ယူကရိန်းနိုင်ငံအရှေ့ပိုင်း ခါကိဗ်မြို့အပါအဝင် အနီးတဝိုက်ကဒေသတွေမှာ ဧပြီ ၂၂ ရက်က ရုရှားဒုံးကျည် ၅ စင်းထက်မနည်း ထိမှန်ခဲ့တာကြောင့် အရပ်ဘက် အဆောက်အအုံအချို့ ပျက်စီးသွားတယ်လို့ ဒေသဆိုင်ရာ တာဝန်ရှိသူတွေက ပြောပါတယ်။
ဒေသဆိုင်ရာ အုပ်ချုပ်ရေးမှူးဖြစ်သူ အိုလေဆီညေဟူဘိုကတော့ ခါကိဗ်မြို့တောင်ဘက်ရှိ ကော်တလဲရီကျေးရွာမှာ ဒုံးကျည်တစ်စင်း ထိမှန်ခဲ့သလို မြို့တွင်းမှာလည်း နောက်ထပ် ဒုံးကျည်တစ်စင်းကြောင့် အကြီးအကျယ် မီးလောင်ခဲ့တယ်လို့ တယ်လီဂရမ်မှာ ရေးသားထားပါတယ်။
ဒီတိုက်ခိုက်မှုကြောင့် ကော်တလဲရီကျေးရွာက နေအိမ် နှစ်လုံး ဆိုးဆိုးရွားရွား ပျက်စီးသွားခဲ့တာပါ။ ဒီလိုပေါက်ကွဲရာက နေအိမ်တစ်လုံး လုံးဝကြေမွသွားတဲ့အပြင် အနားက တခြားနေအိမ်တစ်လုံးကိုပါ ထိမှန်ခဲ့ကြောင်း သိရပါတယ်။
ဒေသခံ လျူဘော့ဗ် ဟိုလော့ရှက်ဗ်ပိုဗာကတော့ "ပြတင်းပေါက်အားလုံး ကျိုးပဲ့သွားတဲ့အပြင် ခေါင်မိုးကလည်း တစ်စိတ်တစ်ပိုင်း ပျက်စီးသွားတယ်"လို့ ရိုက်တာ သတင်းဌာနကို မှတ်ချက်ပေးပါတယ်။
နောက်ထပ်ဒေသခံတစ်ဦးဖြစ်သူ နာတာလီယာ ပလော့တ်ကာ "ကလေးဖြစ်သူဟာ အလွန်ကို ကြောက်ရွံ့နေသလို ရေချိုးခန်းထဲကတောင် ကလေးကို မထုတ်ရဲသလောက်ပါပဲ၊ ရိုးရိုးသားသားပြောရရင်အားလုံးအသက်ရှင်ကျန်ခဲ့တဲ့အတွက် ဘုရားသခင်ကို ကျေးဇူးတင် ပါတယ်" လို့ ပြောပါတယ်။
ယူကရိန်းနိုင်ငံ ခါကိဗ်မြို့နဲ့ ရုရှားနယ်စပ်နားက Tsupivka ရွာကို ဆက်သွယ်ထားတဲ့ ရထားတွေဟာ နိုဝင်ဘာ ၂၈ ရက်မှာ ပြန်ပြေးဆွဲနေပြီလို့ ရိုက်တာသတင်းထောက်တဦးက ပြောပါတယ်။
ယူကရိန်း မီးရထားအဖွဲ့တွေဟာ ခါကိဗ်ဒေသက ပျက်စီးနေတဲ့ မီးရထားလမ်းတွေကို ပြန်ပြင်နေတာ အချိန် ၁ လကျော်လောက် ရှိနေပါပြီ။
သူတို့ရဲ့ နောက်ဆုံးစစ်ဆေးမှုအတွင်း ရထားတွေနဲ့ လမ်းကြောင်းတွေ အပါအဝင် အပျက်အစီး ၇၇ ခုလောက်ကို တွေ့ရှိခဲ့တယ်လို့ ပရူဒီရန်ခါရွာရှိ မီးရထားလမ်းကို ပြုပြင်မှုတွေ လုပ်ဆောင်နေတဲ့အဖွဲ့မှ အကြီးတန်း ရထားဝန်ထမ်းက ရိုက်တာကို ပြောပါတယ်။
စစ်မဖြစ်ခင်က လူဦးရေ ၂,၀၀၀ လောက်နေထိုင်တဲ့ရွာက ရထားဘူတာဟာ စည်ကားခဲ့ပေမဲ့ အခုတော့ အဲဒီကျေးရွာမှာ နေထိုင်သူ အနည်းငယ်သာ ကျန်ရှိတော့ကြောင်း ပရူဒီရန်ခါဒေသခံ ယူရီးတိုကာက ပြောပါတယ်။ အရှေ့မြောက်ပိုင်းဒေသ ခါကိဗ်ကနေ ရုရှားတပ်တွေကို စက်တင်ဘာလမှာ ဖယ်ရှားခဲ့ပါတယ်။
