တနင်္သာရီတိုင်း၊ ထားဝယ်ခရိုင်၊ ကံပေါက်ဒေသမှာ အခြေစိုက်တဲ့ ခလရ-၂၇၃ ကနေ ပြီးခဲ့တဲ့ ဇန်နဝါရီ ၃ ရက်ညက ထွက်ပြေးသွားတဲ့ စစ်သား ၅ ဦး ရက်သတ္တပတ်အကြာမှာ ပြန်ဖမ်းမိသွားတယ်လို့ ဒေသခံတွေဆီက သိရပါတယ်။

ကံပေါက်ဒေသ၊ အုန်းပင်ကွင်းကျေးရွာအုပ်စု၊ ပယရွာက ဘုန်းကြီးကျောင်းတကျောင်းမှာ ရှိနေတုန်း ပြန်ဖမ်းမိသွားတာ ဖြစ်ပါတယ်။

ဒေသခံတဦးက “ဘုန်းကြီးကျောင်းမှာရှိနေတုန်း ဘယ်သူတွေလဲ၊ ဘယ်ကလဲ ပြောရင်းနဲ့ စစ်သားတွေမှန်းသိပြီး သူတို့တပ်ရင်းကို အကြောင်းပြန်ကြားလိုက်တာ မိသွားတယ်” လို့ ပြောပါတယ်။

ပြန်ဖမ်းမိတဲ့ စစ်သား ၅ ဦးကိုတော့ တပ်ပြေးအမှုနဲ့ ထောင်ချဖို့ စီစဉ်နေတယ်လို့ တပ်နဲ့နီးစပ်သူတွေဆီက သိရပါတယ်။

ပြီးခဲ့တဲ့နှစ်ကုန်ပိုင်းကလည်း အဲဒီ ခလရ-၂၇၃ တပ်ရင်းက စစ်သား ၃ ဦး ထွက်ပြေးပြီး ကလိန်အောင်မြို့နယ်ထဲမှာပဲ ပြန်ဖမ်းမိခဲ့ပါတယ်။

အမှတ်-၂၇၃ ခြေလျင်တပ်ရင်းဟာ ကံပေါက်ဒေသမှာရှိတဲ့ သဘာဝဓာတ်ငွေ့စီမံကိန်းတွေရဲ့ လုံခြုံရေးအတွက် တာဝန်ယူရပြီး ရပ်ရွာနဲ့နီးစပ်တာကြောင့် ထွက်ပြေးဖို့လွယ်ကူတဲ့ တပ်ဖြစ်ပြီး ၂၀၂၁ ခုနှစ် စစ်အာဏာသိမ်းမှု မတိုင်ခင်ကလည်း ထွက်ပြေးမှုတွေ ရှိခဲ့တယ်လို့ ဒေသခံတွေက ဆိုပါတယ်။

ကံပေါက်ဒေသမှာ အဲဒီ စစ်ကောင်စီတပ်သား ၅ ဦး ထွက်ပြေးတယ်ဆိုတဲ့ သတင်းထွက်ပြီးတဲ့နောက် ဇန်နဝါရီ ၄ ရက်ကနေ ၈ ရက်အထိ တိုယ်နယ်အတွင်းက ကျေးရွာတွေမှာ မောရဝတီ ရေတပ်ဌာနချုပ်က စစ်ကောင်စီအဖွဲ့တွေ ဦးဆောင်ပြီး လှည့်ကင်း ပတ်ကင်းတွေနဲ့ ရှာဖွေခဲ့ပါတယ်။

ဒါ့အပြင် လမ်းဆုံလမ်းခွတွေမှာ လမ်းသွားလမ်းလာတွေရဲ့ ဆိုင်ကယ်နဲ့ လက်ကိုင်ဖုန်းတွေကိုပါ စစ်ဆေးတာတွေ လုပ်ခဲ့တယ်လို့ အစစ်ဆေးခံခဲ့ရတဲ့သူတွေဆီက သိရပါတယ်။

တနင်္သာရီတိုင်း၊ ထားဝယ်ခရိုင်၊ ရေဖြူမြို့နယ်၊ ကံပေါက်ဒေသမှာ အခြေစိုက်တဲ့ အမှတ် ၂၇၃ ခြေလျင်တပ်ရင်းက တပ်သားသုံးယောက် သြဂုတ် ၁၅ ရက် ညကတည်းက ထွက်ပြေး ပျောက်ဆုံးနေတယ်လို့ တပ်ရင်းရဲ့ စစ်မှုထမ်းဟောင်းတချို့ဆီက သိရပါတယ်။

ကံပေါက်ရွာသားတယောက်က “၁၅ ရက်ညနဲ့ ၁၆ ရက် တနေ့လုံး အရပ်ဝတ်နဲ့ရော စစ်ဝတ်စုံနဲ့ရော တနယ်လုံးပတ်ပြီး လိုက်ရှာနေသေးတယ်။ အခု တပတ်ကျော်နေပြီ၊ ပြန်မတွေ့သေးဘူး” လို့ ပြောပါတယ်။

အခုထွက်ပြေးပျောက်ဆုံးနေတဲ့ တပ်သားသုံးယောက်နဲ့ ပတ်သက်ပြီး စစ်ကောင်စီဘက်ကလည်း တစုံတရာ ထုတ်ပြန်တာမရှိသလို တော်လှန်ရေး အင်အားစုတွေဆီကို CDM အဖြစ် ခိုလှုံခြင်း ရှိ၊ မရှိကိုလည်း အတည်ပြုနိုင်ခြင်း မရှိသေးပါဘူး။

ပြီးခဲ့တဲ့နှစ်ကတော့ ကံပေါက်တိုက်နယ် အုန်းပင်ကွင်းရွာမှာ အခြေစိုက်တဲ့ မောရဝတီ ရေတပ်စခန်းဌာနချုပ်က ဗိုလ်အဆင့်ရှိ အရာရှိနှစ်‌ယောက် အပါအဝင် စစ်ကောင်စီတပ်သား ၃၀ နီးပါး အသုတ်လိုက် တပ်ကိုစွန့်ခွာပြီး CDM လုပ်လာတာမျိုး ရှိခဲ့ပါတယ်။

အာဏာသိမ်းပြီးနောက်ပိုင်းမှာ ကံပေါက်တိုယ်နယ် ပတ်ဝန်းကျင်က အခြေစိုက်တပ်တွေဖြစ်တဲ့ ခလရ ၂၈၂၊ ခလရ ၂၇၃ နဲ့ မောရဝတီ ရေတပ်စခန်းဌာနချုပ်က စစ်သားမိသားစုတွေကို လုံခြုံရေးတင်းကျပ်ပြီး တနင်္ဂနွေနေ့ ဈေးဝယ်ထွက်ရက်တောင် ပေးမထွက်တာ တနှစ်ကျော်နေပြီလို့ ကံပေါက်ဒေသက ကုန်စုံဆိုင်ရောင်းချသူတယောက်က ပြောပါတယ်။

အမှတ် ၂၇၃ ခြေလျင်တပ်ရင်းဟာ ကံပေါက်သတ္တုတွင်းနဲ့ ရတနာ၊ ရဲတံခွန်၊ ဇောတိက ရေနံလုပ်ငန်းတွေရဲ့ ကုန်းတွင်းပိုင်း ပိုက်လိုင်းကို လုံခြုံရေးယူပေးဖို့ ထားရှိတာဖြစ်လို့ ကံပေါက်ဒေသမှာ စစ်ရေးလှုပ်ရှားမှုနည်းပါးပြီး အာဏာသိမ်းပြီးနောက် စစ်ရေးလှုပ်ရှားမှု အနေနဲ့ ထီးခီးဒေသမှာ ကေအန်ယူ တပ်မဟာ ၄ နဲ့ ထိတွေ့တိုက်ပွဲတကြိမ်နဲ့ ကံပေါက်ဒေသ ဖားချောင်းရွာမှာ ကံပေါက်ဒေသ ကာကွယ်ရေးတပ်ဖွဲ့နဲ့ ထိတွေ့တိုက်ပွဲတကြိမ် ဖြစ်ခဲ့တာ ရှိပါတယ်။