စစ်ကိုင်းတိုင်း ခင်ဦးမြိုနယ်အနောက်ဘက်ခြမ်းက ကျေးရွာတွေအတွင်းကို ဖေဖော်ဝါရီ ၂၅ ရက် နေ့လယ်ပိုင်းလောက်မှာ စစ်တပ်က စစ်ကြောင်းထိုးပြီး လက်နက်ကြီးနဲ့ ပစ်ခတ်တာကြောင့် ဒေသခံ ၉၀၀၀ ကျော် ဘေးလွတ်ရာ ထွက်ပြေးနေရတယ်လို့ ဒေသခံတွေက ပြောပါတယ်။

ကံသာယာ၊ ကံသစ်၊ ဗအိုး၊ ငှက်ပျောရွာ၊ မြစ်တော်၊ အင်တိုင်းကြီး၊ ဆီပုတ္တရာ စတဲ့ ရွာ ၇ ရွာကို စစ်ကြောင်းထိုး ဝင်ရောက်လာတဲ့အတွက် ဒေသခံတွေ ထွက်ပြေးတိမ်းရှောင်နေရတာလို့ ခင်ဦးမြိုနယ်ပြည်သူ့အုပ်ချုပ်ရေးအဖွဲ့က သတင်းထုတ်ပြန်ပါတယ်။

ထွက်ပြေးတိမ်းရှောင်နေရတဲ့ ဗအိုးရွာသူတဦးက “အဲဒီစစ်ကြောင်းက နေ့လယ်မှာ ဗအိုးရွာကို လက်နက်ကြီးတွေနဲ့ ပစ်ခတ်ဝင်ရောက်လာတာ။ နီးစပ်ရာကျေးရွာတွေပါ ပြေးရတယ်" လို့ ပြောပါတယ်။

စစ်အုပ်ချုပ်ရေးကြေညာပြီးနောက် ခင်ဦးမြိုနယ်အတွင်းက ကျေးရွာ ၆ ရွာ၊ အိမ်ခြေ ၆၀၀ ကျော် မီးရှို့ခံထားရပြီး ဖေဖော်ဝါရီ ၂၄ ရက် ညနေကလည်း မြိုပေါ်က နေအိမ်နဲ့ဆိုင်ခန်းတချို့ကို စစ်တပ်က စီးနင်းဝင်ရောက်ကာ ဒေသခံ ၁၄ ဦးကို ဖမ်းဆီးခဲ့တယ်လို့ သိရပါတယ်။

စစ်ကိုင်းတိုင်းဒေသကြီး၊ ကန့်ဘလူမြို့နယ်တောင်ဘက်ခြမ်း ထန်ကုန်းတိုက်နယ် ညောင်ဇင်ရွာမှာ တရက်တည်း ပြည်သူ ၅ ဦးမိုင်းထိပြီး ၁ ဦး စိုးရိမ်ရတယ်လို့ ဒေသခံတွေက ပြောပါတယ်။

ဖေဖော်ဝါရီ ၂၅ ရက်နေ့မနက်က ကာဘိုးရွာဘက်ကနေ ညောင်ဇင်ရွာကို ဆိုင်ကယ်နဲ့ ဈေးလာရောင်းတဲ့ လင်မယား ၂ ဦးနဲ့ ဒေသခံအရပ်သား ၃ ဦး ကျေးရွာအဝင်အထွက် လမ်းတွေမှာ မိုင်းထိမှန်ခဲ့တယ်လို့ ဆိုပါတယ်။

ဒေသခံတဦးက “မိုင်းပေါက်သံကြားတာနဲ့ သေနတ်သံတွေပါကြားရတယ်။ ရွာအဝင်အထွက်နေရာတွေမှာ ဖြစ်သွားတာ။ အခုဆို ရွာထဲကနေ ရွာပြင်တောင် မထွက်ရဲတော့ဘူး။ ထိတဲ့သူတွေကို ကန့်ဘလူဆေးရုံကို ပို့ထားတယ်၊ တယောက်တော့ ဆိုးဆိုးရွားရွား ဖြစ်သွားတယ်” လို့ ပြောပါတယ်။

နယ်ခံပျူစောထီးတွေကလည်း PDF တွေ လာတိုက်မှာကို စိုးရိမ်တာကြောင့် ရွာအနီးနားက နေရာအများစုမှာ အခုလို မိုင်းထောင်ထားလေ့ရှိတယ်လို့ ဒေသခံတွေက ပြောပါတယ်။

ဖေဖော်ဝါရီ ၁၆ ရက်နေ့တုန်းကလည်း ညောင်ဇင်ရွာမှာ ထောင်ထားတဲ့ မိုင်းပေါက်ကွဲမှုကြောင့် လယ်တောထဲသွားတဲ့ ပြည်သူတဦးနဲ့ နွားနှစ်ကောင် ထိခိုက်ဒဏ်ရာရရှိခဲ့ပါသေးတယ်။

စစ်ကိုင်းတိုင်း၊ မုံရွာမြို့နယ်၊ မုံရွာ-ချောင်းဦး ကားလမ်းမှာ တောပုရွာက ပျူစောထီး ခေါင်းဆောင်တဦးနဲ့ တပ်ဖွဲ့ဝင် ၂ ဦး၊ အမျိုးသမီး ၁ ဦး လိုက်ပါလာတဲ့ အိမ်စီးကား ၁ စီးကို ဒီဇင် ဘာ ၂၉ ရက်‌ နေ့လယ်မှာ PDF–South Monywa-V2 ပူးပေါင်းတပ်ဖွဲ့က ပစ်ခတ်ခဲ့ရာ ပျူစောထီး ခေါင်းဆောင်နဲ့ ကားပေါ်ပါလာသူ ၂ ဦး သေဆုံးခဲ့တယ်လို့ PDF တပ်ဖွဲ့ဝင်တဦးက ပြောပါတယ်။

“တောပုရွာအထွက် ဆိုင်းဘုတ်နားအရောက်မှာ ပစ်ခတ်ခဲ့တာ၊ ပျူတွေလာမယ်ဆိုတာ သတင်းရလို့ စောင့်ပြီး ပစ်ခတ်တိုက်ခိုက်ခဲ့တာပါ။ တောပုရွာက ပျူခေါင်းဆောင်က အရင်က စစ်မှုထမ်းဟောင်း။ ကားပေါ်ပါလာတဲ့ အမျိုးသမီး ၁ ဦးကိုတော့ ကောင်းကောင်းမွန်မွန် ပြန်လွှတ်ပေးလိုက်ပါတယ်။”

ပစ်ခတ်မှုဖြစ်ခဲ့တဲ့နေရာမှာ ကားက အခုချိန်ထိ ရှိနေတုန်းဖြစ်ပြီး အနီးနား ပတ်ဝန်းကျင်မှာတော့ ပျူစောထီးတပ်ဖွဲ့တွေ ကင်းပုန်းတွေချထားတယ်လို့ ပြောပါတယ်။

အဲ့ဒီပစ်ခတ်တိုက်ခိုက်မှုကို People’s Defence Force – South Monywa နဲ့အတူ Anyar Defense Force / Garuda King Monywa တပ်ဖွဲ့တို့က ပူးပေါင်းတိုက်ခိုက်ခဲ့တာလို့ ဆိုပါတယ်။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့၊ ဝါရုံကုန်းကျေးရွာကို ဒီဇင်ဘာ ၂၈ ရက် ညနေ ၅ နာရီခွဲလောက်က စစ်ကောင်စီတပ် ရမ်းသန်းပစ်ခတ်တဲ့အတွက် ပြည်သူ ၄ ဦး ထိခိုက်ဒဏ်ရာ ရရှိခဲ့တယ်လို့ ဒေသခံတွေဆီက သိရပါတယ်။

အဆိုပါပစ်ခတ်မှုကို စစ်ကောင်စီလက်အောက်ခံ ရွှေဘိုလေ့ကျင့်ရေး ၈ မှ ပစ်ခတ်တာ ဖြစ်တယ်လို့လည်း ဆိုပါတယ်။

ခင်ဦးဒေသခံ ပြည်သူတဦးက “ထိခိုက်တာက အမျိုးသား ၁ ဦး၊ အမျိုးသမီး ၃ ဦး၊ ပေါင်း ၄ ဦးအထိ ထိခိုက်ဒဏ်ရာ ရရှိခဲ့တယ်ဗျ။ ကိုယ့်ရွာထဲ ကို‌ယ့်‌နေရာတောင် အသက်အန္တရာယ်ကတော့ အတော်လေးကို စိုးရိမ်ရတယ်ဗျာ။ စစ်ကောင်စီအနေနဲ့ ရွာတွေ အခုလို လက်နက်ကြီးနဲ့ လိုက်ပစ်တာတော့ မလုပ်သင့်ဘူးဗျ။ သူတို့ကို မကြိုက်တဲ့သူကိုတောင် ကြိုက်လာအောင် စည်းရုံးရမယ့်အစား အဲလိုပစ်နေတာတော့ ပြည်သူတွေ သေရုံပဲရှိမယ်” လို့ ပြောပါတယ်။

ရွှေဘိုမြို့ လေ့ကျင့်ရေး ၈ က ဒီဇင်ဘာ ၂၇ ရက် ညနေပိုင်းမှာ ပစ်ခတ်တာကြောင့် ခင်ဦးမြို့နယ် ရေအေးကုန်းရွာက ဒေသခံအမျိုးသားတဦး လက်နက်ကြီးကျည် ထိမှန်ခဲ့တယ်လို့ ဒေသခံတွေဆီကနေ သိရပါတယ်။

စစ်ကောင်စီက ကျေးရွာတွေကို ၃ ရက်တာ လက်နက်ကြီးတွေနဲ့ ပစ်ခတ်နေတာကြောင့် ပြည်သူတွေ နေရပ်စွန့်ခွာ ထွက်ပြေးနေကြရတယ်လို့လည်း ဒေသခံတွေက ပြောပါတယ်။