မန္တလေးတိုင်း၊ သပိတ်ကျင်းမြို့နယ်၊ ချောင်းကြီးရွာရဲကင်းကို ဖေဖော်ဝါရီ ၂၄ ရက် နေ့လယ် ၁ နာရီလောက် ဒရုန်းနဲ့ ဗုံးသီးချ တိုက်ခိုက်ခဲ့တယ်လို့ ဗိုလ်လင်းယုန်တပ်ဖွဲ့ (ပြင်ဦးလွင် ခရိုင် ပ.က.ဖ) က ပြောပါတယ်။
ဇန်နဝါရီ ၄ ရက် ပထမအကြိမ် တိုက်ခိုက်မှုမှာတော့ ရဲ ၃ ယောက် သေဆုံးကာ ၅ ယောက် ဒဏ်ရာ ရခဲ့ပြီး အခု တိုက်ခိုက်ရာမှာတော့ Drone Jammer တပ်ဆင်ထားခဲ့တာကြောင့် ဗုံးသီး နှစ်လုံးသာ ချနိုင်ခဲ့တယ်လို့ ဆိုပါတယ်။
ဗိုလ်လင်းယုန်က "နောက်ဆက်တွဲ အခြေအနေကတော့ မသိရသေးဘူး။ အဲဒီမှာလည်း သတင်းက ဖုံးထားတဲ့ အနေအထားမှာရှိတယ်။ အဲဒီ ဗုံးသီးချတာတောင်မှာပဲ သူတို့ နင်းမိုင်း ချထားတဲ့ဟာ တွေ ကွဲတာ ဘာညာနဲ့လုပ်နေတာ" လို့ ပြောပါတယ်။
ဒီတကြိမ်တိုက်ခိုက်မှုမှာ ရဲကင်းထဲက ထိခိုက်သေဆုံးမှုကို အတည်မပြုနိုင်သေးဘဲ စစ်တပ်က ပြန်လည်ပစ်ခတ်တာတွေ လုပ်ခဲ့တယ်လို့ ဆိုပါတယ်။
တိုက်ခိုက်မှုကြောင့် ချောင်းကြီး ရဲကင်းနားမှာ စစ်တပ်က စစ်ဆေးနေသလို ချောင်းကြီးရွာတဝိုက်က ရွှေလုပ်ကွက် ကုမ္ပဏီတွေထဲ ဝင်ရောက် စုံစမ်းစစ်ဆေးနေတယ်လို့ သိရပါတယ်။
မန္တလေးတိုင်း၊ သပိတ်ကျင်းမြို့နယ်၊ ချောင်းကြီးအုပ်စု၊ ချောင်းကြီးကျေးရွာ ရဲကင်းစခန်းနားမှာ ဧပြီ ၁၆ ရက် ညနေပိုင်းက ဖောက်ခွဲတိုက်ခိုက်မှုကြောင့် စစ်ကောင်စီ တပ်သားနှစ်ဦး သေဆုံးခဲ့တယ်လို့ TBK တောဆင်ရိုင်း ပြောက်ကျးတပ်ဖွဲ့က ထုတ်ပြန်ထားပါတယ်။
ညနေ ၃ နာရီ ၂၈ မိနစ်က ချောင်းကြီး ရဲကင်းစခန်းတောင်ဘက်အနီးအနားမှာ ဖောက်ခွဲ တိုက်ခိုက်ခဲ့တာဖြစ်ပြီး သေဆုံးသူနှစ်ဦးအပြင် သုံးပွင့်ဗိုလ် ၁ ဦး၊ ချောင်းကြီးရဲကင်းစခန်းမှူးနဲ့ စစ်ကောင်စီခန့် အုပ်ချုပ်ရေးမှူး ဦးဖိုးထောင်တို့ ထိခိုက်ဒဏ်ရာရခဲ့တယ်လို့ ဆိုပါတယ်။
ဖောက်ခွဲတိုက်ခိုက်ဖို့ ပြင်ဆင်ထားချိန်မှာ စစ်ကောင်စီတပ်ဖွဲ့ဝင်တွေနဲ့ ရဲတွေက မသင်္ကာတာကြောင့် လာရောက်စစ်ဆေးနေခိုက် ဖောက်ခွဲခံခဲ့ရပြီး နှစ်ယောက်ကတော့ အခင်းဖြစ် နေရာမှာပဲ သေဆုံးခဲ့တယ်လို့ သိရပါတယ်။
ဒေသခံတဦးက “ပေါက်ကွဲမှုဖြစ်ပွားပြီးတဲ့နောက်ပိုင်းမှာ သေနတ်ငါးချက်လောက်ဖောက်တယ်။ ဖောက်ပြီးတော့ တအောင့်နေတဲ့အခါမှာ မတ်တူး ကားနောက်ဖုံးထဲမှာပဲ တစ်ယောက်တင်သွားတာ၊ တအောင့်နေတဲ့အခါမှာ ချောင်းကြီးက မေတ္တာစမ်းရေ နာမှုကူညီရေး အသင်းကားနဲ့ပဲ မောင်းသွားတယ်၊ ခုနစ်မိုင် ဟိုဘက်က ကြာအင်းဆေးရုံကို မောင်းသွားတယ်လို့ သိရတယ်” လို့ ပြောပါတယ်။
ပေါက်ကွဲမှု ဖြစ်ပြီးတဲ့နောက်မှာ ချောင်းကြီးရွာတောင်ဘက်ထိပ်၊ ရဲကင်းစခန်းအနီးမှာ လမ်းတလျှောက်ပိတ်ဆို့ကာ ကားတွေကို စစ်ဆေးနေတယ်လို့လည်း သိရပါတယ်။
ဒီဖောက်ခွဲမှုကို သပိတ်ကျင်းမြို့နယ် (ပကဖ) TBK တောဆင်ရိုင်း ပြောက်ကျားတပ်ဖွဲ့နဲ့ လက်အောက်ခံအဖွဲ့ဝင် ဗိုလ်တေဇ (02) တို့ ပူးပေါင်းဖောက်ခွဲတိုက်ခိုက်ခဲ့တာလို့ သိရပါတယ်။
