ကိုရီးယားလူမျိုး စပါးတိုက်စစ်မှူး ဆွန်ဟောင်မင်အပေါ်  လူမျိုးရေးခွဲခြား တဲ့အပြုအမှုလုပ်ဆောင်ခဲ့တဲ့ ပရိသတ်ကို ပဲလေ့အသင်းကအရေးယူမယ်လို့ ထုတ်ပြန်ပါတယ်။

မေလ ၆ ရက်က စပါးအသင်းရဲ့အိမ်ကွင်းမှာ ကစားခဲ့တဲ့ အဲဒီပွဲစဉ်မှာ ခရစ္စတယ်ပဲလေ့က တစ်ဂိုး ဂိုးမရှိနဲ့ရှုံးနိမ့်ခဲ့ပါတယ်။

ကွင်းဘေးစည်းကနေ လမ်းလျှောက်လာတဲ့ ဆွန်ဟောင်မင်ကို ခရစ္စတယ်ပဲလေ့ပရိသတ်တစ်ဦးက မျက်လုံးကို လက်နဲ့ ထိုးပြပြီး လက်နှစ်ဖက်နဲ့ ဓာတ်ပုံရိုက်တဲ့အမူအယာ လုပ်ပြခဲ့ပါတယ်။

အဲဒီပရိသတ်ဘေးက လူငယ်တစ်ဦးကလည်း ဆွန်ဟောင်မင်ကို ဆဲရေးတိုင်းထွာခဲ့တာပါ။ အဲဒီဗီဒီယိုဖိုင်ဟာ ဆိုရှယ်မီဒီယာကနေ ထွက်ပေါ်လာပြီးနောက် ပဲလေ့အသင်းက ရဲတပ်ဖွဲ့ဆီပေးပို့ပြီး လူမျိုးရေးခွဲခြားတဲ့အပြုအမူလုပ်ဆောင်ခဲ့တဲ့ ပရိသတ်ကို ရှာဖွေစစ်ဆေးဖို့ လုပ်ဆောင်နေပါတယ်။

ဖမ်းမိခဲ့မယ်ဆိုရင်တော့ ပွဲကြည့်ခွင့်ပိတ် ပင်သွားမယ်လို့ ထုတ်ပြန်ပါတယ်။ ပြီးခဲ့တဲ့ ၂၀၂၂ခုနှစ် သြဂုတ်လတုန်းကလည်း ချဲလ်ဆီးပရိသတ် တစ်ဦးကို ဆွန်ဟောင်မင်ကို လူမျိုးရေးခွဲခြားမှု လုပ်ဆောင်ခဲ့ဖူးပြီး အသင်းကပွဲကြည့်ခွင့်ပိတ်ပင်ခဲ့သလို

ဗြိတိန်တာဝန်ရှိသူတွေဘက်ကလည်း ဘောလုံးပွဲတွေမှာ သုံးနှစ်ဝင်ရောက်ကြည့်ရှုခွင့် ပိတ်ပင်ခဲ့ဖူးပါတယ်။

ပရီးမီးယားလိဂ်မှာ ငွေကို ရေလိုသုံးနေကြတဲ့ အသင်းတွေကြောင့် တခြားအသင်းတွေ အခက်တွေ့ရကြောင်း ခရစ္စတယ်ပဲလေ့နည်းပြ ဗီအဲယာက ပြောပါတယ်။

ပရီးမီးယားလိဂ် အသင်းကြီးတွေဟာ ကစားသမားတွေကို ရှိသင့်ရှိထိုက်တဲ့ ဈေးနှုန်းထက် ပိုပေးနေကြတာကြောင့် တခြားအသင်းငယ်တွေအတွက်တော့ ကစားသမားကောင်းတွေ ဝယ်ယူနိုင်ဖို့ ပိုမိုခက်ခဲသွားရကြောင်း နည်းပြဗီအဲယာက ဝေဖန်ပါတယ်။

ချဲလ်ဆီးအသင်းဟာ ရှက်တာဒိုးနက်အသင်းက ယူကရိန်းလက်ရွေးစင် မူဒရစ်ခ်ကို ပေါင် ၈၈ သန်းအထိပေးပြီး ခေါ်ယူခဲ့ပြီးနောက် အခုနှစ်ရာသီမှာ ငွေကြေးသုံးစွဲမှု ပေါင်သန်း ၄၀၀ ကျော်လွန်သွားခဲ့တာပါ။

အလားတူ လာမယ့်ပရီးမီးယားလိဂ်ပွဲစဉ်မှာလည်း ပြီးခဲ့တဲ့ အပြောင်းအရွှေ့မှာ ပေါင်သန်း ၂၀၀ ကျော် အသုံးပြုခဲ့တဲ့ မန်ယူအသင်းနဲ့ ရင်ဆိုင်ရမှာပါ။

ငွေကြေးချမ်းသာတဲ့အသင်းတွေက တခြားနိုင်ငံက ကစားသမားကောင်းတွေကို ငွေကြေးများစွာပေးပြီး ခေါ်ယူနိုင်ပေမဲ့ အသင်းငယ်တွေအတွက်တော့ အဲဒီလိုသုံးစွဲနိုင်တဲ့ အခွင့်အရေး မရှိကြောင်း ဗီအဲယာက ပြောပါတယ်။

ခရစ္စတယ်ပဲလေ့အသင်းအနေနဲ့ မာ့ခ်ဂူယီ၊ အိုလစ်ဆီနဲ့ ဒူကိုရေးတို့လို ကစားသမားတွေကိုသာ ခေါ်ယူနိုင်ပြီး တခြားအသင်းတွေနဲ့ တန်းတူရည်တူ ငွေကြေးမသုံးစွဲနိုင်ကြောင်း ဗီအဲယာက ဆက်ပြီး ပြောသွားပါတယ်။