မန္တလေး၊ ချမ်း‌အေးသာစံမြို့နယ်နဲ့ ပုသိမ်ကြီးမြို့နယ်တွေမှာ မေလ ၃ ရက် မနက်ပိုင်းနဲ့ နေ့လယ်ပိုင်းတို့က မီးလောင်မှုဖြစ်ပွားခဲ့ပြီး ဈေးဆိုင်ခန်း ၇ ခန်း၊ တိုက်ခန်းတခု ပျက်စီးဆုံးရှုံးခဲ့တယ်လို့ မန္တလေးဗဟိုမီးသတ်ဌာနက သတင်းထုတ်ပြန်ပါတယ်။

ချမ်းအေးသာစံမြို့နယ်၊ လမ်း ၃၀ (၈၉×၉၀) လမ်းထောင့်၊ ကျောက်ဆစ်မီးသတ်ဌာန အရှေ့ဘက်မှာ မနက် ၁၀ နာရီ ၁၅ မိနစ်လောက်က သုံးထပ်တိုက်ရဲ့ ဒုတိယထပ်မှာ မီးလောင်ခဲ့ပြီး အတွင်းပိုင်း ပျက်စီးဆုံးရှုံးခဲ့ပါတယ်။

မီးလောင်ရတဲ့ အကြောင်းအရင်းကို စိစစ်နေဆဲဖြစ်ပြီး မြို့နယ်မီးသတ်ယာဉ် ၄ စီးနဲ့ ငြှိမ်းသတ်ခဲ့တာ‌ကြောင့် ၁၀ နာရီ ၃၁ မိနစ်မှာ မီးငြိမ်းသွားခဲ့ပါတယ်။

ပုသိမ်ကြီးမြို့နယ်၊ ရန်ကင်းတောင်၊ ရေတံခွန်တောင်ဂေါက်ကွင်းအနီးက Ever Chit ကြက်‌ကြော်ဆိုင်မှာ နေ့လယ် ၁၂ နာရီ ၂၈ မိနစ်လောက်က မီးလောင်မှုဖြစ်ပွားခဲ့ပြီး ကြက်ကြော်ဆိုင် အပါအဝင် ဈေးဆိုင်ခန်း ၇ ခန်း ပျက်စီးသွားပါတယ်။

မန္တလေးအခြေစိုက် ကယ်ဆယ်ရေးအသင်း တာဝန်ခံက “ကျောက်ဆစ်နားက တိုက်က ဝါယာရှော့ဖြစ်ပြီး လောင်တာ၊ မီးခိုးတွေ အထွက်များတာ၊ ဒုတိယထပ်တော့ အတွင်းခန်းတွေ လောင်သွားတယ်၊ ပုသိမ်ကြီး မီးလောင်တာကတော့ ကြက်‌ကြော်ဆိုင်‌ကနေ ဘေးက စား‌သောက်ဆိုင်‌ခန်းတွေပါ ကူးသွားတာပါ၊ လောလောဆယ် ၇ ဆိုင်လို့ သိရတယ်၊ လူထိခိုက်တာမျိုးတော့ မရှိဘူး၊ ဂေါက်ကွင်းနားက ဆိုင်တွေပါ၊ ဘာလို့လောင်လဲတော့ စစ်ပြီးမှသိမှာ” လို့ ‌‌ပြောပါတယ်။

မီးလောင်ပြီး နာရီဝက်အကြာမှာ မီးငြှိမ်းနိုင်ခဲ့ပြီး ပျက်စီးဆုံးရှုံးမှုတန်ဖိုးကို တွက်ချက်နေဆဲ ဖြစ်တယ်လို့ သိရတဲ့အပြင် မီးလောင်မှုနေရာကို မန္တလေးဗဟိုမီးသတ်၊ ပုသိမ်ကြီးမီးသတ်ယာဉ်တွေနဲ့ မြို့ခံကယ်ဆယ်ရေးအသင်းတွေက ကူညီငြှိမ်းသတ်ခဲ့ကြတယ် လို့ သိရပါတယ်။

ပြီးခဲ့တဲ့ မေလ ၁ ရက်ကလည်း မဟာအောင်မြေမြို့နယ်မှာ လူနေအိမ်မီးလောင်မှု ဖြစ်ပွားခဲ့ပြီး Level 1 အဆင့် မီးငြှိမ်းသတ်ခဲ့ရတယ်လို့ မြန်မာနိုင်ငံမီးသတ်ဌာနချုပ် မှတ်တမ်းအရ သိရပါတယ်။

ဓာတ်ပုံ( မန္တလေးဗဟိုမီးသတ်တပ်ဖွဲ့ )

မန္တလေးတိုင်း၊ ချမ်းအေးသာစံမြို့နယ်၊ ပြည်ကြီးပျော်ဘွယ်အနောက်ရပ်ကွက်၊ ၃၄ လမ်း၊ ၈၉ လမ်းနဲ့ လမ်း ၉၀ ကြားမှာ ဇန်နဝါရီ ၂ ရက် မနက် ၈ နာရီခွဲလောက်က အမျိုးသားတယောက် သေနတ်နဲ့ ပစ်သတ်ခံခဲ့ရပါတယ်။

ပစ်သတ်ခံရသူမှာ အသက် ၅၀ အရွယ် ဦးဝင်းအောင် ဆိုသူဖြစ်ပြီး ကျောက်စိမ်းရောင်းဝယ်ရေး လုပ်ကိုင်သူတဦး ဖြစ်တယ်လို့  ဒေသခံတွေထံက  သိရပါတယ်။

ဦးဝင်းအောင်ဟာ သေနတ်ပစ်ခံရတဲ့ဒဏ်ရာနဲ့ နေရာမှာတင် သေဆုံးခဲ့ပြီး ဘယ်အဖွဲ့အစည်းက ဘာကြောင့်ပစ်တယ်ဆိုတာတော့ မသိရသေးပါဘူး။

စစ်ကောင်စီအသိုင်းအဝိုင်းက လူမှုကွန်ရက် သတင်းစာမျက်နှာတွေမှာ ဦးဝင်းအောင်ကို PDF က ပစ်တယ်ဆိုပြီး အတည်မပြုနိုင်တဲ့ သတင်းတွေ ဖြန့်နေပါတယ်။

မန္တလေးတိုင်း၊ ချမ်းအေးသာစံမြို့နယ်မှာလည်း ၈၉ လမ်း၊ ၂၇ လမ်းနဲ့ ၂၈ လမ်းကြားရှိ သိရီဟေမာအရှေ့ရပ်ကွက် အုပ်ချုပ်ရေးမှူးရုံးဝင်းအတွင်းမှာ ဇန်နဝါရီ ၂ ရက် မနက် ၇ နာရီခွဲလောက်က မပေါက်ကွဲသေးတဲ့ လက်ပစ်ဗုံးတလုံး တွေ့ရှိခဲ့ပါတယ်။

မပေါက်ကွဲသေးတဲ့ လက်ပစ်ဗုံးကို ရပ်ကွက်ရုံးမှာ သန့်ရှင်းရေးလာလုပ်တဲ့ ရာအိမ်မှူးတယောက်က တွေ့ရှိခဲ့ပြီး စစ်ကောင်စီတပ်သားတွေ ရောက်လာခဲ့တယ်လို့ သိရပါတယ်။

စစ်ကောင်စီတပ်သားတွေ ရောက်လာအပြီးမှာ တွေ့ရှိတဲ့ လက်ပစ်ဗုံးကို ဖောက်ခွဲဖျက်ဆီးခဲ့တယ်လို့ ရဲတပ်ဖွဲ့နဲ့နီးစပ်သူထံက သိရပါတယ်။

မန္တလေးမြို့အနှံ့ လမ်းဆုံလမ်းခွတွေမှာ စစ်ကောင်စီတပ်၊ ယာဉ်ထိန်း၊ စည်ပင်၊ ရဲနဲ့ အရပ်ဝတ် လက်နက်ကိုင်တွေပါတဲ့ အဖွဲ့စုံက ဆိုင်ကယ်၊ ကားတွေ တားဆီးစစ်ဆေးနေပါတယ်။