အီရန်အမျိုးသမီး မာဆာအာမီနီ အကျဉ်းကျခံနေရတုန်း သေဆုံးမှုဟာ အီရန်ရဲ့ ရန်သူတွေက နှိုးဆော်တဲ့ ခါးသီးတဲ့ဖြစ်ရပ်တခုလို့ အီရန်ရဲ့ ထိပ်တန်းခေါင်းဆောင် အယာတိုလာ အလီ ခါမေနီက ပြောလိုက်ပါတယ်။

အစ္စလာမ်ဘာသာဝင်တယောက်ရဲ့ အစဉ်အလာ မဟုတ်ဘူးလို့ ယူဆရတဲ့ အဝတ်အစားတွေ ဝတ်ထားလို့ အသက် ၂၂ နှစ်အရွယ် အမျိုးသမီး အာမီနီ ဖမ်းဆီးခံရပြီး သေဆုံးမှုအတွက် ပထမဆုံးမိန့်ခွန်းမှာ ခါမေနီက လုံခြုံရေးတပ်ဖွဲ့ဝင်တွေကို အပြည့်အဝ ထောက်ခံအားပေးခဲ့ပါတယ်။

ခါမေနီကတော့ အမေရိကန်နဲ့ အစ္စရေး အပါအဝင် အစ္စလာမ္မစ်သမ္မတနိုင်ငံရဲ့ မဟာရန်ဘက်တွေက အနှောင့်အယှက်တွေကို ကြိုးကိုင်နေတယ်လို့လည်း  စွပ်စွဲခဲ့ပါတယ်။

ဒီစကားကြောင့် အာမီနီသေဆုံးမှုအတွက် သီတင်းပတ် ၂ ပတ်ကျော်ကြာ ဆန္ဒပြ မငြိမ်မသက်မှုတွေကို လုံခြုံရေးတပ်ဖွဲ့ဝင်တွေက နှိမ်နင်းရာမှာ ပိုပြင်းပြင်းထန်ထန် ဖြိုခွင်းလာနိုင်တယ်လို့ မီဒီယာတွေက မှတ်ချက်ပေးခဲ့ပါတယ်။

အာမီနီ သေဆုံးပြီး နှစ်ပတ်ကျော်ကြာအောင် မငြိမ်မသက် ဖြစ်ခဲ့ပြီး ရဲတပ်ဖွဲ့နဲ့ စေတနာ့ဝန်ထမ်း ဘာဆစ်ဂျ် ပြည်သူ့စစ်တို့ အပါအဝင် လုံခြုံရေးတပ်ဖွဲ့တွေက ဆန္ဒပြပွဲတွေကို ဖြိုခွင်းရာမှာ ဦးဆောင်နေတာပါ။

ဖြိုခွင်းပုံကြောင့် သေဆုံးသူဦးရေ ၁၃၀ ကျော်ရှိပြီး ရာနဲ့ချီ ဒဏ်ရာရခဲ့တယ်၊ လူထောင်ပေါင်းများစွာ အဖမ်းခံရတယ်လို့ လူ့အခွင့်အရေးအဖွဲ့တွေက ပြောပါတယ်။

ဆယ်စုနှစ် လေးစုကျော်လာပြီဖြစ်တဲ့ အစ္စလာမ္မစ် ဘာသာရေးခေါင်းဆောင်တွေရဲ့ အုပ်ချုပ်မှုကို အဆုံးသတ်ဖို့ တောင်းဆိုရင်း အီရန်အာဏာပိုင်တွေကို နှစ်ပေါင်းများစွာအတွင်း အဆိုးရွားဆုံး ဆန့်ကျင်တဲ့ ဆူပူအုံကြွမှုတွေအတွင်း လုံခြုံရေးတပ်ဖွဲ့ဝင် အများအပြား သေဆုံးခဲ့တယ်လို့ အီရန်အာဏာပိုင်တွေက သတင်းထုတ်ပြန်ခဲ့ပါတယ်။

အီရန်ထိပ်တန်းခေါင်းဆောင် အယာတိုလာ အလီခါမေနီက အီရန်ရဲ့အနာဂတ်ဟာ ကမ္ဘာ့အင်အားကြီးတွေနဲ့ နျူကလီးယားဆွေးနွေးမှု အောင်မြင်ခြင်း မအောင်မြင်ခြင်းအပေါ် တည်မှီမနေသင့်ဘူးလို့ ပြောလိုက်ပါတယ်။

ခါမေနီက ၂၀၁၅ နျူကလီးယားဆွေးနွေးမှုတွေ ပြန်စတာ တိုးတက်မှုရှိပေမဲ့ တိုင်းပြည်က အဲဒီရလဒ်ကို စောင့်နေစရာမလိုဘူး၊ လုပ်စရာရှိတာ ဆက်လုပ်ကြလို့ အရာရှိတွေကို ပြောခဲ့တာပါ။ သူက “အနောက်အုပ်စုနဲ့ ဆွေးနွေးတာ ကောင်းချင်ကောင်းမယ်၊ ဆိုးချင်ဆိုးမယ်၊ အာရုံစိုက်မနေနဲ့ ကိုယ့်အလုပ် ကိုယ်လုပ်ကြပါ” လို့ ပြောပါတယ်။

နောက် သူက “အီရန်ရဲ့ နျူကလီးယားဆွေးနွေးရေးအဖွဲ့တွေဟာ အမေရိကန်ရဲ့ အလွန်အကျူး တောင်းဆိုမှုတွေကို မလိုက်လျောပါနဲ့၊ အမေရိကန်ဟာ ဆွေးနွေးပွဲကတိတွေ အကြိမ်ကြိမ် ချိုးဖောက်လို့ သူတို့ လမ်းဆုံးကို ရောက်နေပြီ၊ အီရန်က အဲဒီအခြေအနေမဟုတ်ဘူး” လို့လည်း ပြောခဲ့တာပါ။

ယီမင်နိုင်ငံမှာ အီရန်နဲ့ ဆော်ဒီအာရေးဗျ  တိုက်ပွဲတွေ ဖြစ်နေတာနဲ့ပတ်သက်လို့ ခါမေနီက “အောင်ပွဲရဖို့ အခွင့်အလမ်းမရှိဘဲ ဘာကြောင့် စစ်ပွဲဆင်နွှဲမလဲ၊ ယီမင်မှာ ဆော်ဒီတို့ အနိုင်ရမလား၊ လုံးဝ မနိုင်စေရပါဘူး၊ အောင်ပွဲရဖို့ နည်းလမ်းတွေရှာပါ” လို့ အီရန်အဆင့်မြင့်အရာရှိတွေကို ပြောပါတယ်။