဆန္ဒပြခဲ့ကြသူတွေ ဖြစ်ပါတယ်။

နေရပ်ပြန် ရွှေ့ပြောင်းမြန်မာအလုပ်သမားတဦးက “ကျနော့်ကို ဖေဖော်ဝါရီလ ၂ ရက်နေ့က စစ်သင်္ဘောနဲ့ လာခေါ်တယ်။ စစ်ကောင်စီခန့် ဝန်ကြီးချုပ် အပါအဝင် သက်ဆိုင်ရာကနေပြီး ကြိုဆိုတယ်။ ကျန်းမာရေးစစ်ပြီးတော့ ကိုယ့်ဒေသကို ပြန်ပို့ပေးခဲ့တယ်” လို့ ပြောပါတယ်။

အရင်က နေရပ်ပြန် မြန်မာအလုပ်သမားတွေကို လက်ခံပြီးတော့ ကွာရန်တင်းစင်တာမှာ ထားခဲ့ဖူးပေမဲ့ အခုတော့ မထားတော့ဘဲ ရွှေ့ပြောင်းအလုပ်သမားတွေကို သက်ဆိုင်ရာနေရာ အသီးသီးကို ပြန်ပို့လိုက်တယ်လို့ရွှေ့ပြောင်းမြန်မာအလုပ်သမား ကူညီပေးသူတဦးက ပြောပါတယ်။

အလားတူ အရင်က နေရပ်ပြန်အလုပ်သမားတွေကို ကော့သောင်းမြို့ သက်ဆိုင်ရာ တာဝန်ရှိသူတွေကသာ ကြိုဆိုခဲ့ပြီး အခုတခေါက်မှာတော့ စစ်ကောင်စီရဲ့ ဝါဒဖြန့် သတင်းမီဒီယာတွေမှာ ဖော်ပြခဲ့သလို  စစ်ကောင်စီခန့် ဝန်ကြီးချုပ်ကိုယ်တိုင် တခမ်းတနားနဲ့ ကြိုဆိုခဲ့တယ်လို့ မြို့ခံတွေဆီက သိရပါတယ်။

ထိုင်းနိုင်ငံမှာ ကိုဗစ်-၁၉ ကူးစက်မှုနှုန်းနဲ့ သေဆုံးမှု လျော့ပါးလာတာကြောင့် လာမယ့် အောက်တိုဘာ ၁ ရက်နေ့ကစပြီး အန္တရာယ်ရှိ ကူးစက်ရောဂါအဖြစ်မှ စောင့်ကြည့်ရမယ့် ရောဂါအဖြစ် အဆင့်လျှော့ချလိုက်သလို တခြားဖြေလျှော့မှုတွေလည်း ရှိလာတော့မှာ ဖြစ်ပါတယ်။

အဆင့်လျှော့လိုက်ပြီးနောက် ဆက်လက်လိုက်နာကျင့်သုံးရမယ့် စည်းကမ်းချက်တွေနဲ့ ပတ်သက်တဲ့ အစည်းအဝေးတရပ်ကို ထိုင်းကူးစက်ရောဂါ ကာကွယ်ထိန်းချုပ်ရေးဦးစီးဌာနက  ပြီးခဲ့တဲ့ စက်တင်ဘာ ၂၁ ရက်မှာ ကျင်းပခဲ့ပါတယ်။

အဆိုပါအစည်းအဝေးကနေ လာမယ့် အောက်တိုဘာ ၁ ရက်ကစပြီး ကိုဗစ်-၁၉ ကူးစက်ခံထားရသူတွေဟာ ရောဂါမပြင်းထန်ရင် ဒါမှမဟုတ် ရောဂါလက္ခဏာမပြရင် ကွာရန်တင်းဝင်စရာမလိုဘဲ ၅ ရက်တာ  DMHT ဆိုတဲ့ ခပ်ခွာခွာနေ၊ Mask တပ်၊ လက်ဆေး၊ ATK စစ် စတာတွေကို လုပ်ဆောင်ဖို့ ဆုံးဖြတ်လိုက်ပါတယ်။

ဒါ့အပြင် နိုင်ငံတကာလေဆိပ်တွေမှာ ပြည်ပကဝင်ရောက်လာရင် အရင်လို ကိုဗစ်-၁၉ ကာကွယ်ဆေး ထိုးနှံပြီးသား သက်သေခံလက်မှတ်လည်း ပြသစရာ မလိုတော့ဘူးလို့ ဆိုပါတယ်။

လက်ရှိ ထိုင်းနိုင်ငံရဲ့ ကိုဗစ်-၁၉ ကူးစက်မှု အခြေအနေဟာ အရင်ရောဂါမပြန့်ပွားခင်ကလို ပုံမှန်အခြေအနေနီးပါး ပြန်ရောက်နေပြီဖြစ်လို့  Mask (နှာခေါင်းစည်း) ကိုလည်း မိမိအခြေအနေပေါ် မူတည်ပြီး တပ်လိုကတပ်၊ ဖြုတ်လိုက ဖြုတ်နိုင်ကြောင်း၊ လူသိပ်သည်းထူထပ်တဲ့နေရာ၊ မိမိနဲ့ မသိကျွမ်းတဲ့ မျက်နှာစိမ်းတွေနဲ့ ပြောဆိုဆက်ဆံတဲ့အခါမှာ တပ်ထားသင့်ပြီး လေဟာပြင်မှာ တယောက်တည်း ကိုယ်လက်လှုပ်ရှား အားကစား လုပ်ရင်တော့ တတ်ဖို့မလိုကြောင်း၊ Mask တပ်တာ မတပ်တာဟာ ကိုယ့်သဘောမို့ အပြစ်မြင်လို့မရကြောင်း ထိုင်းကျန်းမာရေးဝန်ကြီး ဒေါက်တာ အနုထင်းချန်းဝီရကွန်းက အစည်းအဝေးအပြီးမှာ သတင်းထောက်ကို ပြောပါတယ်။

ကိုဗစ်-၁၉ ကူးစက်မှုကြောင့် ထုတ်ပြန်ခဲ့ရတဲ့ အရေးပေါ်အခြေအနေ စည်းကမ်းချက်တွေနဲ့ ပတ်သက်လို့တော့ ထိုင်းနိုင်ငံ ကိုဗစ်-၁၉ အခြေအနေ ကာကွယ်ထိန်းချုပ်ရေး ဗဟိုကော်မတီရဲ့ စက်တင်ဘာ ၂၃ ရက် အစည်းအဝေးမှာ ဆွေးနွေးမယ်လို့ ပြောသွားပါတယ်။

ထိုင်းနိုင်ငံရဲ့ လက်ရှိ ကိုဗစ်-၁၉ ကူးစက်မှု အခြေအနေမှာ စက်တင်ဘာ ၂၃ ရက် ထုတ်ပြန်ချက်အရ ပိုးကူးစက်ခံရသူ လူနာသစ် ၇၅၂ ယောက်၊ သေဆုံးသူ ၉ ယောက်၊ သက်သာပျောက်ကင်းသူ ၇၉၄ ယောက်၊ လက်ရှိ ဆေးကုသမှုခံယူနေသူ ၈,၂၃၅ ယောက်ရှိပြီး ဒီ ၂၀၂၂ ဇန်နဝါရီလကနေ ဒီနေ့ထိ ကူးစက်ခံရသူ ၂,၄၅၃,၆၅၅ ‌ယောက်ရှိတယ်လို့ သိရပါတယ်။